Ingona nzima yagejejwe mu Ngoro yo kwa ‘Richard Kandt’ (Amafoto&Video)

Yanditswe na Thamimu Hakizimana
Kuya 16 Mutarama 2018 saa 01:38
Yasuwe :
0 0

Mu gihe abasuraga Ingoro Ndangamurage yo kwa Richard Kandt bajyaga babona inzoka z’ubwoko butandukanye, ubu noneho banahasanga ingona nzima.

Iyi ngona yakuwe muri Pariki y’Akagera imaze amezi atanu igejejwe i Kigali, ireshya na metero imwe na santimetoro zigera kuri 20. Ituye muri piscine yabishaka ikotera akazuba mu busitani buyikikije.

Iyi ngona ikiri nto igaburibwa amafi gusa, mu cyumweru ikarya ibiro bine ariko abayikurikirana bavuga ko nimara gukura bazajya bayiha akaguru k’ihene cyangwa ak’inka.

Kugira ngo Abanyarwanda bemererwe kuyisura, umukuru yishyura amafaranga y’u Rwanda 1500 na ho umwana agatanga 700; abanyamahanga bo bishyura 6000.

Uretse iyi ngona, mu Ngoro Ndangamurage yo kwa Richard Kandt harimo n’amoko menshi y’inzoka; arimo uruziramire, insane, impiri y’amahembe, incarwatsi, ifuha n’ikimata, mamba n’izindi.

Umuyobozi w’Ikigo cy’Ingoro Ndangamurage z’u Rwanda (INMR), Amb. Masozera Robert, avuga ko ibi byose byashyizwe muri iyi ngoro y’amateka kugira ngo bikurure abantu.

Yagize ati “Ingona na yo iri mu bikurura abantu kuko iri mu biteye amatsiko yo na ziriya nzoka twabihashyize kugira ngo tubyegereze abantu kuko tuzi ko benshi badashora kuzisanga muri pariki.”

Ingoro ndangamurage yo kwa Richard Kandt buri mwaka isurwa n’abantu bagera ku bihumbi 12, ikinjiza amafaranga ari hagati ya miliyoni 15 na 18 z’amafaranga y’u Rwanda.

Iyo ivuye muri piscine ifite aho yisanzurira mu busitani
Iyi ngona igaburirwa amafi gusa
Piscine ituwemo n'ingona kwa ‘Richard Kandt’
Inzoka y'uruziramire wasanga kwa ‘Richard Kandt’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza