Kwamamaza

Mu myaka 13 ba mukerarugendo basura ingagi bikubye inshuro zisaga enye

Yanditswe kuya 19-11-2016 saa 13:04' na Emma-Marie Umurerwa


Umuyobozi wa Pariki y’Igihugu y’Ibirunga, Prosper Uwingeri, avuga ko kuva mu mwaka wa 2003, ba mukerarugendo basuraga ingagi bageraga ku bihumbi birindwi, kuri ubu biyongereye bakaba bamaze kugera ku bihumbi 30 muri uyu mwaka.

Uwingeri atangaza ko ubukerarugendo bumaze gushinga imizi mu gihugu ndetse bunafasha kwinjiza amadovize biturutse ku miyoborere myiza, ibikorwa remezo, imitangire ya serivisi inoze n’ibindi, ari nabyo bituma ba mukerarugendo biyongera buri munsi.

Ibi yabivuze kuri uyu wa 18 Ugushyingo 2016, ubwo Umunyamerika McDonald n’umugore we Mary Ann McDonald besaga umuhigo wo gusura ingagi zo muri Pariki y’Igihugu y’Ibirunga ku nshuro ya 100.

Yagize ati “Aba Banyamerika bari basanzwe bajya gusura ingagi mu bindi bihugu, baje gusura ingagi mu Rwanda mu mwaka wa 2003, bareba serivisi bahawe, bareba ingagi barangije baravuga bati nta handi hantu tuzajya tujya gusura ingagi, ahubwo batangira kujya baza batuzaniye n’abandi bashyitsi, ubu bakaba bamaze kuzana abarenga 600.”

Uyu muyobozi yakomeje avuga ko undi umaze guca agahigo ko gusura ingagi inshuro nyinshi ari Umwongereza wazisuye inshuro zigera kuri 50, undi umukurikiye akaba amaze kuzisura inshuro 20.

Yakomeje agira ati “Mu 2003 twakiraga ba mukerarugendo bagera mu bihumbi 7000 mu mwaka, none mu myaka 13 tugeze mu bantu bagera ku bihumbi 30.”

‘Igiciro cyo gusura ingagi ku Banyarwanda kiri hasi cyane’

Akomeza avuga ko n’ubwo abanyarwanda basura Pariki y’Ibirunga atari benshi nk’abanyamahanga, hari intambwe imaze guterwa.

Yagize ati “Ubu Abanyarwanda bamaze kugera nko ku 10%. Nta Munyarwanda ukwiye kuvuga ko gusura ingagi bihenze, ni amafaranga y’u Rwanda ibihumbi 30 mu gihe umunyamahanga yishyura amafaranga y’u Rwanda asaga ibihumbi 550.”

McDonald n’umugore we Mary Ann McDonald, bavuga ko n’ubwo umuhigo wabo bawesheje, batazahwema kugaruka mu Rwanda gusura ingagi.

McDonald yagize ati “Twatangajwe n’uburyo u Rwanda rwita cyane ku ngagi zo mu misozi zisigaye mu bihugu bike byo ku Isi. Dukunda u Rwanda, dukunda ingagi, kandi dukunda uburyo Abanyarwanda bakirana urugwiro ababagana.”

Umugore we Mary Ann McDonald avuga ko uko baje gusura ingagi babona impinduka mu mikurire yazo, kororoka ndetse n’uburyo zibayeho mu miryango zikomokamo. Akaba yishimira n’uburyo Ikigo cy’Igihugu cy’Iterambere RDB, cyakomeje cyita kuri ba mukerarugendo, dore ko ari no mu baje kwita izina abana b’Ingagi muri Nzeri uyu mwaka.

Mu mwaka wa 2013 bari bamaze gukoresha miliyoni y’amadorali y’amanyamerika mu bikorwa byo gusura ingagi.

Umuyobozi wa ‘3 B Hotels/Mountain View Lodge’, Paul Muvunyi, iherereye mu Kagari ka Nyabigoma mu Murenge wa Kinigi, ari nayo yacumbikiye aba Banyamerika inshuro zose baje mu Rwanda, avuga ko ubukerarugendo bumaze kugera ku rwego rushimishije, ariko kandi hari byinshi bitaragerwaho.

Yagize ati “Turacyari kure cyane ugereranyije no mu bihugu byo muri aka Karere. Nk’aba baza kureba ingagi hano ntituragera ku rwego rwo kubacumbikira mu gihugu iminsi 10 na 12. Ni ukuvuga ngo baraza bakareba ingagi bagahita bagenda.”

Gusa avuga ko ubwiyongere bwa ba mukerarugendo mu Rwanda butanga icyizere. Ati “Mu 1999, ba mukerarugendo barebye ingagi ntibageraga no kuri 20, mu gihe ubu dufite mu bihumbi bisaga 10. Ikindi ni uko ubu dufite ba mukerarugendo batubwiye ko bazaza kugera mu 2020, bivuga ko hari icyizere kuko hari aho badafite ayo mahirwe.”

Joe McDonald n’umugore we Mary Ann, ni abafotozi babigize umwuga, bafotora inyamaswa zitandukanye zo mu ishyamba (Wildlife photographer).

Akanyamuneza kari kose kuri McDonald n’umugore we Mary Ann McDonald
McDonald na Mary Ann McDonald bari bambaye Kinyarwanda bishimira ko bamaze gusura ingagi inshuro ijana
McDonald n’umugore we Mary Ann McDonald bakiriwe n'abantu benshi
McDonald n’umugore we Mary Ann McDonald bafatanyije n'abakaraza kuvuza ingoma
Bakiriwe n'Itorero Inganzo Ngari
Itorero Inganzo Ngari ryari ryabukereye
Bavuye gusura ingagi ku nshuro ya 100
Umuhango wo kubakira witabiriwe n'abantu batandukanye
Umuyobozi wa ‘3 B Hotels/Mountain View Lodge’, Paul Muvunyi, aganira na McDonald
McDonald n'umugore we bahawe impano

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved