Istanbul, igicumbi cy’umuco wo kuva mu myaka ibihumbi hafi 3000 bishize

Istanbul, igicumbi cy’umuco wo kuva mu myaka ibihumbi hafi 3000 bishize


Yanditswe kuya 29-03-2013 - Saa 13:22' na Murindabigwi Meilleur

Iyo ugeze Istanbul mu mujyi munini wo mu gihugu cya Turukiya, kimwe mu bidatinda kukwigaragariza ni ukuntu abantu bawutuye ari ba mukunda abantu. Aho uciye hose muri Istanbul wakirwa n’inseko nziza, aho usanga mu maso ha benshi haba harangwa n’akanyamuneza biturutse ku miterere y’umuco wo muri iki gihugu kuva cyera mu myaka hafi 3000 bishize.

Ishami ryo mu Rwanda rya Turkish Airlines, imwe mu makompanyi kizigenza mu gutwara abantu n’imizigo yabo ku rwego rw’isi, mu minsi ishize ryateguye urugendo rw’itsinda rito ry’abari baturutse muri bimwe mu bitangazamakuru bikorera mu Rwanda, mu rwego rwo kujya kwihera ijisho bimwe mu bitatse umujyi wa Istanbul, ndetse na bimwe mu biranga umuco ukungahaye w’abanyaturukiya muri rusange.

Istanbul uyirebeye mu nkomane ya Bosphorus

Mu ndege ya Turkish Airlines twagenzemo yo mu bwoko bwa Boeing 737-800 kuva Kigali tugana Istanbul, byadutwaye amasaha arindwi kugirango tugere muri uyu mujyi uherereye ku migabane ibiri, u Burayi n’Aziya, aho ibice bibiri biwugize bitandukanijwe n’inkomane (detroit) ya Bosphorus, mu majyaruguru yawo hakaba hari inyanja y’umukara ndetse n’iya Marmara mu majyepfo. Ibi bice byombi bihuzwa n’ikiraro kirekire gihanamye mu kirere bita Bosphorus kiri ku mwanya wa 21 ku rwego rw’isi mu burebure.

Istanbul ituwe n’abaturage bagera kuri miliyoni hafi 14, ni umwe mu mijyi ituwe cyane ku rwego rw’isi ufite umwihariko kandi wo kuba ari umwe mu mijyi yashinzwe cyera kurenza indi ku isi nzima. Ugendwa cyane na bamukerarugendo baturutse imihanda yose, ukaba izingiro ry’amateka yo kuva mu myaka ibihumbi hafi bitatu ishize ; uhasanga inyubako zubatswe mu myaka 1700 ishize na mbere yaho zose zigihagaze bwuma bitewe n’uburyo zifatwa neza.

Umujyi wa Istanbul washinzwe mu kinyejana cya 7 mbere y’ivuka rya Yesu, ubwo witwaga Byzance, nyuma nanone uza guhindura izina witwa Constantinople mu gihe cy’ubwami bw’Abaromani n’ubwa Ottoman guhera mu mwaka wa 324 kugera mu mwaka w’1923 ubwo Repubulika ya Turukiya yashingwaga na Mustafa Kemal Ataturk wanabaye perezida wa mbere w’iki gihugu, umugabo wubahwa cyane muri iki gihugu ufatwa nk’ikirangirire,

Inyubako zidasanzwe zimaze imyaka irenga 2000

Nyuma yo kugera muri Istanbul, nta kuruhuka twahise tujya kwihera ijisho zimwe mu nyubako zimaze imyaka irenga igihumbi, ndetse zimwe zanarengeje imyaka ibihumbi bibiri. Hagia Sophia ni inyubako nini yatangiye kubakwa mu mwaka wa 330 kugera mu mwaka wa 360, icyo gihe ikaba yari kiliziya, nyuma iza guhindurwa umusigiti mu kinyejana cya 15 ubwo Abaromani basimburwaga n’ubwami bw’aba-Sultans b’ababanya-Ottoman, nyuma iza kugirwa inzu ndangamurage mu mwaka w’1934.

JPEG - 38.2 ko
Hagia Sophia, inyubako yabanje kuba kiliziya, nyuma ihindurwamo umusigiti mbere yo kugirwa inzu ndangamurage ; imaze imyaka 1683 yubatswe

Hagia Sophia ni inyubako ibitse amateka menshi ya Turukiya. Uburyo yubatsemo nabwo buteye amatsiko kuko ifite amagorofa atatu afite uburebure bwa metero zirenga 50. Muri metero nke uvuye kuri Hagia Sophia hari indi nyubako idasanzwe iherereye mu kuzimu bita Yerebatan Sarnıcı yubatswe muri 527, yifashishwaga n’ingoro y’umwami w’I Byzantin nk’ikigega cy’amazi.

Umusigiti uzwi ku izina Sultanahmet Camii bakunze kwita “umusigiti w’ubururu (Blue Mosque)” bitewe n’amabara awutatse, nawo usurwa n’abakerarugendo benshi buri munsi kubera ubwiza bwawo n’igihe umaze kuko wubatswe mu kinyejana cya 17. Umwihariko w’uyu musigiti ni uko ari wo wonyine ku isi wemerewe kugira iminara igera kuri itandatu mu idini ya Isilamu, ukuyemo uw’I Maka wonyine ufite iminara irindwi.

JPEG - 37.2 ko
Umusigiti witiriwe Sultan Ahmed umaze ibinyejana hafi bitanu wubatswe

Twanyarukiye kandi muri rimwe mu masoko manini atwikiriye ku isi bita Grand Bazar rya Istanbul riri ku buso bwa meterokare ibihumbi 200 rigurishirizwamo ibicuruzwa bitandukanye, kuva ku myenda, takataka, zahabu n’ibindi byinshi. Iri ryafunguwe mu mwaka w’1455 rikaba riganwa n’abantu bagera ku bihumbi 400 ku munsi. Hafi yaryo naho haherereye irindi soko byubatse kimwe rigurishirizwamo ibirungo by’amoko atandukanye bikoreshwa mu guteka muri Turukiya kuva mu binyagihumbi birenga bibiri bishize.

Mu mujyi hagati muri Istanbul hari agace gaherereyemo umuhanda wiswe Istiklal (bisobanuye ‘kwibohora’ mu Ruturuki, ururimi rukoreshwa n’abarenga 90% by’abatuye iki gihugu), ureshya na kilometero 2,2, ukoreshwa n’abanyamaguru barenga miliyoni 3 buri munsi baba bari guhaha kuko habarizwa amaduka menshi, harimo n’ayamasosiyete akomeye ku rwego rw’isi.

JPEG - 90.5 ko
Umuhanda wiswe Istiklal wo mu mujyi wa Istambul hagati ugendwa n’abanyamaguru bagera kuri miliyoni 3 ku munsi

Nabajije Isler Burcin, Umuyobozi w’Ishami ryo mu Rwanda rya Turkish Airlines twari kumwe mu rugendo ibyo abacuruzi bo mu Rwanda basanga Istanbul ku biciro byiza, ambwira ko abashyirwa igorora ahanini ari abaranguzi b’imyenda ndetse n’ibikoresho byo muri za quincailleries/hardware kuko bihaboneka ku biciro byo hasi kandi bifite ubuziranenge kuko bicuruzwa mu Burayi hose.

Nk’uko inkengero z’uyu mujyi zose zikikijwe n’inyanja nini, twanyarukiye ku nkombe z’amazi dutega ubwato butwara ba mukerarugendo butuzengurutsa inkomane ya Bosphorus, aho twabashije kubona tumwe mu tubyiniro dukomeye muri uyu mujyi utagendera ku mahame akaze ya Isilamu n’ubwo abarenga 90% bawutuye ari abayoboke b’iryo dini.

Inkuta za Theodose zubatswe mu kinyejana cya 5 nyuma y'ivuka rya Yesu na n'ubu ziracyahagaze Istanbul
Iyi nyubako na n'ubu ikiri ntaraga yitwa Yerebatan Sarnıcı, imaze imyaka 1486, ikaba yubatswe mu kuzimu ; yifashishwaga nk'ikigega cy'amazi

Mu nzira tugana aho twari bufatire ubwato twabashije kwihera ijisho stade ikinirwaho n’ikipe y’umupira w’amaguru Beşiktaş, mukeba wa Galatasaray ikinwamo na Didier Drogba na Fenerbahce, ikipe yakinwemo Jay Jay Okocha, Roberto Carlos cyangwa se Nicolas Anelka n’abandi, bose b’ibihangange bitewe n’ukuntu shampiyona yo muri Turukiya ikomeye kandi ikungahaye.

Ubucuruzi bworohejwe na Turkish Airlines

Turukiya ni kimwe mu bihugu 20 bikize kurenza ibindi ku isi, ubukungu bw’iki gihugu bukaba bushingiye ku bukerarugendo, inganda z’amamodoka, izikora amato n’ibindi.

JPEG - 30.9 ko
Indege ya Turkish Airlines ikora bwa mbere ku butaka bw’u Rwanda tariki 15 Gicurasi 2012

Ubucuruzi muri iki gihugu bworohejwe kurushaho na Turkish Airlines, kompanyi imaze imyaka igera kuri 80 ishinzwe, kuri ubu iri ku mwanya wa mbere mu Burayi mu makompanyi atwara abantu n’ibintu, aho itwara abagenzi babarirwa kuri miliyoni 30 ku mwaka, ndetse benshi muri bo ugasanga banyura ku kibuga cy’indege cya Ataturk muri Istanbul, ahanini bitewe n’aho uyu mujyi uherereye ku ikarita y’isi wavuga ko ari mu masangano y’u Burayi, Aziya, Afurika n’Amerika.

Twasuye ibiro bikuru bya Turkish Airlines imaze kwamamara ku isi bitewe n’ibikorwa biyamamaza kuri za televiziyo bigaragaramo Lionel Messi, Kobe Bryant ndetse n’ikipe z’ibihangange itera inkunga zirimo Manchester United na FC Barcelona, twakirwa n’Umuyobozi wayo wungirije ushinzwe ubucuruzi mu gice cy’Afurika Bwana Mevlut Kayar, umugabo ukunda u Rwanda kuko atabiduhishe, atuganirira ku mateka maremare y’iyi kompanyi.

JPEG - 96.5 ko
Umuyobozi wa Turkish Airlines wungirije ushinzwe ubucuruzi mu gice cy’Afurika Bwana Mevlut Kayar ari kumwe n’itsinda ryari ryaturutse mu Rwanda

Inkuru nziza ku bacuruzi bo mu Rwanda Bwana Mevlut Kayar yatugejejeho ni uko iyi kompanyi izizihiza isabukuru y’umwaka umwe itangiye gukorera mu Rwanda muri uku kwezi kwa Gicurasi, igiye korohereza kurushaho abacuruzi bo mu Rwanda itangiza ingendo zayo za Cargo, indege nini zitwara imizigo gusa kandi ku biciro byiza, izi ngendo zikaba zizatangira mu mezi ari munsi y’abiri ari imbere, bityo ubucuruzi bukazarushaho korohera benshi barangura cyangwa bohereza ibicuruzwa mu mahanga.

Twasuye kandi ibice bitandukanye bigize icyicaro gikuru cya Turkish Airlines birimo aho abapilote batwara indege bitoreza,hamwe mu hakomeye ku mugabane w’u Burayi, tugera kandi n’aho batunganyiriza amafunguro ahabwa abagenzi mu ndege muri sosiyete yitwa Do & Co nayo ifitwemo imigabane na Turkish Airlines.

JPEG - 91.9 ko
Hano twarimo twerekwa uko sosiyete itunganya amafunguro y’abagenda mu ndege za Turkish Airlines yitwa Turkish Do & Co ibigenza

Mu gusoza uru rugendo dusubiye ku kibuga k’indege cyitiriwe Ataturk, mu gihe twari dutegereje indege itugarura I Kigali twabonye umwanya wo kubanza kwiyakirira muri CIP Lounge, iyambere nziza kurusha izindi ku isi mu hantu abagenzi biyakirira mbere yo kurira indege bari ku bibuga by’ingende. Aha hari mbere yo kongera kwisanga imuhira i Kigali mu masaha atandatu n’igice yakurikiye, nyuma y’urugendo bidashoboka kwibagirwa kubera byinshi kandi byiza byaruranze.

JPEG - 51.9 ko
Imwe mu ndege zitorezwamo n’abakora mu ndege iri mu kigo cya Turkish Airlines gitorezwamo abapilote n’abakora mu ndege
Hano twari duhagaze imbere y'icyuma bita simulator gikora nka cockpit (aho abapilote batwarira indege) cyitorezwamo n'abapilote bavuye ku migabane itandukanye
JPEG - 107.6 ko
CIP Lounge iri ku kibuga cy’indege Ataturk muri Istanbul, iyambere nziza kurusha izindi ku isi mu hantu abagenzi biyakirira mbere yo kurira indege bari ku bibuga byazo
JPEG - 60.3 ko
Iri soko rizwi ku izina Grand Bazar ni ryo soko ritwikiriye rinini kurenza andi ku isi ; ryubatswe mu 1455
JPEG - 45.3 ko
Agace ka Levent mu mujyi wa Istanbul gakorerwamo by’umwihariko ibikorwa by’ubucuruzi ni ko kagaragaramo inyubako ndende muri uyu mujyi
JPEG - 45.2 ko
Inkomane ya Bosphorus ihuza ibice byombi bya Istanbul, ibumoso ni igice cya Istambul giherereye ku mugabane w’u Burayi, iburyo ni ikiri ku mugane w’Aziya
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO