RDB na Google muri gahunda yo kugaragaza ahantu nyaburanga binyuze kuri Internet

RDB na Google muri gahunda yo kugaragaza ahantu nyaburanga binyuze kuri Internet


Yanditswe kuya 26-03-2012 - Saa 14:29'

Ikigo cy’igihugu gishinzwe iterambere RDB ku bufatanye na Google mu mpera z’icyumweru gishize bashyize ahantu nyaburanga kuri Internet ngo bizafashe ba mukerarugendo kugera ino bazi ahashimishije kurusha ahandi.

Iki gikorwa kiswe “Rwanda Tourism MapUp” cyakozwe mu mujyi wa Kigali, uwa Musanze ndetse na Rubavu aho ibikorwa by’ubukeragendo birimo amahoteli na resitora ndetse n’ahantu nyaburanga byashyizwe kuri internet.

Umuyobozi ushinzwe ubukerarugendo muri RDB, Rwigamba Rica avuga ko iki gikorwa ari ingirakamaru kuko ubukerarugendo ari bwo buzana amadevize menshi u Rwanda kandi bizatuma birushaho kwiyongera.

Yagize ati : “Abitabiriye kino gikorwa bazafasha kumenyekanisha ahantu hakenerwa cyane na ba mukerarugendo. Ibi kandi ni mu rwego rwo kwagura iki cyiciro cy’ubukungu kuko ari cyo cyambere kinjiza amadevize menshi mu Rwanda”.

Rica Rwigamba, Umuyobozi ushinzwe ubukerarugendo muri RDB

Iki gikorwa cyahuje abagera kuri 40 biganjemo ababizobereyemo bahagarariye Google mu Rwanda, abanyeshuri ba Kaminuza zitandukanye zo mu Rwanda ndetse n’abakora mu ishami ry’ubukerarugendo muri RDB.

Nk’uko ubushakashatsi bwabigaragaje, internet ni bwo buryo bwa mbere bwifashishwa mu kurangira ba mukerarugendo. 70% by’abakerarugendo bafata ibyemezo by’aho bashaka kwerekera bakoresheje internet.

Iki gikorwa kizatuma za resitora n’amahoteli ndetse n’ahandi hantu nyaburanga bibasha kugaragara kuri Google Map kandi bizajya bikomeza buri gihe ngo bityo n’ahashya habashe kugaragazwa.

U Rwanda ni cyo gihugu cya mbere muri Afurika gikoranye byemewe na Google muri iyi gahunda n’ubwo ibihugu byo mu karere nka Kenya na Uganda ho bisanzwe bikorwa n’abanyeshuri biga Ubumenyi bw’Isi muri za Kaminuza.

Ushobora kubona business nk'iyi kuri Google ukamenya aho iherereye neza
Abari mu iki gikorwa bagaragaza ibikorwa byo mu nzu ya KBC
Aba ni bo bagize uruhare muri iki gikorwa cya Rwanda Tourism MapUp
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO