Ba mukerarugendo 63% basura Pariki y’Akagera ni Abanyarwanda, izindi zo bite?

Yanditswe na Mukaneza M.Ange
Kuya 18 Gicurasi 2017 saa 05:04
Yasuwe :
1 0

Imisozi, ibiyaga, inzuzi, inyamaswa z’ubwoko butandukanye n’ahantu hafite amateka yihariye ni bimwe mu byiza nyaburanga bitatse u Rwanda, bituma rusurwa n’abatururse imihanda yose.

Ibi bituma ubukerarugendo buza mu byinjiriza u Rwanda amafaranga menshi buri mwaka, aho nko mu 2016 honyine bwinjije miliyoni 404 z’amadolari ya Amerika, akaba agenda yiyongera kuko nko mu 2010 hari hinjiye miliyoni 201.6 z’amadolari gusa.

Mu byiza bitatse u Rwanda bikunze gusurwa cyane ku ikubitiro haza Pariki zitandukanye zibarizwa mu bice bitandukanye by’igihugu, arizo Akagera, Nyungwe n’Ibirunga.

Nubwo kuri benshi ijambo mukerarugendo risobanuye umunyamahanga, si ko bimeze kuko hari n’Abanyarwanda usanga bafata umwanya wabo bagasura hamwe mu hantu nyaburanga cyane cyane muri za pariki.

Urugero ni nko muri Pariki y’Akagera iherereye mu Burasirazuba bw’igihugu, aho nko mu mwaka wa 2016 Abanyarwanda bihariye 63% by’abantu 41 797 bagiye kuyisura.

Ikigo cy’Igihugu gishinzwe Iterambwere, RDB, kigaragaza ko mu mpamvu zituma Abanyarwanda bitabira gusura Pariki y’Akagera ari ubwoko bwinshi bw’inyamaswa zihabarizwa, zirimo ingwe, inzovu, intare, imbogo ndetse mu minsi ishize haherutse kugarurwamo inkura z’umukara.

Muri Pariki ya Nyungwe ho usanga umubare w’Abanyarwanda bahatemberera ukiri hasi cyane, kuko nko mmu 2016 bari 3 901 muri bamukerarugendo bagera ku 13 644 basuye iyi pariki.

Nubwo bakiri bacye ariko nta wabura kwishimira ko bagenda bazamuka, kuko nko mu 2015 Abanyarwanda bagera ku 2 443 aribo bari basuye iyi pariki.

Iri zamuka ryatangiye kugaragara mu 2010 nyuma yo kubaka ikiraro cyo mu kirere (Canopy) gituma umuntu yumva ko atari ishyamba gusa agiyemo, ahubwo ari bubashe kugendera ku butumburuke butuma yitegereza ibintu byose.

Mu gihe izindi pariki Abanyarwanda bagerageza kwitabira kuzisura, mu Birunga ho baracyari hasi cyane kuko ari 3% gusa by’abagerageza kuyisura.

Mu mpamvu zishobora kuba zituma abantu batitabira kujya gusura pariki y’Ibirunga, harimo ko baba bajyanwe no kureba ingagi gusa kandi kugira ngo bayigereho bikaba bisaba kurira imisozi. RDB ivuga ko abanyarwanda benshi batarasobanukirwa ingagi ku buryo bazigirira amatsiko yo kuzisura.

Imibare itangwa na RDB, igaragaza ko muri rusange ba mukerarugendo bose basuye Pariki mu Rwanda bari 88 184 harimo Abanyarwanda 26 564.

Inkuru z'umukara muri Pariki y'Akagera zitezweho kuzamura urwego rw'ubukerarugendo mu Rwanda
Muri Pariki y'Akagera habarizwamo ubwoko butandukanye bw'inyamaswa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza