Serivisi zose muri Expo 2019 zizishyurwa kuri Mobile Money

Yanditswe na Rabbi Malo Umucunguzi
Kuya 16 Gicurasi 2019 saa 09:43
Yasuwe :
0 0

Ikigo cy’Itumanaho cya MTN Rwanda cyasinyanye amasezerano n’Urugaga rw’abikorera, PSF, azatuma ibikorwa mu imurikagurisha mpuzamahanga riteganyijwe mu mezi make ari imbere, bikorwa hatabayeho guhererakanya amafaranga mu ntoki.

Aya masezerano yasinyiwe aho MTN Rwanda yamurikiraga ibikorwa byayo mu nama ya Transform Africa muri Kigali Convention Centre, kuri uyu wa Kane.

MTN Rwanda imaze kubaka uburyo bwo kwishyura ibicuruzwa mu masoko asanzwe n’andi maguriro nka Tap & Pay cyangwa Momo Pay bwifashisha telefone yanditse muri serivisi ya Mobile Money, aho umuntu *182*3# agakurikiza amabwiriza.

Nyuma yo gusinya aya masezerano, Umuyobozi Mukuru wa MTN Rwanda, Bart Hofker, yavuze ko ibigo byombi byiyemeje kugira uruhare mu guteza imbere ubukungu butarangwamo guhererekanya amafaranga mu ntoki, bahereye kuri Expo y’uyu mwaka izaba ku wa 22 Nyakanga -11 Kanama 2019 i Gikondo kuri Expo Grounds.

Ati “Tuzafatanya ku buryo abakiliya batazaba bakeneye amafaranga mu ntoki ngo bagure itike yo kwinjira, badakeneye n’amafaranga muri Expo ubwayo kubera ko ikintu bashobora gufata cyangwa kugura haba hari mobile money, kandi ikintu cyiza ni uko abakiliya bishyura ya mafaranga bidasabye ko bagira andi barenzaho.”

Ni uburyo avuga ko buzihutira abazitabira imurikagurisha kandi bukabaha umutekano w’amafaranga yabo, bukaba n’inyungu ku bazaba bamurika ibyo bakora.

Yakomeje ati “Bitanga umutekano kuko nubwo telefoni yawe yatakara amafaranga yawe urayagumana, birihuta kuko ni imibare ukeneye gusa, biroroshye kuko urugero nk’umunsi urangiye, umuntu witabiriye kumurika ibyo akora ashobora guhita yohereza kuri konti ye amafaranga yacuruje kandi ku buntu. Ntabwo azaba akeneye kujya kuri banki kugira ngo ashobora kubitsa ya mafaranga kuri konti ye.”

Umuyobozi Mukuru wa PSF, Stephen Ruzibiza, yavuze ko aya masezerano azafasha cyane abazitabira imurikagurisha ndetse n’abarisura.

Ati “Abasura Expo ntabwo bazaba bakeneye kwitwaza amafaranga, bazaba bakeneye gushyira amafaranga kuri Momo Pay, n’abazamurika nabo ntabwo bazakira amafaranga mu ntoki ku baguzi, bazajya bakira amafaranga kuri konti ya Momo Pay.”

Ruzibiza yavuze ko bizagira uruhare mu kunganira gahunda ya leta yo gufasha abantu kubona serivisi bitabasabye kwitwaza amafaranga mu ntoki, kubera ko aho iterambere rigeze umuntu ashobora gukoresha amafaranga ye bidasabye ko aba ayibitseho.

Biteganywa ko imurikagurisha ry’uyu mwaka rizitabirwa n’abantu 500 baturuka mu bihugu bisaga 20 bazaba bamurika ibyo bakora, bose bakazifashisha Momo Pay ndetse byitezwe ko na nyuma ya Expo, nibabona inyungu zayo bakakomeza kuyikoresha.

Ubucuruzi butifashisha amafaranga mu ntoki ni intambwe ikomeye mu gihe Afurika iheruka kwemeranya ku masezerano ashyiraho isoko rusange, AfCFTA, yasinyiwe i Kigali muri Werurwe 2018 ndetse azatangira kubahirizwa mu mpera z’uku kwezi.

Ruzibiza yavuze ko byamaze kwemezwa ko serivisi za PSF zitazakoreshamo amafaranga, ari nabyo bakomeje gukangurira abazitabira Expo.

Biteganywa amatike yo kwinjira azaba agurwa kuri Mobile Money, hakazakorwa na application nshya ya PSF izifashishwa mu gutanga amatike yo kwinjira muri expo. Abakozi ba MTN na PSF bazaba bari aho izabera ngo bafashe abazayitabira.

Biteganyijwe ko hazatambutswa ubutumwa mbere na nyuma y’iki gikorwa, kugira ngo abantu bamenye neza uko bizaba bikorwa.

Stephen Ruzibiza uyobora PSF na Bart Hofker uyobora MTN bashyira umukono ku masezerano yo gufatanya muri EXPO 2019
Abayobozi bombi bishimira amasezerano bari bamaze gushyiraho umukono
Umuyobozi Mukuru wa PSF, Stephen Ruzibiza, yavuze ko aya masezerano azafasha cyane abazitabira imurikagurisha ndetse n’abarisura
Bart Hofker yavuze ko ibigo byombi byiyemeje kugira uruhare mu guteza imbere ubukungu butarangwamo guhererekanya amafaranga mu ntoki
MTN Rwanda yamuritse serivisi zayo zitandukanye muri Transform Africa Summit

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza