U Rwanda rwahawe igihembo cy’igihugu kibereye ubukerarugendo

Yanditswe na Evariste Nsengimana
Kuya 25 Gashyantare 2019 saa 10:27
Yasuwe :
0 0

U Rwanda rwaherewe igihembo cy’igihugu kibereye gukorerwamo ubukerarugendo, mu imurikabikorwa mpuzamahanga ry’ubukerarugendo (Guangzhou International Travel Fair), rimwe mu yakomeye abera mu Bushinwa.

Iri murikabikorwa ngarukamwaka ryabaye ku wa 21-23 Gashyantare 2019, u Rwanda rwahagarariwe na Ambasade yarwo mu Bushinwa ibifashijwemo n’ikigo cy’igihugu cy’iterambere, RDB, nk’Uko The New Times yabyanditse.

Guangzhou International Travel Fair yatangijwe mu 1993, ihuza abamurika bo mu Bushinwa n’abanyamahanga, igamije kugaragaza no kumenyekanisha ibikorwa byabo.

Iry’uyu mwaka ryahuje ibigo birenga 100 byo mu bihugu 55, Ambasade y’u Rwanda yamurikiyemo ibikorwa birimo iby’ubukerarugendo, ibikorerwa mu Rwanda na serivisi za RwandAir.

By’umwihariko RwandAir iri mu myiteguro yo gutangiriza ingendo mu mujyi wa Guangzhou, Umurwa mukuru w’Intara ya Guangdong iherereye mu majyepfo y’u Bushinwa.

Ibikorwa by’u Rwanda byamuritswe hifashishijwe ikoranabuhanga rya ‘live streaming’ rikorerwa ku mbuga nkoranyambaga bikurikiranwa n’ababarirwa muri za miliyoni.

U Rwanda rwahawe igihembo cy’ahantu heza ho gukorerwa ubukerarugendo kubera ibikorwa bibushingiyeho byamuritswe birimo imbyino gakondo zakunzwe na benshi.

Ambasaderi w’u Rwanda mu Bushinwa, Charles Kayonga, yabwiye itangazamakuru ko ‘Abakerarugendo b’Abashinwa bishimira gukorera ingendo mu Rwanda, ndetse ko ubu bashobora kugura ibibukomokaho bifashishije ikoranabuhanga’ kuri porogaramu y’urubuga rwa Alibaba banyuze ahari ‘VisitRwanda’.

Yavuze ko kuba RwandAir igiye gutangiza ingendo zijya zikanava Guangzhou, bizorohereza ibihugu byombi gukora ubucuruzi, kongera ubukerarugendo n’ishoramari ry’u Bushinwa muri Afurika.

Umwaka ushize u Rwanda rwasuwe n’abakerarugendo bo mu Bushinwa barenga 800 ariko biteganyijwe ko uyu mubare uzazamuka mu 2019.

Umuyobozi w’umujyi wa Tuanjie, Li Chenggang, yavuze ko nyuma yo gusura u Rwanda mu 2017 ‘Yifuza kongera kurusura mu gihe cya vuba kuko ari rwiza kandi rufite umuco utangaje’.

Muri uyu mwaka Rwanda ruritegura kwitabira imurikabikorwa ry’ubuhinzi bw’indabo rizabera mu Mujyi wa Beijing n’imurikagurisha rihuza abacuruzi bo muri Afurika no mu Bushinwa rizabera ahitwa Changsha.

U Rwanda rwahawe igihembo cy’igihugu kibereye ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza