U Rwanda rwahawe igihembo mu bihugu bifite ahantu habereye ubukerarugendo

Yanditswe na Philbert Girinema
Kuya 21 Ukwakira 2016 saa 07:55
Yasuwe : XX
0

U Rwanda rwahembwe nk’icyerekezo kibereye ba mukerarugendo hashingiwe ku iterambere rya Pariki y’Igihugu y’Ibirunga, mu irushanwa rigamije kumenyekanisha ahantu hihariye hakorerwa ubukerarugendo no kurengera ibidukikije ku Isi.

Mu guhatanira kwinjira muri iri rushanwa, harebwe ku bigo bikora ibijyanye n’ubukerarugendo, ibihugu 154 byose bisaba kwinjira muri iryo rushanwa ryafunguwe kuwa 8 Nzeri 2016.

Gutoranya abahabwa ibihembo byakozwe n’impuguke mu bukerarugendo, ibihugu byahize ibindi n’ahantu nyaburanga bitangazwa mu nama mpuzamahanga igamije guteza imbere ubukerarugendo n’ibidukikije, Global Green Destinations Day, yabaye kuwa 27 na 28 Nzeri 2016 i Ljubljana muri Slovenia.

U Rwanda rwahagarariwe na Greg Bakunzi washinze ikigo Amahoro Tours, wagaragaje ibikorwa bitatu birengera ibidukikije birimo Umuganda, uko u Rwanda rwaciye amashashi ya Pulasitiki n’ibungwabungwa rya Pariki y’Igihugu y’Ibirunga ibarizwamo Ingagi z’Imusozi.

Mu bihugu 154 hatoranyijwemo 94, Gakunzi agaragara mu batsinze, igihembo agishyikirizwa
kuwa 27 Nzeri 2016 kubera iterambere rya Pariki y’Igihugu y’Ibirunga nk’icyerekezo cya ba mukerarugendo, nyuma yo kugaragaza ubwiza bw’iki gice n’uburyo umubare w’ingagi wagiye wiyongera ukava kuri 700 ukagera kuri 890 guhera mu 1993.

Yanagaragaje uburyo ba mukerarugendo bagiye biyongera bikazamura n’inyungu ubukerarugendo buzanira igihugu, uko ibigo bifasha ba mukerarugendo babageza muri ibyo bice, ndetse 5% by’ibiva mu bukerarugendo bigakoreshwa mu kuzamura abaturiye ibi bice.

Gushyira u Rwanda mu byerekezo bya ba mukerarugendo byitezweho kongera umubare w’abasura u Rwanda n’ishoramari mu bukerarugendo, aho nko mu 2015 bwinjije miliyoni $342, harimo izamuka rya 10% ugereranyije na 2014, ariko u Rwanda rukaba rushaka ko iyi nyungu yajya yiyongeraho 25% buri mwaka.

Amahoro Tours yashinzwe mu 2001 igamije guteza imbere ubukerarugendo, mu 2011 igira igitekerezo gishya cyo guteza imbere ubukerarugendo bushingiye ku muco, ku bufatanye n’umuryango uharanira kurengera ibidukikije, Red Rocks.

U Rwanda rwahawe igihembo mu bihugu bifite ahantu habereye ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza