U Budage: U Rwanda rwitabiriye imurika mpuzamahanga rishingiye ku nama

Yanditswe na Mukaneza M.Ange
Kuya 18 Gicurasi 2017 saa 05:42
Yasuwe :
0 0

Mu rwego rwo kurushaho guteza imbere ubukerarugendo bushingiye ku nama, u Rwanda rwitabiriye imurika mpuzamahanga, IMEX, riri kubera i Frankfurt mu Budage.

IMEX (International Meetings Exhibition), ni imurika ryo ku rwego rwo hejuru, rihuriramo abategura inama baturutse mu bice bitandukanye ku Isi, mu guhitamo aho bifuza ko ibikorwa bari gutegura bizabera. Ryatangiye kuva tariki ya 15-18 Gicurasi 2017.

U Rwanda rwaserukiwe n’Ikigo gishinzwe kumenyekanisha ubukerarugendo bushingiye ku nama mu Rwanda (Rwanda Convention Bureau, RCB) n’inzego z’abikorera harimo Kigali Convention Center & Radisson Blu, Kigali Marriot, Kigali Serena, One and Only n’ibigo bitegura inama birimo Business Events East Africa na Rwanda Events.

Umuyobozi wa RCB, Frank Murangwa, yavuze ko IMEX ari ahantu heza ho kumenyekanisha u Rwanda, guhura n’abaguzi no gukurura inama mpuzamahanga.

Yakomeje avuga ko kwitabira IMEX, bizafasha u Rwanda guhura na ba rwiyemezamirimo bakomeye no kuba rwakwigarurira inama mpuzamahanga ziteganyijwe mu 2018, dore ko inyinshi zitegurwa nibura mbere ho imyaka ibiri.

Umuyobozi Mukuru w’Ikigo cy’Igihugu cy’Iterambere (RDB), Clare Akamanzi, yatangaje ko kwakira inama ari ingenzi cyane mu bukerarugendo bw’u Rwanda, kuko mu 2016 zinjije miliyoni 47 z’amadorali, bikaba biteganyijwe ko mu bihe biri mbere zizinjiza miliyoni 64, akabakaba miliyari 52 mu mafaranga y’u Rwanda.

Mu 2014, nibwo u Rwanda rwatangije gahunda yo kwakira ibiganiro, inama mpuzamahanga n’ibikorwa bitandukanye, mu rwego rwo gukemura zimwe mu mbogamizi igihugu gifite zirimo no kuba kidakora ku Nyanja.

Raporo ku bijyanye n’ubushobozi bw’ibihugu mu kwakira inama mpuzamahanga mu 2016, yakozwe n’Ihuriro mpuzamahanga ku bijyanye no kwakira inama, ICCA, yashyize u Rwanda ku mwanya wa gatatu muri Afurika, nyuma ya Afurika y’Epfo na Maroc.

Abanyarwanda mu bitabiriye imurika mpuzamahanga ry'abategura inama zikomeye riri kubera i Frankfurt mu Budage
Iyi nama yitabiriwe n'abantu baturutse mu bihugu bitandukanye ku Isi

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza