U Rwanda rwungutse hoteli y’inyenyeri eshanu hanze y’Umujyi wa Kigali

Yanditswe na Ishimwe Israel
Kuya 20 Ukuboza 2018 saa 09:54
Yasuwe :
0 0

Ikigo cy’Igihugu gishinzwe Iterambere (RDB) cyatangaje ku nshuro ya kabiri uko hoteli zo mu Rwanda zihagaze hashingiwe ku bipimo bizigenga muri Afurika y’Uburasirazuba (EAC) gishyira One & Only Nyungwe House ku rwego rwa mbere rw’inyenyeri eshanu.

One & Only Nyungwe House iri muri Pariki y’Igihugu ya Nyungwe ni yo hoteli ya mbere iri hanze y’Umujyi wa Kigali yashyizwe kuri uru rwego. Iriyongera kuri Radisson Blu Hotel, Kigali Serena Hotel na Kigali Marriot Hotel zahawe inyenyeri eshanu mu 2017.

Ibirori byo gutangaza inyenyeri ziri hagati y’imwe n’eshanu kuri hoteli 57 zagenzuwe byabereye muri Kigali Serena Hotel ku wa 19 Ukuboza 2018.

Kuva mu mwaka ushize, u Rwanda rufite hoteli n’inyubako zicumbikira abantu 108 zifite ibyangombwa bya EAC.

Gutanga inyenyeri hashingirwa ku birimo serivisi zitanga, aho ziherereye, imyubakire yazo, ubushobozi bwo kwakira abantu, amasaha zikora n’ibindi hagendewe ku mabwiriza ahuriweho na EAC agenga hotel, restaurants, n’izindi nyubako zakira ba mukerarugendo.

Hoteli zahawe inyenyeri enye zirimo High Ground Villa and apartments mu Mujyi wa Kigali; Classic Lodge na Fatima Lodge z’i Musanze, Epic Hotel & Suites y’i Nyagatare na Moriah Hill Resort iri i Karongi.

Izigera kuri 19 zahawe inyenyeri eshatu zirimo Dove Hotel ya ADEPR na Onomo Hotel; hoteli 26 zirimo Ntende Hotel na Orient Park Hotel Ltd zashyizwe ku rwego rw’ebyiri mu gihe esheshatu zahawe inyenyeri imwe.

Akanyamuneza ku banyamahoteli yahawe inyenyeri

Umuyobozi muri One & Only Nyungwe House, Jacques Le Roux, yavuze ko bishimije kuba hotel yahawe inyenyeri eshanu.

Ati “Ntitwari kubigeraho iyo hatabaho gufatanya. Abanyarwanda bafite amahirwe yo kwiteza imbere. Turateganya gutanga amahugurwa ku bakozi bacu mu mijyi ya Dubai na Capetown mu gukomeza kunoza serivisi ku batugana.”

Iyi hotel yubatswe mu 2010 ku bufatanye n’u Rwanda ihabwa izina rya Nyungwe Forest Logde, ryahindutse mu 2017 nyuma y’uko yeguriwe One & Only Nature Resorts.

Ibyumba byayo 22 bigaragaza ubwiza bw’imitakire igaragaza umuco nyarwanda.

Umuyobozi wa Greenwich Hotel Ltd, Rugera Jeannette, akaba na Visi Perezida w’Ishyirahamwe ry’Amahoteli, restaurant na Bar mu Rwanda, yasobanuye ko bazamuye serivisi bagendeye ku itegeko rigenga ubukerarugendo ryo mu 2014.

Ati “Twahawe inyenyeri ebyiri. Amahoteli yo mu Rwanda arahenze kurusha ayo muri EAC. Usanga biterwa n’ibikoresho biva hanze biri hejuru kubera imisoro. Ni ukuganira n’abafatanyabikorwa mu kugabanya ibiciro. Aho kubona abakiliya bake bishyura benshi, wabona benshi bahoraho.”

Nyiramongi Odette uyobora Kivu Paradise Luxury Resort y’i Rubavu yahawe inyenyeri eshatu yatangaje ko “Nshimishijwe no kuba RDB yarazirikanye uko dukora. Ni umusaruro wavuye ku kwakira neza abantu no kubaha serivisi nziza.”

Minisitiri w’Ubutegetsi bw’Igihugu, Prof Shyaka Anastase, yavuze ko iterambere ry’abikorera rijyana n’iry’igihugu.

Ati “Amahoteli n’ubukerarugendo ni icyiciro cy’ubukungu cyitezweho byinshi mu iterambere ry’u Rwanda kigomba kuzamuka nibura 10% buri mwaka. Bituma ubukungu buhumeka neza. Hoteli nyinshi zahawe inyenyeri sizo muri Kigali, biragaragaza ko amafaranga menshi akwirakwira ava hanze yayo.”

Yavuze ko intego u Rwanda rwihaye y’ubukungu bushingiye ku bukerarugendo izagerwaho serivisi nziza nizikomeza kwimakazwa n’ibiciro ku bagana amahoteli bikagabanuka.

Mu 2017, ubukerarugendo bwinjirije u Rwanda miliyoni $ 438, mu gihe intego ya 2024 ni uko ruzabusaruramo miliyoni $ 800.

Umuyobozi Mukuru wungirije w’Ikigo cy’Igihugu cy’Iterambere ushinzwe Ibikorwa, Hategeka Emmanuel, yavuze ko guha hoteli inyenyeri bishimangira iterambere ry’uru rwego.

Ati “Ni ikimenyetso kiduha icyizere ko abashyitsi batugana, bashaka aho kurara n’amafunguro bakirwa neza. Twabonye hotel y’inyenyeri eshanu hanze ya Kigali, biragaragaza umuhate w’u Rwanda mu gusakaza ibikorwa by’ubukerarugendo mu gihugu hose. Mbere hoteli z’inyenyeri eshanu zari muri Kigali ariko turashaka ko no hanze yayo hatangirwa serivisi zinoze z’amahoteli.”

Abanyamahoteli baracyabangamirwa n’inyungu zihanitse ku nguzanyo, igihe gito cyo kwishyura n’imisoro iri hejuru.

RDB yijeje ko izakomeza gukora ubuvugizi ariko isaba urwego rw’abikorera gufata iya mbere.

Iyi hotel iherereye rwagati mu ishyamba rya Nyungwe mu cyayi cy'ahazwi nka Gisakura
Imitegurire yayo ndetse n'aho iherereye byose bituma urushaho gusabana n'urusobe rw'ibinyabuzima
Mu kuyitaka, umuco nyarwanda wahawe agaciro kihariye
One & Only Nyungwe House yiteguye gusigira urwibutso abayisura bose
One & Only Nyungwe House yubatse mu rwagati mu mirima y'icyayi
Minisitiri w'Ubutegetsi bw'Igihugu, Prof. Shyaka Anastase ni we wari umushyitsi mukuru muri uyu muhango
Ibi birori byitabiriwe n'abantu b'ingeri zitandukanye
Umuyobozi Mukuru wungirije w’Ikigo cy’Igihugu cy’Iterambere ushinzwe Ibikorwa, Hategeka Emmanuel
Umuyobozi muri One & Only Nyungwe House, Jacques Le Roux, ashyikirizwa icyangombwa kigaragaza ko hotel iri muri Pariki ya Nyungwe yahawe inyenyeri eshanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza