U Rwanda, Uganda na Kenya biyemeje gufatanya kumenyekanisha ubukerarugendo

Yanditswe na Philbert Girinema
Kuya 3 Ugushyingo 2016 saa 09:52
Yasuwe : XX
0

U Rwanda, Uganda na Kenya byemeranyije gufatanya mu kumenyekanisha isoko bifite mu bukerarugendo, igikorwa cyemeranyijweho nyuma y’uko ibi bihugu bimaze imyaka hafi itatu koresha viza imwe y’ubukerarugendo.

Iyi Viza yatangiye gukoreshwa muri Mutarama 2014, aho umukerarugendo yishyura $100 agahabwa ubwo burenganzira bwo kumara iminsi 90 mu Rwanda, Uganda na Kenya.

Ikinyamakuru The Independent cyatangaje ko muri iyi gahunda nshya yemeranyijweho, ibi bihugu bitatu bizajya bifatanya mu kumenyekanisha ahantu nyaburanga bifite habereye ubukerarugendo, mu kureshya ababisura benshi ngo byongere n’inyungu bikura mu bukerarugendo.

Iyo gahunda ikazatangirira mu imurikagurisha ry’ubukerarugendo rya World Travel Market Expo, rizabera i Londres mu Bwongereza, mu cyumweru gitaha.

Mu kiganiro n’abanyamakuru, Minisitiri Ushinzwe Ubukerarugendo muri Uganda, Godfrey Kiwanda Ssuubi, kuri uyu wa Gatatu yavuze ko nk’igihugu cye cyakunze gusigara inyuma mu kumenyekanisha ubukerarugendo.

Ati “Turi gukoresha visa imwe kuri ba mukerarugendo. Ku nshuro ya mbere, twiyemeje kumenyekanisha ubukerarugendo bwacu dufatanyije.’’

Kuva mu mwaka wa 2007, ubukerarugeno buza ku isonga mu kwinjiza amadevise menshi mu Rwanda, aho mu mwaka ushize bwinjije miliyoni $326,6 , akaba yariyongereyeho 10% ugereranyije n’ayabonetse mu 2014, ariko u Rwanda rugashaka ko buzamuka nibura 25% buri mwaka.

Aya mafaranga yinjizwa mu bukerarugendo anafasha mu iterambere ry’abaturiye ibice bikorerwamo ubukerarugendo, kuko politiki y’ubukerarugendo mu Rwanda igenera 5% by’amafaranga yinjijwe, ibikorwa by’iterambere ry’abaturage baturiye Pariki z’igihugu.

Pariki y'igihugu y'ibirunga ni imwe mu zizana ba mukerarugendo benshi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza