Umujyi wa Kigali, Radisson Blu na RwandAir mu bihatanira ibihembo mpuzamahanga

Yanditswe na Mukaneza M.Ange
Kuya 12 Nyakanga 2017 saa 09:57
Yasuwe :
0 0

Umujyi wa Kigali, Sosiyete Nyarwanda itwara abantu n’ibintu mu ndege, RwandAir na Radisson Blu and Convention Center, byashyizwe mu byiciro bitandukanye by’ibigo n’ahantu hahatanira ibihembo mpuzamahanga bitangwa na World Travel Awards.

Ibihembo bya Wolrd Travel Agency bigamije kumenya no gushimira abakoze neza hirya no hino ku isi, mu byiciro bitandukanye birimo ingendo, ubukerarugendo no kwakira abantu.

Umujyi wa Kigali uri guhatanira ibihembo mu cyiciro cy’ahantu heza habereye kwakira inama (Africa’s Leading Meeting & Conference Destination 2017), mu gihe RwandAir iri guhatana mu byiciro bine bigaragaza sosiyete itwara abantu mu ndege ihiga izindi muri Afurika (Africa’s Leading Airline - Business Class 2017, Africa’s Leading Airline - Economy Class 2017, Africa’s Leading Airline 2017, na Africa’s Leading Airline Brand 2017).

Radisson Blu Hotel and Convention Center nayo irahatanira ibihembo bitanu birimo hotel nziza yakira inama (Africa’s Leading Conference Hotel 2017), Ikigo kibereye kwakira inama (Africa’s Leading Meetings & Conference Centre 2017), hotel nshya (Africa’s Leading New Hotel 2017) ,hotel y’ubucuruzi mu Rwanda ( Rwanda’s Leading Business Hotel 2017) na hotel ihiga izindi mu Rwanda (Rwanda’s Leading Hotel 2017).

Uretse ibi kandi hari n’Ikibuga Mpuzamahanga cya Kigali gihatanira igihembo mu bibuga bihiga ibindi muri Afurika (Africa’s Leading Airport 2017), Ikigo cy’Igihugu cy’Iterambere, RDB, kiri guhatana mu bigo biteza imbere ubukerarugendo (Africa’s Leading Tourist Board 2017), ndetse na Virunga Lodge ihatanira ibihembo mu macumbi agezweho (Africa’s Leading Luxury Lodge 2017).

Ibi bihembo bitangwa buri mwaka bitangirwa mu bihugu bitandukanye hagendewe ku turere biherereyemo, nyuma hakaba ibirori nyamukuru, aho ku rwego rwa Afurika biteganyijwe kubera muri Radisson Blu Hotel i Kigali, tariki ya 10 Ukwakira 2017.

Umuyobozi w’ishami rishinzwe ubukerarugendo muri RDB, Belise Kariza yabwiye The New Times ko ari iby’agaciro gakomeye kuba u Rwanda rwatoranyijwe kuzakira ibi birori bizaba bigiye kuba ku nshuro ya 24.

Ati “Turishimye cyane ndetse tuniteguye kwakira ibirori bya World Travel Awards 2017, by’umwihariko kubera umubare munini w’abashyitsi bavuye hirya no hino ku isi bazagira amahirwe yo kugirira mu Rwanda ibihe byiza umuntu agira rimwe mu buzima.”

Umuyobozi Mukuru wa Radisson Blu Hotel and Convention Center, Denis Dernault, nawe yagaragaje ko ari ibintu byo kwishimira kuba batangiye guhatanira ibihembo mu byiciro bitanu bitandukanye kandi bamaze umwaka umwe gusa batangiye gukora, bikaba bishimangira ubushake bw’abakozi mu guharanira gutanga serivisi zinoze.

Yakomeje kandi avuga ko banejejwe no kwakira ibirori bya World Travel Awards, bifatwa nka kimwe mu bikorwa birebana n’ingendo no kwakira abantu bikomeye ku isi.

Biteganyijwe ko amatora azarangira tariki 21 Kanama, uwifuza gutora akaba anyura kuri www.worldtravelawards.com.

Umujyi wa Kigali uri guhatanira ibihembo mu cyiciro cy’ahantu heza habereye kwakira inama (Africa’s Leading Meeting & Conference Destination 2017)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza