Umunyarwandakazi yagizwe umuyobozi mu ishami rya Loni rishinzwe ubukerarugendo

Yanditswe na Jean Pierre Tuyisenge
Kuya 29 Nzeri 2017 saa 11:33
Yasuwe :
6 0

Rosette Chantal Rugamba yagizwe umwe mu bagize komite ishinzwe kugenzura imikorere y’Ishami ry’Umuryango w’Abibumbye ryita ku bukerarugendo (WCTE).

Mu itangazo riri ku rubuga rw’iryo shami, World Tourism Organization- UNWTO, rivuga ko mu nama yabereye mu mujyi wa Chengdu mu Bushinwa, abari bagize komite ya WCTE biyongereyeho Umunyarwandakazi.

Rivuga ko mu rwego rwo gushyigikira imikorere yarwo, Inteko rusange ya UNWTO yafashe icyemezo cyo kongerere manda abagize WCTE, ikazagera mu 2021.

Abari muri iyo komite byari biteganyijwe ko bazasoza manda yabo mu 2019.

Rosette Chantal Rugamba ni we mushya winjiye muri iyi komite ifite manda y’imyaka ine yatangiye gukora ku wa 17 Nzeri 2017.

Rosette Rugamba umaze imyaka igera muri 20 akora mu bijyanye n’ubukerarugendo ni Umuyobozi mukuru w’ikigo “Songa Africa” gitwara ba mukerarugendo mu Rwanda; ni n’Umuyobozi mukuru wa ‘Amakoro Lodge’.

Ibikorwa bye mu rwego rw’ubukerarugendo yabitangiriye mu Bwongereza mu kigo gitwara abantu mu bihugu bitandukanye by’i Burayi cyitwa “Euro star”, aza no kuba umuyobozi ushinzwe kwamamaza ibicuruzwa mu kigo cy’indege cy’Abongereza muri Uganda no muri Centrafrique.

Aje mu Rwanda yagizwe Umuyobozi mukuru w’Ikigo cyari gishinzwe guteza imbere ubukerarugendo (ORTPN), aza no kugirwa Umuyobozi wungirije w’Ikigo cy’igihugu cy’iterambere (RDB).

Rosette kandi ni umwe mu bagize ishami ry’abagore mu Rugaga rw’abikorera mu Rwanda (PSF) akaba n’umwe mu bagize inama y’ubutegetsi y’Umuryango ubungabunga urusobe rw’ibinyabuzima “African Parks Network”.

Rosette Rugamba yanakoraga nk’umujyanama w’Umunyamabanga Mukuru w’Ishami ry’Umuryango w’Abibumbye ryita ku bukerarugendo,UNWTO.

Rosette Chantal Rugamba wagizwe umuyobozi muri UNWTO

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza