Umwana w’ingagi yitwa Icyamamare yatangiye gushakirwa izina binyuze kuri National Geographic

Yanditswe na Ishimwe Israel
Kuya 30 Kanama 2019 saa 01:30
Yasuwe :
0 0

Mu gihe hitegurwa umuhango wo Kwita Izina, Shene ya Televiziyo y’Abanyamerika “National Geographic” yatangije itora rigamije guhitamo izina ry’umwana w’ingagi yitwa Icyamamare binyuze ku mbuga nkoranyambaga zayo.

Mu Rwanda bimaze kumenyerwa ko buri mwaka, abana b’ingagi zo mu Birunga bahabwa amazina mu birori bizwi nko “Kwita Izina” bibera mu Kinigi mu Karere ka Musanze.

Umuhango wo “Kwita Izina” abana b’ingagi 25 ku nshuro yawo ya 15, uteganyijwe ku wa 6 Nzeri 2019.

Ikigo cy’Igihugu cy’Iterambere (RDB) kuri iyi nshuro kibinyujije muri gahunda ya Visit Rwanda cyasabye abakurikira imbuga nkoranyambaga za National Geographic ubufasha bwo guhitamo izina ry’umwana umwe mu bazahabwa izina uyu mwaka.

Abakoresha imbuga nkoranyambaga bashobora guhitamo izina ryabanyuze muri abiri yashyizwe ku nkuta za Facebook na Twitter za National Geographic.

National Geographic ikurikirwa n’abantu miliyoni 23 n’ibihumbi 200 kuri Twitter yasabye abakunzi bayo guhitamo izina rimwe muri abiri arimo “Intego” na “Imyato” yatoranyijwe n’abayobora ba mukerarugendo basura ingagi, abazivura n’abandi bazikurikirana buri munsi.

National Geographic yanditse kuri Twitter yayo ko izina “Intego” rijyanye n’ubuzima bw’uwo mwana w’ingagi mu cyerekezo cy’u Rwanda cyo kubungabunga ibinyabuzima bigiye gukendera; “Imyato” ni izina riha icyubahiro abafashije u Rwanda mu iterambere rya gahunda zo kurinda urusobe rw’ibinyabuzima.

Uyu mwana w’ingagi uri gushakirwa izina avuka ku yitwa Icyamamare yo mu muryango wa Kwitonda ugizwe n’ingagi 34. Yavutse ku wa 1 Nyakanga 2018.

Abahitamo izina rizitwa uyu mwana bahawe amasaha 72 yo gutora; irizagira amajwi menshi rizatangazwa na Gafotozi w’inyamaswa zo mu gasozi wa National Geographic, Ronan Donovan, ku munsi nyirizina wo Kwita Izina.

Mu bandi bamenyekanye bazita amazina abana b’ingagi barimo Tony Alexander Adams wabaye kapiteni wa Arsenal FC; Umuholandi, Louis Van Gaal watoje Bayern Munich, Ajax Amsterdam, FC Barcelona, Ikipe y’Igihugu y’u Buholandi na Manchester United; umuhanzi ukomoka muri Amerika Ne-Yo; Meddy n’umubyinnyi w’icyamamare Sherrie Silver.

Kuva umuhango wo Kwita Izina watangizwa mu 2005, abana b’ingagi 281 bamaze guhabwa amazina.

National Geographic ni Televiziyo ibarizwa muri Amerika; izwi mu biganiro by’urusobe rw’ibinyabuzima, ibidukikije, siyansi, umuco n’amateka.

Isanzwe ikorana na Arsenal mu kumenyekanisha ubukerarugendo bw’u Rwanda. Ubufatanye bw’impande zombi buzageza mu 2021, buzibanda ku gukora inkuru zivuga ku byiza nyaburanga bigize ubukerarugendo bw’u Rwanda, aho zizajya zerekanwa kuri iyi televiziyo n’imbuga nkoranyambaga zayo.

Umwana w’ingagi yitwa Icyamamare yatangiye gushakirwa izina binyuze kuri National Geographic

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza