Hôtel des Mille Collines iri muri hoteli 10 zizwi cyane muri Afurika kubera ibyazibereyemo

Yanditswe na
Kuya 27 Kanama 2014 saa 11:44
Yasuwe :
0 0

Ikinyamakuru Jeune Afrique cyashyize ahagaragara urutonde rwa hoteli icumi mu Afurika zizwi cyane kubera ibyazibereyemo, ahagaragaramo na Hôtel des Mille Collines y’i Kigali.
Uru rutonde rwakozwe hakurikijwe ko izi hoteli zaba zarabereyemo ibintu bitandukanye nko kurasana, kuba harabereyemo amateka atavugwaho rumwe, kuba harasinyiwemo ihagarikwa ry’intambara, n’ibindi. Muri izi hoteli kandi harimo izatumye bamwe bakora mu nganzo bakandika ibitabo, filime. Hari zimwe muri zo kandi zakuruye (...)

Ikinyamakuru Jeune Afrique cyashyize ahagaragara urutonde rwa hoteli icumi mu Afurika zizwi cyane kubera ibyazibereyemo, ahagaragaramo na Hôtel des Mille Collines y’i Kigali.

Uru rutonde rwakozwe hakurikijwe ko izi hoteli zaba zarabereyemo ibintu bitandukanye nko kurasana, kuba harabereyemo amateka atavugwaho rumwe, kuba harasinyiwemo ihagarikwa ry’intambara, n’ibindi. Muri izi hoteli kandi harimo izatumye bamwe bakora mu nganzo bakandika ibitabo, filime. Hari zimwe muri zo kandi zakuruye bamwe mu bikomerezwa byo ku Isi bigatuma zikomeza kuba ibirango bya Afurika.

Sofitel Legend Old Cataract i Assouan (Misiri)

Yubatswe mu 1899 n’Umwongereza Thomas Cook. Ifite inyenyeri eshanu n’ibyumba 138 hamwe na 82 byakira abantu bakomeye. Ni ho hakiniwe filime yiswe Mort sur le Nil yakomotse ku gitabo cy’umwanditsi Agatha Christie ndetse iyi hoteli irimo icyumba cyamwitiriwe. Abayobozi bakomeye nka François Mitterrand na Winston Churchill bajyaga baruhukira muri iyi hoteli ndetse n’abandi batandukanye.

Sofitel Winter Palace i Louxor (Misiri)

Ni hoteli y’inyenyeri 5 n’ibyumba 92 na 6 byakira abantu bakomeye yubatswe n’Abongereza mu 1886. Mu gihe cy’ubukonje ni ho umuryango w’umwami wa Misiri wabaga utuye. Iyi hoteli kandi yakunze kwakira abayobozi bakomeye mu bya politike ku isi barimo Anouar el-Sadate, Georges Clémenceau, Winston Churchill, Valéry Giscard d’Estaing na Margaret Thatcher.

Hôtel des Mille Collines y’i Kigali (Rwanda)

Iyi hoteli y’inyenyeri enye ifite ibyumba 112, yubatswe mu 1973, yagurwa mu 1987. Hôtel des Mille Collines yahungiyemo abantu 1 268 mu gihe cya Jenoside yakorewe Abatutsi mu 1994. Hollywood yayikozeho filime izwi nka Hotel Rwanda yatunganyijwe na Terry George mu 2004. Uwatanze amakuru y’uko byagenze muri icyo gihe iyi hoteli yakira impunzi, Paul Rusesabagina ari we wari umuyobozi wungirije w’iyi hoteli ntavugaho rumwe n’abayirokokeyemo kuko bamushinja gushaka kubyuririraho ngo yiyite intwari.

La Mamounia y’i Marrakech (Maroc)

Ubwo mu kinyajana cya 18 umwami Sidi Mohammed Ben Abdallah yahaga abahungu be impano z’ubukwe bwabo, ubusitani bwahawe uwitwa Mamoun nibwo bwakunzwe cyane ari naho izina ryatumye iyi hoteli imwitirirwa. Kugeza ubu iyi hoteli ikunzwe kuruhukiramo ibikomangoma bitandukanye hamwe n’abakinnyi ba sinema batandukanye ndetse n’abaririmbyi. Hari filime zitandukanye zahakiniwe zirimo iyitwa “L’homme qui en savait trop” ya Alfred Hitchcock yakinwe mu 1954.

Sofitel Hôtel Ivoire, y’i Abidjan (Côte d’Ivoire)

Iyi hoteli ifatwa nk’iya mbere ihenze muri Afurika izwiho kuba yarakiriye ibikomerezwa bitandunye nka Michael Jackson, Barry White na Stevie Wonder. Ubushyamirane bwa politike bwo mu 1990 bwatumye iyi hoteli isubira irudubi. Mu 1999, kudeta ya General Guéï yakurikiwe n’ubutegetsi bwa Laurent Gbagbo nyuma y’umwaka, byatumye nta muntu wari ukigana iyi hoteli. Tariki 9 Ugushyingo 2004, iyi hoteli yabayemo kurasana ubwo Abafaransa barasaga ku bantu mu buryo butavugwaho rumwe kugeza ubu.

Yagiye irushaho guta agaciro isigara yitabirwa n’inshuti za hafiz a Perezida Gbagbo n’ingabo gusa, kugeza ifunze imiryango mu 2009. Nyuma y’imyaka ibiri itunganywa, iyi hoteli yongeye gufungura imiryango mu 2011, ari naho Perezida Gbagbo yarahiriye mu cyumba cy’inteko kiri muri iyi hoteli.

Saxon Hôtel y’i Johannesburg (Afurika y’Epfo)

Iba mu gace gakize ka Sandton mu majyaruguru y’umujyi wa Johannesbur. Izwi cyane kubera ko ari ho Nyakwigendera Nelson Mandela yabaye igihe kitari gito. Ubwo yayivagamo, yahise yandika igitabo yise “Long Walk to Freedom”.

Elsa’s Kopje, yo muri Pariki ya Meru (Kenya)

Yafunguye mu 1999 kandi amateka yayo afite aho ahuriye n’Umwongereza George Adamson bakundaga kwita "Baba ya Simba" wamaze ubuzima bwe bwose muri Kenya. Joy, umugore w’uyu mugabo yanditse igitabo yise "Born Free" cyatumye amenyekana cyane. Iki gitabo cyakinweho filime mu 1966 yahawe ibihembo bitandukanye ku isi.

Victoria Falls Hotel (Zimbabwe)

Yubatswe mu 1906 ubwo hari umushinga wo kubaka umuhanda wa gari ya moshi uhuza Cap Town na Cairo. Yakiriye inshuro nyinshi umuryango w’ubwami bw’u Bwongereza n’umwamikazi Elizabeth II akiri igikomangomba yaraharuhukiye.

Hôtel de La Poste y’i Saint-Louis (Sénégal)

Mu 1850, iyi hoteli yakiriye umupilote wari ukomeye w’Umufaransa witwa Jean Mermoz. Tariki 12 Gicurasi 1930, uyu mupilote ni we wakoze urugendo rwa mbere rwo gutwara amabaruwa ajya muri Brezil avuye i Saint-Louis.

Hôtel Treetops (Kenya)

Ubwo tariki 5 Gashyantare 1952 igikomangoma Elizabeth yari mu kwezi kwa buki n’umugabo we, Umwami George VI w’u Bwongereza wari urwaye yahise atanga. Bityo Elizabeth yahise aba umwamikazi aba Elizabeth II. Icyumba yari acumbitsemo kugeza ubu cyahawe izina rya “Princess Elizabeth". Inyandiko z’ibinyamakuru by’icyo gihe ndetse n’amabaruwe y’i bwami y’icyo gihe yose kugeza ubu biboneka muri iyi hoteli.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza