Nyamagabe: Ishuri ry’ubukerarugendo ryitezweho byinshi mu kongera ubukungu bw’igihugu

Yanditswe na Rene Anthere Rwanyange
Kuya 27 Nzeri 2013 saa 12:40
Yasuwe :
0 0

Ishuri rikuru rya Kitabi ryigisha iby’ubukerarugendo bwa za Pariki no kubungabunga urusobe rw’ibinyabuzima “Kitabi College of Concervation and Environment Management-KCCEM” ryafunguye ku mugararo, nyuma y’igihe ryari rimaze ritanga ubumenyi mu myaka ibiri ya Kaminuza (Diploma). Igikorwa cyitabiriwe n’Umunyamabanga wa Leta muri Minisiteri y’Uburezi ushinzwe amashuri y’imyuga n’Ubumenyi ngiro.
Umunyamabanga wa Leta ushinzwe amashuri y’imyuga n’ubumenyi ngiro muri Minisiteri y’Uburezi, Eng. (...)

Ishuri rikuru rya Kitabi ryigisha iby’ubukerarugendo bwa za Pariki no kubungabunga urusobe rw’ibinyabuzima “Kitabi College of Concervation and Environment Management-KCCEM” ryafunguye ku mugararo, nyuma y’igihe ryari rimaze ritanga ubumenyi mu myaka ibiri ya Kaminuza (Diploma). Igikorwa cyitabiriwe n’Umunyamabanga wa Leta muri Minisiteri y’Uburezi ushinzwe amashuri y’imyuga n’Ubumenyi ngiro.

Umunyamabanga wa Leta ushinzwe amashuri y’imyuga n’ubumenyi ngiro muri Minisiteri y’Uburezi, Eng. Albert Nsengiyumva ushinzwe amashyuri y’imyuga, yagize ati “ni igikorwa gishimishije kijyanye na gahunda yo kurwanya ubukene, twese tuzi uruhare rw’ubukerarugendo mu bukungu bw Igihugu, ni bwo bwa mbere bwinjiza amafaranga y’amahanga.ˮ

Yakomeje avuga ko Minisiteri y’uburezi itazabatererana. Ati “Tubijeje ubufatanye n’inkunga yose, kugira ngo ibikorwa twasuye bikomeze bitere imbere, bityo n’abatuye aka gace habe ingaruka zigaragara mu iterembere ryabo.Twifuza ko iki kigo kiba ikigo mpuzamahanga, tuzamure umubare w’abasura u Rwanda; dusarure ubukungu.”

Umuyobozi wa KCCEM, Nasasira Richard, yavuze ko iri shuri rifite gahunda n’ibikorwa byinshi byo kwagura, bityo rikazaba icyitegererezo mu karere mu gutanga ubumenyi no mu kubungabunga ibidukikije n’urusobe rw’ibinyabuzima n’amapariki, hatezwa imbere ubukerarugendo.

Nasasira yagize ati “icyifuzo cyo gutangiza iri shuri cyatangiye mu 2006, mu 2008 hatangira ikiciro cyambere abiga amasomo y’igihe kigufi n’igihe kirerekire. Mu gihe cy’imyaka ine twahuguye abanyeshuri 800, ubu dufite gahunda yo guhugura benshi baba mu cyiciro kigufi n’ikirere.”

Rica Rwigamba umuyobozi ushinzwe ubukerarugendo mu kigo cy’Igihugu Cy’Iterambere (RDB), yavuze ko gahunda y’umunsi mukuru w’ubukerarugendo yahuriyemo ibikorwa byinshi. Ati “twaje kwifatanya namwe, ni ikimenyetso cy’uko mushishikazwa n’uko ibidukikije bibungwabungwa, n’iterambere ry’ ubukerarugendo rikiyongera. Iri shuri ryagiyeho mu gukomeza imicungire y’ ibidukikije n’urusobe rw’ibinyabuzima. Iri shuri ryafashijwe na DWA mu kunoza imfashanyigisho mu guteza imbere ubukerarugendo, twishimiye ko rizatanga umusaruro mwiza mukarere.”

Guverineri w’intara y’Amajyepfo, Alphonse Munyentwari, yavuze ko iri shuri rifite uruhare mu kubungabunga ibidukikije no guteza imbere ubukerarugendo. Ati “iyo umwana yavutse, uruhererekane n’indangagaciro n’imibereho bitangwa n’umurera. Mugiye gutanga indangagaciro mu kubungabunga urusobe rw’ibinyabuzima, ibidukikije no guteza imbere ubukerarugendo mu Karere.”

Iri shuri ryatashywe mu gihe u Rwanda n’Isi yose bizizihiza umunsi mpuzamahanga w’ubukerarugendo ku wa 27 Nzeri.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza