U Buholandi: U Rwanda rwasoje imurikagurisha ry’ubukerarugendo 2015

Yanditswe na

Karirima A, Ngarambe

Kuya 19 Mutarama 2015 saa 08:30
Yasuwe :
0 0

Ambasade y’u Rwanda mu Buholandi ifatanije n’Ikigo cy’Igihugu cy’Iterambee mu Rwanda RDB (Rwanda Development Board) basoje iserukiramuco ry’ubukerarugendo rizwi ku izina rya “Vacantie Beurs 2015” mu Mujyi wa Utrecht.
Icyo gikorwa ngarukamwaka cyatangiye tariki ya 13 Mutarama cyarangiye ku Cyumweru tarikiya 18 Mutarama 2015.
IGIHE.com yagiranye ikiganiro na Amb. Jean Pierre Karabaranga Uhagarariye u Rwanda muri iki gihugu, agaragaza uko icyumweru cy’iri murikagurisha u Rwanda rwitabiriye ku (...)

Ambasade y’u Rwanda mu Buholandi ifatanije n’Ikigo cy’Igihugu cy’Iterambee mu Rwanda RDB (Rwanda Development Board) basoje iserukiramuco ry’ubukerarugendo rizwi ku izina rya “Vacantie Beurs 2015” mu Mujyi wa Utrecht.

Icyo gikorwa ngarukamwaka cyatangiye tariki ya 13 Mutarama cyarangiye ku Cyumweru tarikiya 18 Mutarama 2015.

IGIHE.com yagiranye ikiganiro na Amb. Jean Pierre Karabaranga Uhagarariye u Rwanda muri iki gihugu, agaragaza uko icyumweru cy’iri murikagurisha u Rwanda rwitabiriye ku nshuro ya munani ryagenze.

U Rwanda rwitabiriye iri murika ku nshuro ya munani

Amb. Karabaranga yagize ati “Twitabira iki gikorwa mu rwego rwo kwereka amahanga ko igihugu cyacu ubu ari cyo kigezweho mu gusurwa, ibi kandi si amakabya nkuru kuko aha turi haduha uburyo bwo kuganira n’abantu benshi tukababwira aho u Rwanda rugeze rwiyubaka kandi ko u Rwanda ari igihugu ubu kizewe ku mutekano w’abaturage bacyo n’abagisura, aho kiza mu bihugu bya mbere muri Afurika bifite umutekano wizewe."

Stand y'u Rwanda iri muzanejeje abanyamahanga inasurwa cyane

Amb. Karabaranga yakomeje avuga ko avuga ko iri murika gurisha kuryitabira ari byiza kuko hahurira abantu benshi aho mu minsi ine ishize ryari ryasuwe n’abantu bari hagati y’ibihumbi180 na 200.

Yashimye RDB ibafasha by’intangarugero ikabagenera mu ngengo y’imari yabo amafaranga n’ibindi bikoresho bidufasha mu kuzuza izi nshingano muri iki gikorwa gihesha isura nziza kandi kikamamaza ibyiza bitatse u Rwanda, ati "Sinakwibagirwa kandi gushimira abikorera ku giti cyabo baza kumurika ibyo bakora bijyanye n’ubukerarugendo."

Amb. Karabaranga kandi yakomeje ashishikariza n’abandi bose babishobora kujya baza muri iki gikorwa ngarukamwaka.

Greg Bakunzi umwe mu baturutse mu Rwanda Ahagarariye Ikigo cy’Ubukerarugendo "Amahoro Tours", yagize ati “Ubu bubaye inshuro ya gatanu nitabira iri murikagurisha, ati ariko uko nje ngenda nungutse byinshi kandi menyanye na benshi tuba twahanye amakuru yuko basura u Rwanda.”

Bakunzi akomeza avuga ko ashimira Ambasade y’u Rwanda mu Buholandi uburyo ibafasha kubona ibyangombwa byose bakoresha iyo bahageze ashimira kandi RDB ukuntu gikomeje kubashishikariza kwiteza imbere no kubashakira aho uburyo bwo kwerekana ibikorwa byabo haba mu mahanga cyangwa mu Rwanda.

Ingabire umwe mu Banyarwanda, batuye mu Buholandi ukunze kwitabira iki gikorwa yagize ati, “Dushimishwa cyane n’ubutumire Ambasade yacu hano mu Buholandi itugezaho, natwe tukaza kugira icyo dukora mu kwerekana aho tuva, kandi koko usanga Abanyaburayi babikunze, kenshi usanga iyo tubereka imbyino n’imihamirizo by’iwacu badashaka kugenda bigatuma banabaza ibibazo byerekeranye n’umuco wacu bikanshimisha cyane.”

Imbyino za Kinyaarwanda zasusurukije abanyamahanga

Bijoux na we utuye muri iki gihugu yagize ati “Jye ndashimira byimazeyo ubuyobozi bw’u Rwanda, kandi ubutumwa bundi natanga ni uko dukunda cyane Perezida wacu Paul Kagame uburyo ayoboye igihugu n’aho akigejeje ku buryo bugaragara, muzamutubwirire ko tumukunda kandi tumutegereje (kuzabasura igihe kimwe).”

Uyu mwaka ibigo by’abikorera byitabiriye iki gikorwa biturutsemu Rwanda ni Access Rwanda Safaris, Amahoro Tours na Mercator Assistance. Baherekejwe n’umukozi wa RDB, Linda Mutesi.

Muri iri huriro ahagenewe kumurikirwa ibibikorerwa mu Rwanda (stand) hagaragaye byinshi ibyiza bitatse u Rwanda, harimo n’intore n’ababyinnyi b’Abanyarwandakazi bazaba basusurutsa abitabiriye icyo gikorwa.

Abahageze kandi basogongezwaga icyayi n’ikawa by’u Rwanda, mu rwego rwo kumvikanisha uburyohe bwibyo bihingwa.

Na none kandi umuntu yashoboraga gutombora imwe mu matike y’indege yatanzwe na kompanyi nyarwanda y’indege "Rwandair" yo kujya mu Rwanda, mu guhatanira ayo matike hakoreshejwe Icyuma kinini gifata amafoto, aho batatu ba mbere bazaba batowe mu mafoto meza ya mbere aribo bazayahabwa ku buntu.

Ambasade y’u Rwanda mu Buholandi yerekana ko umubare w’Abakerarugendo baturuka muri iki gihugu ugenda urushaho kwiyongera buri mwaka aho Abaholandi basura u Rwanda baza ku mwanya wa 7 hatabariwemo abaturuka muri Afurika.

Ikindi kandi ni uko abagenderera u Rwanda baturutse mu Buholandi bongerewe uburyo bwo kuborohereza ingendo, hongerwa kompanyi z’indege zinyuranye nka KLM, Kenya Airways, Brussels Airlines, Ethiopia Airlines na Turkish Air.

iri murika ryitabiriwe ku buryo bugaragara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza