U Rwanda rwashyizwe ku rutonde rw’ahantu heza habereye gusurwa mu 2018

Yanditswe na IGIHE
Kuya 29 Ukuboza 2017 saa 11:34
Yasuwe :
0 0

Ibyishimo ni kimwe mu byangombwa nkenerwa ngo ubuzima bw’umuntu burusheho kugenda neza; ariko si buri cyose ku isi gitanga ibyishimo ndetse si ahantu hose wajya ngo utahe wishimye.

Abifuza kwishima mu mwaka wa 2018, baryoherwa n’ubwiza bw’ibyo Imana yaremye , CNN yabashyize igorora yerekana ahantu 18 ku isi ushobora gusura ugatahana ibyishimo muri uyu mwaka utaha.

Igihugu cyigeze kuba indiri y’umubabaro , uyu munsi kiri mu bya mbere ushaka umunezero n’ibyishimo ashishikarizwa gusura, akirebera Ingagi zo mu misozi ziboneka hake cyane ku isi, Intare n’Inkura ziherutse kuzanwa muri Pariki y’Akagera, agatembere muri Nyungwe ku kiraro cyo mu kirere, agacumbika mu mahoteli agezweho n’ibindi.

Icyakora si mu Rwanda honyine, hari ahandi CNN yagiriye inama abashaka kuryoherwa n’ubuzima kutazibagirwa kugera mu mwaka wa 2018.

Ibirwa bya Cape Verde

Ibi birwa biri ku nkengero z’Uburengerazuba bwa Afurika, bikunze gusurwa na ba mukerarugendo kubera ubwiza bw’umucanga wo ku nkengero za Atlantique ndetse n’umuco gakondo waho wihariye.

Ibirwa bya Cape Verde bizwiho umuziki gakondo, umucanga wo ku nkombe unogeye ijisho n'ibindi

Ibi birwa kandi bizwi ku muziki w’umwimerere harimo uzwi nka Morna ndetse n’imbyino zihariye.

Cape Verde kandi igirwa nziza n’ibirwa n’uturwa tunyanyagiye muri Atlantique, imisozi miremire muri utwo turwa n’ibindi.

Pariki Nkuru ya Batum Sakor muri Cambodge

Iyi pariki izwiho kugira ishyamba ry’inzitane ndetse n’ibyasti bitandukanye by’akataraboneka kandi bitoshye. Ni yo ibarizwamo inzovu nyinshi zo muri Aziya, amasumo, inyoni zidakunze kuboneka n’ibindi.

Nevis

Benshi bakunda ibihugu byo mu Nyanja ya Caraїbes ariko ntibazi ubwiza bw’ikirwa cya Nevis, inkomoko y’umunyapolitiki, umwe mu babyeyi ba Leta Zunze Ubumwe za Amerika, Alexander Hamilton.

Ubwiza bw'ikirwa cya Nevis, kuri gakondo y'ikirangirere muri politiki, Alexander Hamilton

Iki kirwa gifite ubwiza karemano ariko by’umwihariko ibiti by’imikindo bikizengurutse ndetse n‘ishusho nziza y’inyanja udashobora guheza n’amaso imbere yawe.

Banff, Canada

Aka ni agace kari muri Alberta muri Canada, kazwiho kugira Pariki ikuze kurusha izindi muri icyo gihugu, ifite imiterere karemano.

Abakunda kurira imisozi, kugendera ku rubura, umukino wo mu mazi uzwi nka Kayaking, Banff ni ho iwabo wabyo.

Banff muri Canada, iwabo w'imikino yo kugenda ku rubura

Utundi duce twinshi ushaka kwishimisha umwaka utaha yasura turimo Nagano mu Buyapani, Puebla muri Mexique, Essaouirra muri Maroc, Perth muri Australia, Ikirwa cya Crete mu Bugiriki, Pyeochang muri Koreya y’Epfo n’ahandi.

Asheville muri Carolina ya Ruguru
Cajamarca muri Peru, umujyi uzwiho kugira insengero zubatse mu buryo bwihariye
Crete mu Bugiriki
Essaouira muri Maroc, ku cyambu cya kera ureba neza inkombe za Atlantique
Ibirunga by'u Rwanda, ingagi zibituyemo n'ibindi bishishikarizwa ba mukerarugendo umwaka utaha
Imisozi myiza ya Yunnan mu Bushinwa
Lisbon, Umurwa mukuru wa Portugal uzwiho kugira inzu zifite ubwiza n'ibindi binyuranye
Malta, ikirwa kiri hagati ya Tunisia n'u Butaliyani
Nagano mu Buyapani, iwabo w'amakaroni yo mu bwoko bwa Soba ndetse n'amahoteli agezweho
Pariki ya Botum Sakor icumbikiye ibimera gakondo byinshi n'ishyamba ry'inzitane ritoshye
Pert muri Australia naho ni hamwe mu ho wasura muri uyu mwaka ugiye kuza
Peubla muri Mexique hazwiho umwihariko w'ibiribwa gakondo ndetse n'ubugeni ni hamwe wasura muri 2018
Pyeongchang muri Koreya y'Epfo, Umujyi uzakora imikino olempike y'itumba umwaka utaha
Tala National Park muri Serbia, hamwe mu hatangiye gukurura ba mukerarugendo muri iyi minsi
Umujyi w'ibirori, New Orleans umwe mu ibereye gusurwa mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza