Abantu ibihumbi 241 basuye Ingoro z’umurage w’u Rwanda mu mwaka umwe

Yanditswe na Ferdinand Maniraguha
Kuya 22 Ugushyingo 2018 saa 10:29
Yasuwe :
0 0

Ikigo cy’Ingoro z’umurage w’u Rwanda cyatangaje ko umwaka ushize w’ingengo y’imari, abantu 241 882 basuye ingoro zitandukanye ziri mu gihugu.

U Rwanda rufite ingoro umunani z’umurage w’u Rwanda ziherereye mu bice bitandukanye by’igihugu.

Mu kiganiro Umuyobozi w’Ingoro z’Umurage w’u Rwanda, Amb Robert Masozera yagiranye na Televiziyo y’u Rwanda, yavuze ko buri mwaka abasura izo ngoro bagenda biyongera.

Masozera yavuze ko igishimishije ari uko umubare munini w’abasura izo ngoro ari abanyarwanda kuko bari ku kigero cya 83 %. Muri abo banyarwanda, 80 % ni urubyiruko.

Icyakora, Masozera avuga ko uwo mubare udahagije ugereranyije n’abaturage u Rwanda rufite.

Ati “Uwo mubare wavuye ku bantu ibihumbi 180 ku mwaka wari wabanje. Ni umubare ugenda uzamuka ariko ugereranyije n’umubare w’abanyarwanda muri rusange, ntabwo abanyarwanda bari bitabira ari benshi.”

Masozera yakanguriye abashoramari kuyishora mu bijyanye n’umurage w’u Rwanda kuko hakiri icyuho.

Yavuze ko 70 % by’amafaranga abasura Ingoro z’umurage w’u Rwanda baba bafite bayasubizayo kuko nyuma yo gusura nta kindi bashobora kuyakoresha kijyanye n’ibyo baba baje kureba.

Ati “Abacuruzi turifuza ko babibonamo amahirwe yo gukora ubucuruzi bwabo kuko abantu ibihumbi 241 ni isoko kandi imibare dufite y’amafaranga asigara ntabwo ari myiza. Tumaze kubona ko amafaranga menshi yinjira, 30 % yonyine niyo asigara mu ngoro ndangamurage andi bakayusubizayo.”

Ingoro y’amateka y’urugamba rwo kubohora igihugu niyo isurwa cyane nyuma yo gutangizwa umwaka ushize, ikurikirwa n’Ingoro y’Imibereho y’abanyarwanda i Huye, Ingoro y’Abami i Nyanza n’Ingoro y’Ubugeni n’ubuhanzi yahoze yitwa iy’abaperezida iri i Kigali.

Izindi Ngoro u Rwanda rufite zirimo iy’Ibidukikije i Karongi, iy’urugamba rwo kwibohora iri ku Mulindi wa Byumba n’ingoro y’ubukorikori ya Rwesero mu Karere ka Nyanza.

Gusura Ingoro z’umurage w’u Rwanda abana n’abanyeshuri bishyura 700 Frw, abakuru bishyura 1500 Frw , abo muri Afurika y’Iburasirazuba bishyura 3000 Frw naho abandi banyamahanga bakishyura 6000 Frw.

Abanyarwanda nibo benshi mu basura Ingoro z'Umurage w'u Rwanda
Umuyobozi w’Ingoro z’Umurage w’u Rwanda, Amb Robert Masozera avuga ko uyu mubare udahagije ugereranyije n'abatuye u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza