Dutemberane ingoro ndangamurage zibumbatiye umuco gakondo w’u Rwanda (Video)

Yanditswe na Ishimwe Israel
Kuya 17 Gicurasi 2019 saa 11:25
Yasuwe :
0 0

Tariki ya 18 Gicurasi buri mwaka, Isi yizihiza Umunsi Mpuzamahanga wahariwe Ingoro Ndangamurage, hazirikanwa amateka n’imibereho y’abakurambere.

U Rwanda nk’igihugu cyubakiye ku muco w’abagihanze narwo rwifatanya n’amahanga mu kwizihiza uwo munsi, wumvikanisha agaciro ko guhererekanya amateka no guteza imbere umuco.

Iyo utambagiye urwa Gasabo, ubona ibyiza nyaburanga birimo uruhurirane rw’ibimera n’inyamaswa uruhumbirajana zirimo n’ingagi zo mu misozi zizihira ba mukerarugendo.

Ibi byiyongeraho ingoro ndangamurage zishyinguyemo ubukungu bw’umuco w’abenegihugu n’amateka yacyo kuva kuri Gihanga Ngomijana wahanze u Rwanda rugahamya igitinyiro.

Ingoro ndangamurage zashyizweho mu gusigasira amateka n’umuco by’igihugu no gufasha abazadukomokaho kuyigiraho. U Rwanda rufite ingoro umunani zibumbatiye umurage n’amateka ku mibereho y’abarutuye, imyemerere, imibereho gakondo, imyidagaduro, imyambarire, imiziro n’imiziririzo, amateka y’abami, ubukoloni n’ibindi.

Unyuze mu marembo y’Umurwa wa Kigali ku bayinjiyemo baciye inzira y’ikirere, uhasanga Ingoro y’Ubugeni n’Ubuhanzi iherereye i Kanombe mu nyubako y’amateka, yacumbikiye abaperezida babiri bayoboye u Rwanda barimo Habyarimana Juvénal wahabaye kugeza mu 1994 na Pasiteri Bizimungu wahabaye mu 1994-2000.

Kuva mu 2003, iyi nyubako yakoreshwaga n’Ikigo cy’Ingoro z’Igihugu z’Umurage w’u Rwanda (INMR) nk’Ingoro y’Abaperezida kugeza ku wa 18 Gicurasi 2018 ubwo yahindukaga iy’Ubugeni n’Ubuhanzi.

Iyi kandi si yo ngoro ya mbere y’ubugeni n’ubuhanzi, kuko guhera mu 2006 kugeza mu 2018, yari isanzwe ku Rwesero i Nyanza, mu nyubako y’amateka y’Umwami Mutara III Rudahigwa.

Iyi ngoro ya Rudahigwa ni inyubako yera, igizwe n’inzu ebyiri zigerekeranye. Yari isanzwe ibarizwamo ibihangano mberajisho bibaje mu biti, mu byuma, ibishushanyije, ibibumbano, ibyomekano n’ibindi bitandukanye byose bisaga 300.

Biteganyijwe ko izahindurwa iy’Amateka y’Ukwigira kw’Abanyarwanda. Mu Ngoro y’Ubuhanzi n’Ubugeni, kuri ubu hamurikirwa ibihangano n’ibikorwa by’abanyabugeni ndetse hanafunguriwe abaturage benshi, bahasura buri munsi.

I Kigali kandi habarizwa Ingoro y’Amateka y’Urugamba rwo Guhagarika Jenoside iri mu Nteko Ishinga Amategeko ku Kimihurura. Ahahoze hitwa CND [Conseil National pour le Développement].

Iyi ngoro iva imuzi urugendo rw’Ingabo za APR rwaganishije ku ihagarikwa rya Jenoside yakorewe Abatutsi mu 1994. Yatashywe ku wa 13 Ukuboza 2017.

Irimo ibihangano bigaragaza uko ubuyobozi bwatanze ubutabazi bw’ibanze ku barokotse Jenoside, uko abayikoze bahawe ubutabera n’inzira y’ubumwe n’ubwiyunge yo kubaka igihugu kitarangwamo amacakubiri.

Mu bilometero 10 uvuye ku Kibuga Mpuzamahanga cy’Indege cya Kigali, ugana mu mujyi rwagati, hari Ingoro y’Umurage yitiriwe Richard Kandt. Iherereye aho Dr. Richard Kandt, umudogiteri w’Umudage n’umushakashatsi waje mu Rwanda mu 1897 ashakisha isoko y’uruzi rwa Nile, yatuye.

Iyi ngoro yafunguwe mu Ukuboza 2004, yerekana amateka akomeye kuva ku gihe cy’Abakoloni b’Abadage mu Rwanda, ubuzima bw’abaturage na politiki y’imiyoborere. Hari n’imurika ry’ibikururanda nk’ingona, inzoka n’izindi nyamaswa zidasanzwe.

Usohotse muri Kigali ugana mu Majyepfo y’u Rwanda hari Ingoro y’Abami i Nyanza mu Rukari, yafunguwe muri Gicurasi 2008.

Yubatswe ari inzu y’Umwami Mutara III Rudahigwa watwaye u Rwanda mu 1931-1959. Yaje guhinduka ingoro y’amateka y’imibereho y’Abami bayoboye u Rwanda mu kinyejana cya 18.

Ingoro y’Abami igizwe n’ibice bitatu birimo inzu za Kinyarwanda zigaragaza uko abami ba kera babagaho, aho uwa nyuma wayituyemo ari Yuhi V Musinga.

Hari imurika ry’inyambo (inka z’intoranywa z’umubyimba mwiza n’amahembe maremare zanamurikirwaga umwami ); hari kandi n’inzu Umwami Mutara III Rudahigwa yabayemo kuva 1931- 1959. Hakurya gato ku gasozi ka Mwima hari umusezero utabarijweho Umwami Mutara III Rudahigwa, Umwamikazi Rosalie Gicanda n’Umwami Kigeli V Ndahindura.

Ukinjira mu Karere ka Huye hari Ingoro y’umurage y’Amateka y’Imibereho y’Abanyarwanda. Amarembo yayo atamirijweho amacumu, ashushanya uko Abanyarwanda ba kera bitabaraga, n’amahembe y’inka agaragaza agaciro k’inka mu muco nyarwanda.

Iyi ngoro imurika amateka y’imibereho ya buri munsi y’Umunyarwanda wa kera, abayisura bibonera ibikoresho bya kera bitagikoreshwa n’uburyo imibereho yagiye ihinduka.

U Rwanda nk’igihugu cyita ku kubungabunga urusobe rw’ibidukikije n’ibinyabuzima gifite Ingoro y’Ibidukikije mu Murenge wa Bwishyura mu Karere ka Karongi.

Iyo ngoro yafunguwe ku wa 16 Nyakanga 2015,yatangiranye imurika ku bijyanye n’ingufu n’urugendo rukorwa ngo zitange amashanyarazi.

Mu Ukwakira 2017, hashyizwemo irindi murika ry’amateka kamere, nk’inyamaswa zigaragara muri Pariki y’Akagera, ingagi n’ibirunga, amabuye y’agaciro agaragaza ubukungu bw’u Rwanda nka gasegereti, aluminium, coltan, wolfram n’ayandi.

Amoko atandukanye y'inyamaswa ziba mu Rwanda wayabona mu ngoro y'ibidukikije i Karongi

Imyaka isaga 29 ishize ivuze byinshi mu mateka y’u Rwanda no ku baturarwanda. Icyo gihe mu Ukwakira 1990, niho hari umuzi w’urugamba rwo kubohora igihugu.

Amateka yarwo n’uko rwatangiye amuritswe mu iri ku Mulindi w’Intwari mu Karere ka Gicumbi, mu bilometero umunani mu Majyaruguru ashyira Uburasirazuba bwa Kigali.

Iyo Ngoro irimo amateka ku rugendo rw’imyaka ine rwaganishije FPR Inkotanyi ku ntsinzi yo kubohora igihugu ku wa 4 Nyakanga 2019.

Inyungu mu gusura ingoro ndangamurage

Ingoro zisobanuye byinshi mu mibereho y’Abanyarwanda, buri wese akwiye gusobanukirwa kuko ubumenyi bw’amateka y’igihugu buhindura imyifatire n’imyumvire yabo. Amateka abarizwamo ni urwibutso n’inyigisho ku muryango mugari w’abaturagihugu n’abakigenda.

Abanyarwanda boroherejwe gusura ingoro ndangamurage ugereranyije n’abanyamahanga bazigana kuko abanyeshuri bishyura 700 Frw, abakuru akaba 1500 Frw.

Abo muri Afurika y’Uburasirazuba batanga 3000 Frw naho abandi banyamahanga bakishyura 6000 Frw. Aya mafaranga ashobora kwiyongera bitewe n’aho basuye n’ibindi bintu bashaka kureba.

Ba mukerarugendo ntibacikanwe!

Ikigo cy’Ingoro z’Igihugu z’Umurage w’u Rwanda (INMR) cyiyemeje gukusanya, kubika no gusigasira ubushakashatsi kigeza ku Banyarwanda nk’umuco bakwiye kubakiraho. Kiri mu bafatanyabikorwa mu iterambere ry’ubukungu bushingiye ku bukerarugendo.

Ntibitangaje ko ubumenyi buhishe mu ngoro ndangamurage butuma umukerarugendo akora urugendo rurerure aza kwiga amateka n’umuco izi ngoro zihatse.

Umunyamerika Rebecca Blake yakoze urugendo rw’ibilometero 11,343 ava i New York, aza gusura Ingoro y’Amateka y’Urugamba rwo guhagarika Jenoside.

Yabwiye IGIHE ko hari ibyo yungutse, atabonye mu bitabo by’amateka, avuga ko buri wese akwiye kwibonera. Yagize ati “Ni iby’agaciro ko abantu bakomeza kwiga aya mateka no kuyazirikana. Nahisemo gusura iyi ngoro ngo menye ukuri kw’ibyavugwaga ku Rwanda kuri Jenoside yakorewe Abatutsi. Nashakaga kureba uko rwashoboye guhangana n’ingaruka za Jenoside.”

Umusanzu w’Ingoro Ndangamurage ku burezi

Abasura ingoro ndangamurage bahaha ubumenyi bubafasha mu mibereho yabo ndetse bakabusangiza abandi mu gusigasira amateka n’umuco by’igihugu. Abarezi baganiriye na IGIHE nyuma yo gusura Ingoro yo kwa Richard Kandt bavuze ko bungutse ubumenyi bushya.

Uwineza Emmanuel wigisha mu Rwunge rw’Amashuri rwa Mukarange Catholique mu Karere ka Kayonza, yavuze ko yasobanukiwe neza ibyo yasomaga mu bitabo.

Yagize ati “Gusura ingoro ndangamurage bigufasha kumenya amateka yo ha mbere utanyuzemo n’umuhate abantu bagize ngo igihugu kigere ku ntsinzi. Byamfashije kureba icyo nakora mu gutegura imbere heza. Bizamfasha no kwigisha neza amateka nanjye nsobanukiwe.’’

Uyu mwarimu w’imyaka 28 yavuze ko “Urubyiruko rukwiye gushyira muri gahunda zarwo kumenya amateka no gusura ingoro ndangamurage.”

Mugenzi we Tuyambaze Enock wasuye ingoro ndangamurage bwa mbere, yahize kuzagaruka akongera agasogongera ku mateka.

Yagize ati “Nakuriye mu Rwanda ariko ntazi ko mu ngoro ndangamurage nahasanga ibyo abantu twumvaga hambere. Si ubwa nyuma mpaje ahubwo nzagaruka nitegereze, mbaze neza uruhererekane rw’amateka y’igihugu.”

U Rwanda ruritegura Umunsi Mpuzamahanga wahariwe Ingoro Ndangamurage wizihizwa ku wa 18 Gicurasi 2019; ufite insanganyamatsiko igira iti “Ingoro ndangamurage nk’igicumbi cy’umuco, ni ejo hazaza h’umurage gakondo.”

By’ umwihariko kuri uyu munsi, Ingoro Ndangamurage zose zizaba zifunguye ku bantu bose bifuza kuzisura, kwiga no kumenya amateka y’igihugu.

Ingoro y'abami mu Rukali ni imwe mu zisurwa cyane
Inka z'inyambo zitamirijwe imitako irimo Inkomo ifite incunda zitembera mu ruhanga n’igikubwe cyiri mu ijosi
Ingoro y’Umwami Mutara wa III Rudahigwa yubatswe n’Ababiligi mu mwaka wa 1932
Unyuze mu marembo y’Umurwa wa Kigali ku bayinjiyemo baciye inzira y’ikirere, uhasanga Ingoro y’Ubugeni n’Ubuhanzi iherereye i Kanombe mu nyubako y’amateka,
Mu ngoro y'Ubugeni n'Ubuhanzi i Kanombe uhasanga ibihangano bitandukanye by'abanyarwanda
Indaki Perezida Kagame yabagamo ku Mulindi mu gihe cy'urugamba rwo kubohora igihugu ni hamwe mu hakurura ba mukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza