Igikomangoma Harry cyagizwe Perezida wa African Parks, ikigo gicunga Pariki y’Akagera

Yanditswe na Rabbi Malo Umucunguzi
Kuya 27 Ukuboza 2017 saa 12:32
Yasuwe :
0 0

Ikigo gifatanya na guverinoma zitandukanye mu gucunga Pariki z’ibihugu n’ibyanya bibungabunzwe, African Parks, cyatangaje ko Igikomangoma cy’u Bwongereza, Henry Charles Albert David uzwi nka Prince Harry, ariwe wagizwe Perezida mushya wacyo.

Amakuru y’izi nshingano nshya yatangajwe bwa mbere kuri uyu wa Gatatu mu kiganiro cyatambutse kuri Radio 4 ya BBC, cyatunganyijwe na Prince Harry ubwe.

Prince Henry w’imyaka 33 ni umwe mu bagize umuryango w’ibwami mu Bwongereza, umuhungu muto w’ibikomangoma, Charles na Diana, akaba uwa gatanu ku ruhererekane rw’abashobora kuragwa ubutware mu Bwongereza.

Mu itangazo ryashyizwe ahagaragara n’Ibwami muri Kensington Palace, byatangajwe ko Prince Harry azakorana na African Parks mu gucunga pariki zitandukanye mu izina rya guverinoma z’ibihugu no guteza imbere ibungabungwa ry’urusobe rw’ibinyabuzima muri Afurika no ku Isi hose.

Umuyobozi Mukuru wa African Parks, Robert-Jan van Ogtrop, yavuze ko Prince Harry azakorana bya hafi n’inama y’ubutegetsi n’umuyobozi w’ikigo Peter Fearnhead.

Yakomeje agira ati “Azadufasha mu kumenyekanisha ibibazo bikomeye kandi byihutirwa urusobe rw’ibinyabuzima ruri guhura nabyo, ariko by’umwihariko, icyo abantu batandukanye batanga nk’umusanzu wabo,”

Mu 2009 nibwo African Parks yasinyanye amasezerano n’Ikigo cy’Igihugu cy’Iterambere (RDB) ashyiraho ikigo Akagera Management Company (AMC) gicunga Pariki y’Igihugu y’Akagera, maze mu 2010 gitangira imirimo gikuriwe n’inama y’ubutegetsi ihuriweho na RDB na African Parks.

Kuva icyo gihe ibikorwa byo gushimuta inyamaswa byaracyashywe ndetse zirakunda ziriyongera, ubu iyi pariki ikaba ibarizwamo amoko atanu y’inyamaswa zihagazeho kuri uyu mugabane arizo Intare, Inzovu, Ingwe, Imbogo n’Inkura.

African Parks yatangaje ko Prince Harry, yanafatanyije n’iki kigo muri Nyakanga 2016 muri Malawi, mu gikorwa cyo kwimura icyiciro cya mbere cy’inzovu 520 zagombaga kujyanwa mu bilometero 350 muri icyo gihugu, muri pariki eshatu zicungwa na African Parks.

Prince Harry kandi amaze kuva mu gisirikare mu 2015, yamaze amezi atatu mu mishinga yo kwita ku nyamaswa muri Namibia, Tanzania, Afurika y’Epfo na Botswana

African Parks yagize uruhare rukomeye mu kubungabunga no kurinda Pariki y’Akagera, ku buryo uretse kwiyongera kw’inyamaswa, umutekano wazo wakajijwe zikazitirwa ngo zidakomeza konera abaturage, hubakwa uruzitiro rurimo amashanyarazi rutuma inyamaswa zidapfa kururenga.

Inyungu iva muri Pariki y’Igihugu y’Akagera nayo yiyongereye hejuru ya 300% mu myaka itandatu ishize, kuko yavuye ku bihumbi $350 mu 2010 ikagera kuri miliyoni $1.4 mu 2016, agenda ashyirwa mu mishinga iteza imbere abaturage baturiye pariki.

African Parks icunga Pariki 13 n’ibyanya bibungabunzwe mu bihugu icyenda byo kuri uyu mugabane, zirimo Akagera (Rwanda), Bangweulu (Zambia), Chinko (Centrafrique), Garamba (RDC), Liuwa Plain (Zambia), Liwonde, Majete na Nkhotakota (Malawi), Odzala-Kokoua (Congo), Pendjari (Benin) na Zakouma (Tchad).

Prince Harry ari gufatanya Roy Hensberg mu kwimura Inkura muri Malawi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza