Ikigo cyigenga cyahawe gucunga Pariki y’Igihugu ya Gishwati-Mukura mu myaka 25

Yanditswe na Rabbi Malo Umucunguzi
Kuya 27 Mata 2019 saa 04:35
Yasuwe :
0 0

Ikigo cy’Igihugu cy’Iterambere, RDB, cyagiranye amasezerano y’imyaka 25 n’ikigo Imizi Ecotourism Development Ltd, yo gutunganya no gucunga Pariki y’igihugu ya Gishwati-Mukura, ku buryo ihinduka igice gikorerwamo ubukerarugendo mu gihugu.

Muri Gashyantare 2016 nibwo ishyamba cyimeza rya Gishwati -Mukura riherere mu ruhererekane rw’Imisozi y’isunzu rya Congo-Nil, ryemejwe nka Pariki y’Igihugu ya kane, yitezweho gutanga umusanzu mu kwinjiza amadevize binyuze mu bukerarugendo n’izindi nyungu zituruka ku bidukikije.

Iyo pariki iherereye mu Turere twa Rutsiro na Ngororero mu Ntara y’i Burengerazuba bw’igihugu, ingana na hegitari 3 558, harimo icyanya cya Gishwati gifite ubuso bungana na Hegitari 1 570, n’icya Mukura kingana na Hegitari 1 988.

Amasezerano y’uko iyi pariki itungwanywa ndetse igacungwa n’ikigo cyigenga yashyizweho umukono kuri uyu wa Gatandatu hagati y’Umuyobozi Mukuru wungirije wa RDB, Emmanuel Hategeka, n’umuyobozi Mukuru w’Ikigo Wilderness Safari ari nacyo Imizi gishamikiyeho.

Ayo masezerano azatuma Imizi gitunganya ndetse gicunge Pariki y’igihugu ya Gishwati Mukura ku buryo ba mukerarugendo bazoroherwa no gusura inguge n’ibisamuntu bihaboneka, RDB isigarane inshingano zo kubungabunga urusobe rw’ibinyabuzima n’ibikorwa byo kurengera ibidukikije.

Ibyo bikorwa birimo gushyiramo abakozi barinda inyamaswa, ikurikizwa ry’amategeko, ibikorwa bigamiye ubumenyi, gukorana na koperative zikorana na pariki, gukemura amakimbirane yavuka hagati y’abantu n’inyamaswa n’ibikorwa by’ubushakashatsi.

Umuyobozi Mukuru wungirije wa RDB ushinzwe ibikorwa, Emmanuel Hategeka, yavuze ko ubukerarugendo muri Gishwati-Mukura bugiye kwiyongera ku bindi bice u Rwanda rufite bikorerwamo ubukerarugendo.

Ati “Twiteze ko uyu mushinga wo muri Pariki y’Igihugu ya Gishwati-Mukura uzaba ikindi cyekerezo cya ba mukerarugendo ndetse ugatuma abasura u Rwanda barushaho kwiyongera. Iziyongera ku byerekezo bikundwa cyane na ba mukerarugendo birimo Pariki y’igihugu y’Ibirunga ibarizwamo ingagi zidapfa kuboneka ahandi; Pariki y’igihugu ya Nyungwe na Pariki y’Igihugu y’Akagera ibonekamo inyamaswa eshanu zikomeye, bisurwa n’ibihumbi by’abashyitsi buri mwaka.”

Yakomeje avuga ko ishoramari rya Imizi muri Pariki y’Igihugu ya Gishwati-Mukura rishimangira imbaraga u Rwanda rukomeje gushyira mu kugira iki gihugu icyerekezo kiboneye cy’ubukerarugendo bunabyarira inyungu abaturiye za pariki.

Yakomeje ati “Gusura inguge n’ibisamuntu muri Pariki y’igihugu ya Gishwati-Mukura ni imwe mu mpamvu zikomeye zo gusura u Rwanda, igihugu gitekanye kurusha ibindi mu karere, kiza no ku mwanya wa gatanu mu bitekanye ku Isi.”

Umuyobozi Mukuru wa Wilderness Safari, Keith Vincent, yavuze ko aya masezerano ari ikintu gikomeye mu ntego icyo kigo cyihaye mu gufasha u Rwanda kugeza ubukerarugendo n’akamaro bufitiye abaturage, ku rwego rurenze gusurwa n’abifuza kureba ingagi gusa.

Ati “Twifuza gukomeza gukorera mu gihugu aho ba mukerarugendo babasha kubona ibintu byinshi u Rwanda rufite bibashimisha. Amahirwe aboneka mu Rwanda nta wayahakana kandi dutewe ishema no gufatanya n’Ikigo cy’Igihugu cy’iterambere mu gufungura amahirwe abitse muri Gishwati-Mukura n’ahandi.”

Wilderness Safaris ifite ibikorwa byo kurengera ibidukikije mu bihugu birindwi bya Afurika ni nayo ifite Bisate Lodge yubatse muri Pariki y’Igihugu y’Ibirunga na Magashi Lodge muri Pariki y’Igihugu y’Akagera.

Ubwo Gishwati-Mukura yemezwaga nka pariki y’igihugu kandi yanahawe akarere k’ubuhumekero gafite ubuso bwa hegitari 962, bugizwe na hegitari 266 z’ubuhumekero bwa Gishwati na hegitari 696 z’ubuhumekero bwa Mukura.

Mu 2017 u Rwanda rwinjije miliyoni $438 zivuye mu bukerarugendo, ndetse in Guverinoma yihaye intego ko mu 2024 inyungu ruvana mu bukerarugendo igomba kwikuba kabiri ikagera kuri miliyoni $800.

Iyi pariki imaze gukorwamo byinshi mu kuyitunganya ariko ikeneye kunozwa ngo ibashe gusurwa
Pariki ya Gishwati-Mukura ibonekamo inguge n'ibisa nazo byinshi
Gusura iyi pariki ni kimwe mu bintu bizashimisha ba mukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza