Impuguke yasabye ko abasura ingagi mu Birunga bajya bipfuka ngo batazanduza indwara

Yanditswe na Rabbi Malo Umucunguzi
Kuya 20 Mata 2017 saa 08:20
Yasuwe :
0 0

Umugandekazi Dr. Gladys Kalema Zikusoka arasaba ko abasura ingagi muri pariki mu Rwanda na Uganda bajya bambara utuntu tubakingira ku munwa n’amazuru (mask), nk’uburyo bwo kwirinda kwanduzanya indwara n’izi nyamaswa zisurwa cyane.

Mu busabe bugaragara kuri internet ndetse bumaze gushyigikirwa n’abantu basaga 300, abakora ibijyanye n’ubukerarugendo n’abafasha ba mukerarugendo ngo bakwiye gushishikariza abakiliya babo n’abashyitsi kwikingira mu kurinda ingagi.

Dr Zikusoka ati “Kwambara ‘mask’ mu gihe cyo gusura ingagi ni uburyo bwiza bwo kuzirinda indwara zakwanduzwa n’abantu.”

Umuyobozi mu Kigo cy’Igihugu Gishinzwe Iterambere (RDB) ushinzwe guhuza Pariki n’abazituriye, Ngoga Telesphore, we yabwiye IGIHE ko kwambara ‘mask’ ari ibintu byaganiriweho igihe kinini, nubwo hari abagishaka ko bikomeza kugibwaho impaka.

Yagize ati “Ariko kugeza ubu imyanzuro yarafatiwe icyo kintu ni uko izo ‘mask’ zishobora kwambarwa igihe ari ngombwa. Ni ukuvuga igihe habaye nk’icyorezo cyagaragariye abaganga.”

“Ni bo bonyine bashobora gufata umwanzuro wo gusaba ko abantu bagiye aho ingagi ziri, baba ba mukerarugendo, abagiyeyo gukora ubushakashatsi cyangwa se n’abaganga bagiye kuzireba, bagenda bambaye utwo dukoresho turinda umunwa n’amazuru kugira ngo hatabaho kwanduzanya hagati y’bantu n’ingagi.”

Ngoga yavuze ko ari amabwiriza arebana no gusura ibisamuntu binini (great Apes) birimo ingagi, Impundu, Bonobo n’ibindi, ngo kuba u Rwanda rudakoresha utwo tuntu bambara ni uko bitaraba ngombwa.

Ubusanzwe ngo hari uburyo bukoreshwa mu kwirinda ko habaho kwanduzanya hagati y’ingagi n’abazisura, harimo kuba mu gihe bigaragara ko hari inyamaswa irwaye indwara ishobora kwanduza abantu, badatuma hari abazisura.

Ngoga yakomeje agira ati “Kimwe n’uko mu bajya kuzireba, iyo hari ufite indwara tubona iri mu rwego rw’izishobora kwanduza izo nyamaswa, na we tumubuza kujyayo. Kandi iyo abantu bagiye kuzisura, tugira intera dusaba ko isigara hagati y’aho abantu bahagaze n’aho ingagi ihagaze. Tuvuga metero nibura zirindwi hagati aho.”

Mu gusiga iyo ntera, uretse kuba ngo birinda kuzegera ngo hatabaho kwanduzanya indwara, ni no kugira ngo umuntu atayikanga bityo ikaba yamugirira nabi.

Ngoga avuga ko kwambara mask bishobora kubangamira umuntu waterera umusozi ajya kureba ingagi yipfutse umunwa n’amazuru, kandi ubusanzwe aba akwiye kwisanzura mu gihe cyose nta mungenge zihari kandi zemejwe n’abaganga.

Umuyobozi mu Kigo cy’Igihugu Gishinzwe Iterambere (RDB) ushinzwe guhuza Pariki n’abazituriye, Ngoga Telesphore, we yabwiye IGIHE ko kwambara ‘mask’ ari ibintu byaganiriweho igihe kinini, nubwo hari abagishaka ko bikomeza kugibwaho impaka

Yakomeje agira ati “Ikindi ingagi zisurwa ni izamenyerejwe guhura n’abantu, burya ingagi zose ziri mu ishyamba ntabwo ariko zisurwa. Niba zimenyereye kubona abantu zibareba mu maso, noneho umunsi umwe zigatangira kubona abantu bipfutse udutambaro tw’ibara ryaba ryagenwe, byasaba igihe cyo kubanza no kuzimenyereza ko n’abo bambaye gutyo na bo ari abantu.”

Dr Zikusoka asanga guverinoma za Uganda n’u Rwanda zakumva iki gitekerezo, cyane ko Repubulika Iharanira Demokarasiya Congo yo yatangiye kugishyira mu bikorwa ku basura Pariki ya Virunga.

Umusaruro u Rwanda rukura mu bikorwa by’ubukerarugendo ukomeje kwiyongera, aho mu 2016 wageze kuri miliyoni 404 z’amadolari ya Amerika, wikubye kabiri ugereranyije no mu myaka itandatu ishize.

Buza ku isonga mu kwinjiza amadovize menshi mu Rwanda, kuko ugereranyije n’ibindi bicuruzwa bitandukanye rwohereje mu mahanga, mu 2016 birimo icyayi, ikawa, amabuye y’agaciro, ibireti n’impu, byinjije miliyoni 219.1 $ ugereranyije na miliyoni 265.2 $ mu 2015.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244