Intare yo mu Akagera yari iherutse kubyara eshatu, yapfuye

Yanditswe na IGIHE
Kuya 31 Werurwe 2018 saa 10:58
Yasuwe :
0 0

Pariki ya Akagera yatangaje ko intare yitwa Shema yari iherutse kubyara ibyana bitatu, yapfuye nyuma y’igikomere yagize mu mutwe ishobora kuba yarakigize igerageza kwica indi nyamaswa.

Ubuyobozi bw’iyi pariki bwatangaje ko iyi ntare yazanywe mu Akagera mu 2015 yari imaze imyaka 14 ku Isi. Mu 2016, yabyaye ibyana bitatu birimo bibiri by’imfizi n’ikindi kimwe cy’ishashi, byose ubu bikaba bimaze kugira imyaka ibiri kandi ubuzima bwabyo bumeze neza.

Impamvu y’urupfu rw’iyi ntare, ubuyobozi bwa Pariki y’Akagera bwatangaje ko rushobora kuba rwaratewe n’igikomere yagize mu mutwe ubwo yageragezaga kwica.

Pariki yanatangaje ko abagenzuzi babonye amakuru ko izindi ntare ebyiri harimo Kazi na Umwari zagaragaye zifite ibyana, bisobanuye ko umubare w’intare mu Akagera uzakomeza kwiyongera.

Nyuma y’imyaka igera kuri 15 intare zaracitse mu Rwanda, Ikigo cy’Igihugu cy’Iterambere, RDB hagati mu mwaka wa 2015 cyagejeje mu gihugu intare zirindwi zazanwe nk’impano yaturutse muri Afurika y’Epfo, zirimo eshanu z’ingore.

Ubukerarugendo ni kimwe mu byinjiriza u Rwanda amadevize menshi; mu 2015 bwinjije agera kuri miliyoni $318; ndetse abaturiye ibice bukorerwamo bagerwaho na 5% by’ibyinjizwa nabwo.

Pariki y’Igihugu y’Akagera ni iya kera ahagana mu 1934, ifite ubuso bwa km² 1 200, ikaba iri hagati y’u Rwanda na Tanzania.

Iyi Pariki imaze kugera ku rundi rwego muri Afurika kuko ari intaho y’inyamaswa eshanu zikomeye kuri uyu mugabane zizwi nka “Big Five”, arizo Intare, Inzovu, Urusamagwe, Imbogo n’Inkura.

Iyi ntare yari iherutse kubyara ibyana bitatu birimo imfizi ebyiri n'ishashi imwe / Ifoto: Pariki y'Akagera
Shema byatangajwe ko yishwe n'igikomere yagize mu mutwe igerageza kwica indi nyamaswa / Ifoto: Cyril Ndegeya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza