Leta igiye kuzana itegeko rikaza ibihano by’uwishe inyamaswa

Yanditswe na Jean Pierre Tuyisenge
Kuya 28 Kanama 2017 saa 09:04
Yasuwe :
0 0

Ikigo cy’Igihugu gishinzwe Iterambere (RDB) cyatangaje ko hagiye kuvugururwa itegeko rirengera inyamaswa zo mu gasozi nyuma y’uko iryari rihari ritajyanye n’andi yo mu Muryango wa Afurika y’Iburasirazuba (EAC) u Rwanda rubamo, rikazaza rinafite ibihano biremereye k’uwishe inyamaswa.

Ubwo yari mu nama igamije kureba icyakorwa kugira ngo inyamaswa ziri mu gasozi zirusheho kwitabwaho, kuri uyu wa 28 Kanama 2017, Umuyobozi muri RDB ushinzwe pariki z’igihugu, Eugène Mutangana, yavuze ko hakenewe ivugururwa ry’amategeko kugira ngo ajye ku rwego rwa EAC.

Yagize ati “Iri tegeko ni irituma tujya ku kigero kimwe n’ik’ibihugu duturanye, cyane ko itegeko rirengera ibinyabuzima ryari riri mu Rwanda ryari hasi cyane. Rero ni ukongera kuryubaka nk’uko turi mu Muryango wa Afurika y’Iburasirazuba, turashaka ko bijya ku kigero kimwe, ku buryo bikorerwa hamwe. Iri tegeko turi kurikoraho kandi turizera ko uyu mwaka uzajya kurangira ryabonetse.

Avuga ko iri tegeko rikubiyemo uburyo pariki zizabungwabungwa, uko zizitabwaho, hagamijwe kongerera ingufu kurinda urusobe rw’ibinyabuzima mu Rwanda.

RDB igaragaza ko mu gihe amategeko y’u Rwanda ku kurengera ibidukikije atari ahujwe n’ayo mu karere, usanga ibihano bihabwa umuntu wishe inyamaswa runaka aba agomba guhabwa bitameze kimwe mu karere.

Iryo tegeko niriramuka rigiyeho, ryitezweho kuzafasha mu kurengera inyamaswa zose ziri mu byanya birinzwei n’ugerageje kubyangiza akabihanirwa bikomeye.

Nubwo Mutangana atagaragaje ibihano bishobora guhabwa uwishe inyamaswa, yanenze uburyo bwari buriho bw’ibihano.

Yagize ati “Kugeza ubu umuntu yashoboraga kwica inyamaswa agafungwa nk’icyumweru kimwe cyangwa bibiri agahita afungurwa, ku buryo yashoboraga kugaruka agakora cya cyaha.”

Kugeza ubu pariki u Rwanda rufite nizo zicumbikiye urusobe rw’ibinyabuzima rurinzwe; abazituriye bakangurirwa buri gihe kuzibungabunga kandi amafaranga ubukerarugendo bwinjije bayahabwaho 15% agakoreshwa mu bikorwa bibateza imbere.

Umuyobozi muri RDB ushinzwe pariki z’igihugu, Eugene Mutangana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza