Kwamamaza

Musanze: Abahoze ari ba rushimusi b’inyamaswa basigaye batungwa n’amadovize

Yanditswe kuya 28-11-2016 saa 20:38' na Emma-Marie Umurerwa


Abatungwaga no guhiga inyamaswa muri Parike y’Ibirunga, kugurisha impu, amahembe y’inzovu n’ibindi, bagahabwa amafaranga y’intica ntikize, rimwe na rimwe ntibamenye irengero ryayo, kuri ubu ngo batunzwe n’amadovize ava mu bukerarugendo.

Barora Léonidas w’imyaka 68 na Kabatsi Félicien w’imyaka 65 batuye mu Kagari ka Kabazungu mu Murenge wa Musanze mu Karere ka Musanze, kimwe n’abandi benshi bahoze ari ba rushimusi, bavuga ko kuri ubu basigaye batunzwe n’amadovize ava mu bukerarugendo.

Kabatsi avuga ko yatangiye kuba rushimusi mu 1977, ariko amaze imyaka 10 abiretse.

Yagize ati "Nari rushimusi, nategaga inyamaswa muri parike y’Ibirunga. Nicaga impongo, imbogo nzihigishije amacumu hanyuma tukazibaga tukazirya."

‘Naretse guhiga iterambere riza ryisukiranya iwanjye’

Nk’uko akomeza abivuga, ngo si we wibwirije kureka guhiga inyamaswa mu ishyamba, ahubwo ni RDB yabigizemo uruhare.

Ati “RDB niyo nkesha kuba naravuye mu birunga, niyo nkesha inzu y’amabati 36 n’igikoni cy’amabati 10, ndetse n’inka n’intama eshanu mfite, kuko yadukanguriye kuva mu bushimusi bw’inyamaswa ahubwo tukibumbira mu makoperative tukiteza imbere. Ubu rwose iterambere twarigezeho tubikesha kwishyira hamwe.”

‘Izina ryanjye ryaramenyekanye kandi nkiri rushimusi sinari nzwi’

Mu kigo ‘Iby’Iwacu Cultural Village’ kiri mu Karere ka Musanze, hubatse inzu za Kinyarwanda, zitandukanye muri zo harimo iyitiriwe Barora Léonidas wahoze ari kabuhariwe mu gushimuta inyamaswa.

Yagize ati “Iyo mbonye inzu banyitiriye bintera ishema cyane, kuko nahoze ndi rushimusi kabuhariwe, ndazwi cyane muri aka gace, kubera ko nicaga inyamaswa zikomeye zirimo ifumberi, imbogo, impongo, inzovu n’inkende. Iyo namaraga kuzica narazibagaga nkarya inyama zazo, izindi nkazigurisha, amahembe n’impu zazo bakampa amafaranga y’intica ntikize.”

Barora yakomeje atangaza ko bamwe batahanaga umuhigo, abandi bakahasiga ubuzima kuko iyo uticaga inyamaswa yo yarakwicaga cyangwa ikagukomeretsa.

Yagize ati “Ku mubiri wanjye hari ibikomere natewe n’inyamaswa. Ntiwayicaga mutabanje kurwana inkundura, iyo wagiraga amahirwe ntikwice yagusigiraga ibikomere. Hari abagiye bapfa hari n’abasigiwe ubumuga n’inyamaswa.”

Uwabaye rushimusi iyo akumbuye inyama bigenda bite?

Nk’uko abahoze ari ba rushimusi babivuga, ngo bafashe icyemezo cyo kuva mu ishyamba bidasubirwaho, iyo bakumbuye inyama bajya kuzigura.

Barora ati "Twarigishijwe bihagije, ubu ngize uwo mbona agerageza guhiga inyamaswa twakizwa na mbuga. Iyo dukumbuye inyama tujya kuzigura. Ikindi batworoje intama n’andi matungo magufi kandi yarabyaye, iyo ushaka gushira ipfa ubaga itungo ukarirya."

Mu Karere ka Musanze habarizwa abahoze ari ba rushimusi basaga 1200, bakaba bibumbiye mu makoperative icyenda, barimo abagera kuri 40 bafite akazi gahoraho mu kigo ‘Iby’iwacu Cultural Village.’

Barora Léonidas wahoze ari rushimusi kabuhariwe, ubu amadovize yamugezeho
Barora Léonidas yereka ba mukerarugendo uko yarasaga inyamaswa
Kabatsi Félicien wahoze ari rushimusi, ubu ni umucuranzi wa ba mukeraugendo
Ba rushimusi bahawe akazi mu kigo Iby'Iwacu Village
Abahoze ari ba rushimusi bibumbiye mu makoperative bubaka ikigo bakiriramo ba mukerarugendo
Iki kigo gisurwa na ba mukerarugendo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved