Singita igiye gufungura imiryango mu Birunga, yinjiye mu mishinga yo kubungabunga urusobe rw’ibinyabuzima

Yanditswe na IGIHE
Kuya 27 Mata 2019 saa 01:08
Yasuwe :
0 0

Umwaka wa 2018 wasize Ihuriro Mpuzamahanga ryo kubungabunga Ibidukikije (IUCN) ryemeje ko ingagi zo mu misozi zikomeje kwiyongera ku rwego rushimishije ku buryo zitakiri mu mubare w’inyamaswa zigeramiwe ndetse zishobora gucika ku Isi.

IUCN ikurikirana urwego inyamaswa n’ibimera bibungabunzweho ku Isi yose, hashingiwe ku bimenyetso n’isesengura ry’abahanga, yagaragaje ko ingagi zavanwe mu cyiciro cya ‘critically endangered’ zishyirwa mu cya “endangered’ hashigiwe ku kugabanuka kw’ibituma zitororoka.

Inzobere muri IUCN, Dr Liz Williamson, yavuze ko “Nubwo umubare w’ingagi zo mu misozi wiyongera, ariko ziracyahura n’ibyago ku buryo hakenewe imbaraga zo gukomeza kuzibungabunga.’’

Kuva mu myaka ishize, Isi yahagurukiye kwita ku kubungabunga urusobe rw’ibinyabuzima no gushyigikira abaturage baturiye ibyanya bikomye mu iterambere.

Mu Rwanda, ubukerarugendo bw’igihugu bwibanze kuri iyo ntego yo kwita ku bidukikije no kubungabunga urusobe rw’ibinyabuzima bijyana no gusangiza abaturiye pariki umusaruro zitanga.

Muri urwo rugendo, igihugu cyungutse Ikigo cya Singita gifasha inzego z’ibanze n’abaturage mu gushyigikira imishinga y’iterambere.

Muri Kanama 2019, Singita izafungura inyubako ya Kwitonda Lodge and Kataza House izacumbikira ba mukerarugendo basura ingagi zo muri Pariki y’Igihugu y’Ibirunga.

Umuyobozi wa Singita, Luke Bailles, yavuze ko gufungura amacumbi mu Rwanda bizatanga amahirwe yo gukurura benshi baza gusura ingagi kubera ubukaka bw’iyi sosiyete mu kubungabunga ibinyabuzima.

Yagize ati “Kurambagiza abashyitsi no guhuza ibikorwa byo kubungabunga urusobe rw’ibinyabuzima bifite ingaruka nziza kuko bitanga umusanzu muri gahunda ziteza imbere abaturage. Iterambere rigezweho risaba gusigasira ubukerarugendo, umuryango n’ibinyabuzima. Imibereho y’ibi byose igira uruhare rufatika mu iterambere.’’

U Rwanda rufite gahunda yo kwagura Pariki y’Igihugu y’Ibirunga ikava ku buso bwa kilometero kare 160, ikongerwaho ¼ mu myaka itanu.

Mu myaka ya 1960, igice ½ cya pariki cyahariwe ubuhinzi ndetse akazi kakozwe na Dian Fossey katumye umuryango mpuzamahanga ukangukira kwita ku ngagi zo mu misozi.

Ubukerarugendo bw’u Rwanda bwakomwe mu nkokora mu gihe cya Jenoside yakorewe Abatutsi mu 1994, ariko politiki y’igihugu yongera kububyutsa mu 1999, bushinga imizi.

Singita Kwitonda Lodge and Kataza House yubatse ku buso bwa hegitari 72 aho ibirunga bitangirira; uyirimo aba yitegeye ibirunga bya Sabyinyo, Gahinga na Muhabura.

Iri ku butaka buri muri gahunda za Guverinoma y’u Rwanda yo kongera hegitari 2832 ku butaka bukomye.

Ubwo butaka bumaze imyaka myinshi buhingwa buzaterwaho ibiti byihariye. Mu gushyigikira uwo mushinga, Singita yateye ingemwe z’ibiti 60,000 zizifashishwa.

Singita Kwitonda Lodge yubatswe mu ntango z’Ibirunga, izatwara miliyoni $20; yatangiye kubakwa ku wa 31 Kanama 2017, ni yo nzu ya mbere Singita igize ifasha abantu kureba ingagi, mu bihugu byose ifitemo ibikorwa.

Iyi nyubako itatswe n’ibikoresho gakondo byakorewe mu Rwanda, igizwe n’inzu zirindwi buri imwe ifite icyumba kimwe cyo kuraramo, imwe ifite ibyumba bibiri n’indi yo ku ruhande ifite ibyumba bine. Ku ikubitiro izaha akazi abantu 70.

Ingagi zo mu Birunga ziri mu bikurura ba mukerarugendo benshi bagana u Rwanda
Singita yashyizeho ahantu harererwa ingemwe z'ibiti 60,000 bizaterwa mu kubungabunga urusobe rw'ibinyabuzima hafi ya Pariki y'Igihugu y'Ibirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza