Urugendo rwa Joe McDonald n’umugore we basuye ingagi zo mu Birunga inshuro 100

Yanditswe na Ishimwe Israel
Kuya 21 Ugushyingo 2016 saa 08:26
Yasuwe : XX
0

Abanyamerika Joe McDonald n’umugore we Mary Ann McDonald, baciye agahigo bari barihaye ko gusura ingagi inshuro 100, bakazana n’abandi ba mukerarugendo basaga 600.

Mu mwaka wa 2003 nibwo uyu muryango ukomoka muri Leta ya Pennsylvania muri Amerika, bakoreye urugendo rwabo rwa mbere mu Rwanda baje gusura ingagi muri Pariki y’Igihugu y’Ibirunga. Icyo gihe batangajwe n’uburyo ingagi zo mu misozi miremire zisigaye mu bihugu mbarwa ku Isi, zitaweho mu Rwanda.

Kuva ubwo McDonald n’umugore we, basanzwe ari abafotozi babigize umwuga by’umwihariko mu bafotora inyamaswa zitandukanye zo mu ishyamba bahise batangira kumenyekanisha ubukerarugendo bwo mu Rwanda babinyujije mu mafoto, kuri ubu bakaba barananditse igitabo bise ‘One Hundred Treks and Thousand Friends.”

McDonald yagize ati “Twatekereje gusura u Rwanda bwa mbere mu mwaka wa 2000, ntibyadushobokera kubera ko ubukerarugendo bwari bukiri hasi. Twaje mu 2003 ariko nabwo ntibyari byoroshye kubera ko ibikorwa remezo nk’imihanda, amahoteli ntibyari bimeze neza. Ntitwacitse intege, ahubwo kubera uburyo twari twakunze u Rwanda, twahise twiha umuhigo wo kujya tuza inshuro nyinshi mu mwaka kandi tukazana n’abandi nibura bagera kuri batandatu batandukanye uko tuje.”

Joe McDonald n'umugore we

Yakomeje avuga ko yishimira iterambere u Rwanda rumaze kugeraho, ndetse n’uruhare mu kwimakaza no guteza imbere ubukerarugendo, by’umwihariko ingagi.

Ati “Twashimishijwe n’uburyo u Rwanda rwazamuye urwego rw’ubukerarugendo rukanabwifashisha mu kuzamura imibereho y’abaturage, aho inyungu ziva mu bukerarugendo zigera no ku baturage. Tuza mu Rwanda inshuro nyinshi, tugenda henshi mu Rwanda kandi twishimira uburyo Abanyarwanda bakirana urugwiro ababagana.”

Bashimishijwe no kwita izina umwana w’ingagi

Mu mwaka wa 2014 nibwo bagaragaje ko bafite inzozi zo kuzita izina abana b’ingagi. Icyo gihe bari bamaze imyaka 11 bakorera ubukerarugendo mu Rwanda. Bakaba bari bamaze no kuzana ba mukerarugendo basaga 500.

Ubwo abana b’ingagi 22 bitwaga amazina ku wa 2 Nzeri 2016, inzozi za Mary Ann McDonald n’umugabo we zaje kuba impamo.

Mary ati “Byaradushimishije cyane, kuba twaratoranyijwe mu bise abana b’ingagi amazina. Umwana twise izina yabyawe n’iyitwa ‘Nchili’ ikaba ikomoka mu muryango w’iyitwa Kwitonda. Umwana twamwise ‘Ntamupaka’ ingagi igomba kwisanzura, igatembera muri pariki hose ntakiyikumira.”

Mu mwaka wa 2013, Joe McDonald n’umugore we Mary Ann McDonald, bari bamaze gukoresha miliyoni y’amadorali ya Amerika mu bukerarugendo mu Rwanda. Ubwo buzuzaga inshuro 100 basura ingagi, birinze kuvuga umubare w’amadorali bamaze gukoresha.

Bemeza ko bakoresheje miliyoni nyinshi, dore ko inshuro imwe gusa ku munyamahanga ushaka gusura ingagi yishyura amafaranga y’u Rwanda asaga ibihumbi 550, kandi kugira ngo bese uyu muhigo byabasabye kuza mu Rwanda inshuro zisaga zirindwi mu mwaka.

Uretse u Rwanda, Mary n’umugabo we bamaze gusura na pariki zitandukanye mu bihugu byo mu Karere ka Afurika y’u Burasirazuba nko muri Kenya, Tanzaniya na Uganda. Basuye kandi pariki zo muri Afurika y’Epfo, Arizona, California, Florida, Ohio, New York, New Jersey, West Virginia, Maryland, Delaware n’ahandi.

Izindi nkuru wasoma:

Umunyamerika yesheje umuhigo wo gusura ingagi zo mu Birunga inshuro ijana

Mu myaka 13 ba mukerarugendo basura ingagi bikubye inshuro zisaga enye

Muri Nzeri, Mary Ann McDonald yise izina umwana w'ingagi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza