Uruhare rw’abaturage ku isonga mu byatumye Gishwati - Mukura izuka igahinduka Pariki y’Igihugu

Yanditswe na Rabbi Malo Umucunguzi
Kuya 8 Kanama 2019 saa 11:54
Yasuwe :
0 0

Muri Gashyantare 2016 nibwo ishyamba kimeza rya Gishwati -Mukura riherereye mu ruhererekane rw’Imisozi y’isunzu rya Congo-Nil, ryemejwe nka Pariki y’Igihugu ya kane, yitezweho gutanga umusanzu mu kwinjiza amadevize binyuze mu bukerarugendo n’izindi nyungu zituruka ku kubungabunga ibidukikije.

- Abaturage bari ku ruhembe ku izuka rya Gishwati

- Abaturiye pariki bafashijwe kwiteza imbera binyuze mu mishinga ibyara inyungu

- Imizi Ecotourism Development Ltd igiye gutangira kubaka inzu z’ubukerarugendo

- Umushinga LAFREC ukorera muri REMA uri kubaka ibikorwa remezo bizifashishwa pariki itangiye kwakira ba mukerarugendo

- Urugendo rwo kongera ibyiza bya Gishwati-Mukura rurakomeje

Iyo pariki iherereye mu Turere twa Rutsiro na Ngororero mu Ntara y’i Burengerazuba bw’igihugu, ingana na hegitari 3 558, harimo icyanya cya Gishwati gifite ubuso bungana na Hegitari 1 570, n’icya Mukura kingana na Hegitari 1 988.

Ni pariki yabashije kubaho kubera uruhare rwa leta n’abaturage, kuko nyuma ya Jenoside yakorewe Abatutsi iyi pariki yari yakendereye, ituzwamo abaturage ndetse ibindi bikorwa byabo birushaho kuyangiza.

Kayihura Jean uturiye Pariki y’Igihugu ya Gishwati-Mukura, avuga ko bakimara gutuzwa muri Gishwati bayihinzemo ibishyimbo ku gice kinini ndetse bayiragiramo amatungo, utaretse n’igice kinini cyatuwe. Ingaruka zibikomokaho ntizatinze kuko habanje kuva izuba ridasanzwe, nyuma hagwa imvura idasanzwe.

Ati “Nyuma yo gutema ishyamba habaye ikibazo, ikirere kirahinduka hano haba izuba rikomeye, haza ingomero ebyiri twari dufite rumwe rwa Nkore rutangira gusenyuka, tubona ingaruka ziteye ubwoba zibonetse kubw’ishyamba ryari ryangiritse. Niho twatangiye gufata ingamba zo kujya inama tuti iri shyamba nirisenyuka, n’ubuzima twibwiraga ko tuzabamo ntibuzashoboka, hafatwa icyemezo dufatanyije n’izindi nzego, zo guhagarika kurituramo.”

Ruzindana Alexis warindaga iyi pariki, yavuze ko babitangira mu 2009 yari yugarijwe n’ibikorwa byatumaga inyamaswa ndetse n’ibimera biyigize bihutazwa bikomeye kubera ibikorwa bya muntu.

Ati “Abantu bakimara kuhatuzwa, ishyamba bahise batangira kuritema, nk’impundu zarimo zatangiye guhura n’ikibazo ugasanga zigiye konera abaturage bari kuzirukaho, ikindi ni ukuriragira cyangwa n’ubucukuzi by’amabuye y’agaciro, ugasanga n’ibiti umushinga wa mbere wateye batangiye kubicukura.”

Abaturage ku ruhembe rwo kubungabunga Gishwati

Mu gutunganywa iri shyamba, habanje umushinga Gishwati Area Conservation Program (GACP) wateraga ibiti muri iri shyamba hagamijwe ko ryongera kugira isura, ribungwabunga kuva mu 2008-2011. Umaze guhagarara nibwo hibajijwe niba intambwe yatewe itazasubira inyuma, abaturage bagerageza kwishyira hamwe ngo barebe icyo bakora.

Baje kwishyira hamwe bashinga Forest of Hope Association (FHA) muri Mutarama 2012, ngo yubakire ku bikorwa byari bimaze kugerwaho n’umushinga wa mbere kandi bakabikora nta gihembo bategereje.

Nyuma hiyongereyeho ibikorwa by’Umushinga LAFREC ( Landscape approach to forest restoration and conservation) w’Ikigo cy’Igihugu cyo kubungabunga ibidukikije, REMA, wafashije mu gukomeza gusubiranya no gusana ibice by’ishyamba byangiritse, kubaka ibikorwa by’ibanze bya pariki ndetse no gufasha abaturiye pariki kwiteza imbere binyuze mishinga ibyara inyungu.

Binyuze muri muri uyu mushinga, amashaymba ya Gishwati na Mukura n’ibice biyakikije byakomeje gusubiranywa, cyane ahitwa Kinyenkanda ku gice cy’ishyamba rya Gishwati, ahatewe ibiti gakondo kuri hegitari 439. Ibi biti byatewe hamaze kwimurwa abaturage bahatujwe, ariko leta iza kubona ko ari ngombwa ko bimurwa mu rwego rwo gukomeza kongera ubuso bw’ishyamba no kurinda iyangirika ryaryo.

Naho ku gice cy’ishyamba rya Mukura, Umushinga LAFREC wafashije gusubiranya ibice byacukurwagamo amabuye y’agaciro mu buryo butemewe n’amategeko, aho byatezaga isuri ndetse n’iyangirika ry’ibidukikije mu buryo bukabije.

Kuri ubu hakomeje gushyirwaho ibikorwa remezo by’ibanze by’ubukerarugendo bizifashishwa igihe pariki izaba yatangiye gukora. Muri byo harimo inzu pariki izakoreramo, aho ba mukerarugendo bahererwa amakuru igihe basuye pariki (visitor centers), inzu z’abacunga pariki (ranger posts) ndetse n’aho ba mukerarugendo baruhukira igihe bari mu nzira basura pariki.

Umushinga LAFREC wa REMA kandi wafashije ababaturage kwiteza imbere binyuze mu mishanga ibyara inyungu ifite agaciro ka miliyari ebyiri na miliyoni 600 z’amafaranga y’u Rwanda, ndetse bubakirwa aho bazajya bamukirikira bakanagurishiriza ibyavuye mu musaruro wabo.

Hubatswe kandi ibikorwa byo kwirinda ibiza aho kuri ubu hamaze kubakwa ibiraro bine by’abanyamaguru ku migezi ya Sebeya na Satinsyi, aho kenshi abaturage batabashaga kwambuka bitewe n’amazi yateraga kuzura kwi’iyo migezi mu gihe cy’imvura nyinshi. Hateganyijwe kandi ko hazubakwa ibindi biraro bitatu mu turere twa Rutsiro na Ngororero.

Hakozwe kandi inyigo n’ubushakashatsi bugaragaza urusobe rw’ibinyabuzima biri muri iyi pariki ndetse n’inyandko igaragaza uko ubukerarugendo buzakomeza gutezwa imbere.

Nyiratuza Madeleine wakoranye n’umushinga wa mbere ndetse akaza gushinga FHA, avuga ko mu bikorwa byo kubungabunga Gishwati, abaturage babigizemo uruhare rukomeye kandi bagaragaza umuhate udasanzwe kubera ko bari bazi akamaro kayo ku buzima barimo.

Ati “Mbere twari tuzi ko tuhasanga hegitari 800 gusa ariko abaturage batwereka ahantu hose bakoreshaga leta yari yarageneye gusubira mu mbago z’ishyamba, riza kwiyongeraho ubundi buso bwa hegitari 700.”

Bashinga Forest of Hope Association ngo bumvaga bagiye kubungabunga ishyamba amezi make kubera ko bari abakorerabushake, kandi bumvaga atari ibintu bakora igihe kirekire. Nyamara haje kuboneka inkunga ku buryo uyu muryango waje gukomera ndetse ugira abakozi bahoraho.

Hashyizweho itsinda ry’abantu batatu bavuye muri buri Kagali gakora kuri Gishwati, kakanagira komite y’abantu batandatu bagomba gushyigikira abarinda ishyamba, bakaba n’abahuza babo na leta.

Kabenga Edson wari umukorerabushake muri Pariki ya Gishwati, avuga ko bitangira bari abantu 18 baturiye ishyamba rya Gishwati.

Agaruka ku kazi kabo yagize ati “Tugenda tuzunguruka ku ishyamba tureba ahantu hashobora kuba hangiritse, aho tubonye tugahamagara abarinda ishyamba tukahabereka, twaba dufashe umuntu ari kuryangiza tukamwigisha, twamara kumwigisha tugahamagara abarinda ishyamba, tukamwandikisha, tukamurekura.”

“Byaba bibaye nk’inshuro ya kabiri twongeye kumufata asubiye mu ishyamba, tugahamagara abarinda ishyamba, nabo bagahamagara abantu bo mu nzego z’ibanze kugira ngo bamuhane.”

Ni umurimo abaturage bakora bawishimiye, kuko umusaruro waryo ubageraho binyuze mu bikorwa bijyana n’iyi pariki. Mu bice biyikikije hubatswe ibikorwa nk’amakaragiro n’uruganda rw’ubuki rwa Gishwati, bijyana n’imihanda yunganira abaturage mu bikorwa binyuranye.

Pariki y’Igihugu ya Gishwati-Mukura igiye gutangira gusurwa

Umuyobozi wa Pariki y’Igihugu ya Gishwati-Mukura, Abel Musana, avuga ko kuba RDB igiye gutangira imicungire ya pariki mu buryo buhoraho aho gukorwa n’abaturage nk’uko bisanzwe, ari inyungu ikomeye ku gihugu ndetse n’abayituriye. Imirimo yo kuhubaka ibiro bya RDB igeze kure.

Yagize ati “Iyi pariki iri ahantu twavuga ko hari ibikorwa remezo, umuhanda (wa kaburimbo) ubasha gutuma abantu bayigeramo, igihe ubukerarugendo buzaba butangiye bizoroha. Ariko by’ubwihariko, muri iyi pariki ni naho dusanga amasoko y’imigezi nka Sebeya, hari amoko y’inyoni ataboneka ahandi, ikanagira umwihariko wo kuba ari nshya ku buryo abantu bazaba bishimiye kureba ahantu abantu bakoze ibishoboka byose ngo bagarure ishyamba ryari rigiye kuzimira ndetse barigire pariki.”

Kugeza ubu urugendo rurimo gukorwa ni urwo kongera inyamaswa zirimo ndetse n’ibimera, ku buryo abantu bazishimira gusura iyi pariki ya Gishwati-Mukura.

Nyuma y’urwo rugendo rwose, Ikigo cy’Igihugu cy’Iterambere kigiye gutangira gucunga Pariki y’Igihugu y’Igihugu ya Gishwati, ndetse giheruka gusinyana amasezerano na y’imyaka 25 n’ikigo Imizi Ecotourism Development Ltd, yo gutunganya no gucunga Pariki y’igihugu ya Gishwati-Mukura, ku buryo ihinduka igice gikorerwamo ubukerarugendo mu gihugu.

Ikigo Imizi gishamikiye kuri Wilderness Safari imaze kubaka izina mu bijyanye n’ubukerarugendo bugezweho kuri uyu mugabane.

Ayo masezerano azatuma ikigo Imizi gitunganya ndetse gicunge Pariki y’igihugu ya Gishwati Mukura ku buryo ba mukerarugendo bazoroherwa no gusura inguge n’ibisamuntu bihaboneka, RDB isigarane inshingano zo kubungabunga urusobe rw’ibinyabuzima n’ibikorwa byo kurengera ibidukikije.

Musana yakomeje ati “Hari ibyatangiye gukorwa kugira ngo gihe gito kiri imbere iyi pariki y’igihugu ya Gishwati Mukura izatangire kwakira ba mukerarugendo, muri ibyo navuga amasezerano RDB yagiranye na Wilderness Safari, mu minsi iri imbere bakazaza kubaka ‘eco-lodge’ iri ku rwego rwo hejuru hano iruhande rwa pariki, ariko mu mizo ya mbere hazabanza kubakwa aho ba mukerarugendo barara mu buryo bwo gukambika, iyo hoteli ya eco-lodge ikazaza mu cyiciro cya nyuma. N’ubutaka bwo kubakaho bwarabonetse.”

“Bikaba ari bimwe bizabanza kugira ngo ubukerarugendo nyirizina bwo gusura pariki, gusura za nyamaswa zirimo, gusura bya biti birimo, bitangire. Ibyo bikaba ari bimwe mu bikorwa abatiriye pariki bazagenda babonamo inyungu kuo iyo mirimo yose izajya ikorwa akenshi, ari bo babigiramo uruhare. Uretse ibikenera ubushobozi buhambaye, hari imirimo ya buri munsi kandi izajya ikenera abaturage bakikije iyi pariki.”

Mu rugendo rwo kwishimira intambwe u Rwanda rumaze gutera mu kwita kubidukikije, Madeleine Nyiratuza watangije Forest of Hope Association ubu ukora muri UNDP Rwanda, ni umwe mu bise ingagi Izina ku wa Gatanu. Yise ingagi izina ‘Isanzure’.

Iyo ugeze ku ishyamba rya Gishwati mu Karere ka Rutsiro uturutse i Rubavu, wakirwa n'icyapa kikwereka aho ugeze
Iyi pariki ibonekamo inyamaswa zitandukanye zishobora gusurwa mu bukerarugendo
Inkengero za Pariki y'Igihugu ya Gishwati-Mukura zikorerwamo ibikorwa by'ubworozi n'ubuhinzi bugezweho nk'ubw'icyayi
Kayihura Jean (hagati) uturiye Pariki y’Igihugu ya Gishwati-Mukura yereka umuyobozi wayo, Abel Musana, uko ingana kuko iri shyamba yarimenye rikiri cyimeza kugeza ubwo ryangizwaga n'abaturage
Ruzindana Alexis ni umwe mu barinda iyi pariki ngo hatagira abayangiza
Muri Gishwati harimo amasoko y'imigezi itandukanye
Ikibanza Wilderness Safari izubakamo inzu zakira ba mukerarugendo cyarabonetse
Kuba Gishwati-Mukura inyuramo kaburimbo ni kimwe mu bizorohereza abayisura
Musana Abel ahamya ko mu minsi mike Pariki y'Igihugu ya Gishwati-Mukura izatangira gusurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza