Nyungwe : Iminara irenga itatu izongera umubare w’ubukerarugendo bw’inyoni

Nyungwe : Iminara irenga itatu izongera umubare w’ubukerarugendo bw’inyoni


Yanditswe kuya 17-01-2013 - Saa 08:02' na Marie Chantal Nyirabera

Iminara iri muri Pariki ya Nyungwe ba mukerarugendo bahagararamo bareba inyoni (watch tower), izongera umubare wa b’abasura inyoni kugeza ubu bigaragara ko ukiri muto.

Kambogo Ildephonse,Umukozi w’Ikigo cy’igihugu cy’iterambere (RDB) wungirije umukuru ushinzwe ubukerarugendo muri Pariki ya Nyungwe, yatangarije IGIHE ko bazahugura abuturiye iyo Pariki, cyane cyane abegereye ahari iminara, bakazajya babasha gushishikariza no gusobanurira ba mukerarugendo ubwiza bw’inyoni.

Ibi bizafasha mu kumenyekanisha ibyiza nyaburanga byayo, kandi bigirire akamaro Pariki n’abayituriye.
Avuga ko ba mukerarugendo bagomba guhabwa uburenganzira na Pariki, bagasura inyoni bagendeye ku mabwiriza, banishyuye, kuko uwakoresha umunara areba inyoni atabiherewe uburenganzira bitemewe.

Iyi minara yubatswe mu karere ka Nyamasheke muri Pariki ya Nyungwe no mu gishanga cya Kamiranzovu, igamije guteza imbere ubukerarugendo bw’inyoni mu bishanga (wetlands) bitandukanye.

Ku muhanda wa Nyungwe hubatse umunara umwe, muri Pariki rwagati hubatse ibiri, n’indi na none ibiri iri rwagati mu gishanga cya Kamiranzovu. Iminara nk’ iyi inubatse mu Majyaruguru, aho isaga ine yarubatswe mu gishanga cya Rugezi.

Kambogo akomeza atangaza ko abasura inyoni baba bagomba kwitwaza jumelle (Ibyuma bibafasha kureba kure), bikabafasha kuzireba neza, anavuga ko kubera umubare w’abazisura ukiri muto hazakomeza kubaho kubisobanurira bigateza imbere ubu bukerarugendo.

Ikiraro cyo mu kirere cya “Canopy” na cyo kikazakomeza kwifashishwa muri ubu bukerarugendo bwo gusura amoko atandukanye y’inyoni aboneka muri Pariki ya Nyungwe asaga 275.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO