Kwamamaza

Minisitiri w’Intebe yatanze umuti ku bashomeri barangiza Kaminuza

Yanditswe kuya 18-11-2016 saa 16:40' na Tombola Felicie


Minisitiri w’Intebe, Anastase Murekezi, yatangaje ko bitewe n’umubare w’ubushomeri mu rubyiruko rurangiza za kaminuza ukiri hejuru, leta yafashe ingamba z’uko umubare munini w’abanyeshuri bazajya baba barangiza amashuri y’uburezi bw’imyaka icyenda bazaba barize amasomo y’imyuga.

Ibi yabitangaje ubwo yasozaga ku mugaragaro ubukangurambaga ku kwihangira imirimo (NEP Kora wigire) bwari bumaze ukwezi bukorerwa hirya no hino mu gihugu.

Ubushakashatsi bwashyizwe ahagaragara, bwerekanye ko ubushomeri mu barangiza kaminuza buhagaze ku kigero cya 14%, mu gihe mu mijyi buhagaze ku 9% naho mu rubyiruko muri rusange buri kuri 4%.

Minisitiri w’Intebe, Anastase Murekezi, yavuze ko impamvu ubushomeri bugenda buba bwinshi mu barangiza za kaminuza, ari uko usanga barize amasomo atajyanye n’ibikenewe ku isoko ry’umurimo.

Ahereye kuri izo mpamvu, Minisitiri w’Intebe Murekezi yavuze ko hafashwe umwanzuro wo kuvugurura amasomo yigishwa mu byiciro by’uburezi bitandukanye kugira ngo ahuzwe n’ibikenewe ku isoko. Ni muri urwo rwego ngo leta ifite intego y’uko mu 2018, ku bazarangiza amashuri y’ibanze y’uburezi bw’imyaka icyenda, abangana na 60% bazaba biga amashuri y’imyuga, yabafasha kwihangira imirimo.

Minisitiri Murekezi avuga ko Minisiteri y’Uburezi yashyizeho integanyanyigisho nshya izajya ifasha abanyeshuri bo muri ayo mashuri gusohoka hari ubumenyi ngiro bafite bwabemerera kugira icyo bikorera badategereje guhabwa imirimo.

Kuri ubu Leta y’u Rwanda ikangurira abantu b’ingeri zose kwihangira imirimo ibabeshaho bitewe n’uko yo itanga imirimo ku kigero cya 3% mu gihe 97% by’isigaye itangwa n’abikorera ku giti cyabo ndetse indi igahangwa.

Minisitiri w’Intebe Murekezi yavuze ko abanyarwanda hafi miliyoni esheshatu hatabariwemo abanyeshuri n’abakuze, bafite imbaraga zo kuba hari umurimo bakora, bityo ngo hakenewe ubukangurambaga kugira ngo babe bakwitabira amasomo y’imyuga n’ubumenyi ngiro.

Yibukije kandi uturere tumwe na tumwe tutarashinga udukiriro kubikora vuba kugira ngo abaturage cyane urubyiruko babone aho bahangira imirimo.

Muri uyu muhango hahembwe abantu bagize uruhare mu gufasha abantu b’ingeri zose kwihangira imirimo, abafashije urubyiruko kubona inguzanyo, ibigo bitandukanye byagize uruhare mu gutanga akazi ku rubyiruko nk’uruganda rukora imyenda, C&H Garment, uturere twabashije gukora ubukangurambaga muri uku kwezi kwa NEP Kora wigire ku buryo bushimishije nka Gicumbi, Musanze na Burera.

Gahunda ya NEP Kora Wigire yatangijwe mu 2014, aho kuri ubu abantu 80,672 babashije guhanga imirimo idashingiye ku buhinzi babikesha iyi gahunda.

Abantu 7,438 babashije guhabwa ingwate ibafasha gukora imishinga ku bufatanye bw’iyi gahunda n’ikigega gitera inkunga imishinga iciriritse, BDF. Abajyanama mu by’ubucuruzi bafashije abantu 24,702 kubona inguzanyo zo gukora imishinga ibateza imbere.

Minisitiri w'Intebe Murekezi Anastase yavuze ko hakwiye ubukangurambaga buhagije kugira ngo abanyarwanda bihangire imirimo
Murekezi asura imurikabikorwa ry'ibyakozwe n'abahuguwe muri gahunda ya Kora Wigire
Bimwe mu bikorwa byamuritswe n'abahuguwe muri iyi gahunda
Abakoze neza mu mahugurwa kuri gahunda ya Kora Wigire bahawe impamyabumenyi baranahembwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved