85% by’aho nkongwa idasanzwe yari yibasiye hongeye gutohagira

Yanditswe na Uwishyaka Jean Louis
Kuya 10 Gicurasi 2017 saa 02:47
Yasuwe :
0 0

Nyuma y’ukwezi kuri hafi gushira inzego zitandukanye zinjiye mu rugamba rwo guhangana n’icyorezo cya nkongwa idasanzwe yibasiye ibihingwa by’ibinyampeke, Ikigo cy’Igihugu gishinzwe ubuhinzi n’ubworozi (RAB), kirashimangira ko icyo cyonnyi cyaciwe intege mu buryo bufatika.

Mu mpera za Werurwe nibwo byatangajwe ko mu bice bitandukanye by’igihugu hateye nkongwa idasanzwe yibasira ibihingwa cyane ibigori, byatumye Minisitiri w’Ubuhinzi n’Ubworozi, Dr Geraldine Mukeshimana, amenyesha Inama y’Abaminisitiri yateranye ku wa 5 Mata ko igihembwe cy’Ihinga 2017 B kiri kugenda neza, cyakora ko hateye icyorezo cya nkongwa idasanzwe yibasira ibihingwa by’ibinyampeke.

Iyo nkongwa ikigaragara, inzego zinyuranye zatangije ibikorwa byo guhangana nayo haterwa umuti wica udusimba uzwi nka ‘Pyretrum EWC’, wakorewe mu Rwanda na sosiyete ya SOPIRWA itunganya ibikomoka ku bireti, ikaba ishamikiye kuri sosiyete ya Horizon ya Minisiteri y’Ingabo.

Igisirikare cy’u Rwanda (RDF) cyatabaranye ingoga maze gikwirakwiza uwo muti mu bice binyuranye cyifashishije indege ya kajugujugu ndetse ingabo zitanga umusanzu mu kuwutera mu mirima.

Nyuma y’ibyo bikorwa byose, RAB itangaza ko raporo yo ku itariki 5 Gicurasi, yagaragaje ko ubuso bungana na hegitari ibihumbi 20 z’ibigori bwari bwafashwe n’iyo nkongwa bwatewemo umuti ndetse ibihingwa by’ahangana na hegitari ibihumbi hafi 19 byamaze gukira byongera gusubirana ubuzima, ibindi biri mu nzira.

Umuyobozi ushinzwe iterambere ry’ubuhinzi muri RAB, Dr Telesphore Ndabamenye, yabwiye IGIHE ko iyo nkongwa imaze guhashywa mu buryo bushimishije. Ati “Kugeza ubu ibigori byongeye kumera neza; hari ahari hafashwe tuhatera umuti ku buryo ku buso bwari bwafashwe hafi 85% by’imyaka ihari imaze gusubirana. Ibikorwa byo gutoragura nkongwa no gutera umuti birakomeje mu gihugu, ariko ugerageje kureba nta kibazo kidasanzwe gihari.”

Dr Ndabamenye asobanura ko iyo utoraguye iyo nkongwa n’intoki ukayica, ukayitera umuti ndetse ukayitaba mu butaka uba uyirwanyije kimwe no kuyitera umuti mu murima bisanzwe. Iyo itarwanyijwe ngo imara iminsi igahinduka ikinyugunyugu, kikaguruka ahantu hose gitera amagi. Nibura mu minsi itatu icyo kinyugunyugu gishobora gutera amagi 2000.

Ayo magi niyo akura akavamo urunyo, rwo rukavamo nkongwa, ikororokera no mu bindi bihingwa mu rugendo rufata iminsi igera kuri 21.

Yavuze kandi ko iki kigo kiri gukora ubushakashatsi ku buryo bwo gukoresha imitego mu kwica ibyo binyugunyugu.

Yashimangiye ko bitewe n’uko iyi nkongwa yafatiranywe hakiri kare ndetse n’imvura ikaba ikigwa kuzageza mu kwezi kwa gatanu kose, hari icyizere ko umusaruro uzaboneka ku buryo bushimishije.

Ibikorwa byo kurwanya iyi nkongwa birarimbanyije hirya no hino mu gihugu, aho mu bikorwa nk’umuganda, abaturage ku giti cyabo, mu cyumweru cy’ingabo z’igihugu (Army Week) kizasozwa muri Nyakanga, haterwa umuti mu bihingwa mu rwego rwo guhangana nayo.

Mu Ntara y’Amajyaruguru iyi nkongwa yagaragaye muri Gicumbi na Burera; mu Majyepfo iboneka muri Nyamagabe, Ruhango, Nyanza, Kamonyi, Huye, Gisagara, Nyaruguru na Muhanga; Iburasirazuba igaragara muri Bugesera, Gatsibo, Kayonza, Nyagatare, Rwamagana na Kirehe; Iburengerazuba itahurwa muri Rubavu, Nyabihu, Ngororero, Rutsiro, Karongi, Nyamasheke na Rusizi.

Ingabo z'u Rwanda n'izindi nzego batanze umusanzu mu gutera umuti mu mirima yari yagaragayemo nkongwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza