Abadepite bavuganiye abagoronome n’abaveterineri b’abashomeri

Yanditswe na Jean Pierre Tuyisenge
Kuya 15 Ugushyingo 2017 saa 10:59
Yasuwe :
0 0

Abadepite babwiye Minisiteri y’Ubuhinzi n’Ubworozi ko hari icyo yakoresha abagoronome n’abaveterineri barangije kwiga ariko kugeza ubu bakaba badafite akazi cyangwa ugasanga barigiriye mu bindi.

Ku wa 14 Ugushyingo 2017, mu nama nyunguranabitekerezo ku isano iri hagati y’iterambere ry’ubuhinzi mu Rwanda na politiki y’ubuhinzi n’ubworozi, ingamba z’iterambere ry’ubuhinzi (PASTA 4) na gahunda y’iterambere rirambye 2030, yatangiwemo igitekerezo kigaruka ku iby’ubuhinzi n’ubworozi ariko badafite aho bakora.

Hagaragajwe ko hari ibyo u Rwanda rukeneye gukora mu buhinzi n’ubworozi nko gutubura imbuto cyangwa kwigisha abaturage uburyo bwo gufata neza ibishanga, ababyize bagakwiye kwifashihwa.

Depite Izabiriza Marie Mediatrice yagize ati “Nagira ngo mbaze bariya bagoronome n’abaveterineri barangije, b’abashomeri, uburyo bashobora kwifashishwa muri gahunda y’ubukangurambaga nko muri gahunda ya Twigire muhinzi; nkeka ko abo bantu bashyizwe hamwe cyangwa bagahugurwa mu buryo bumwe cyangwa ubundi bafasha hariya hasi mu mudugudu, bakaba bafasha no mu zindi gahunda z’ubuhinzi.”

Depite Rwaka Pierre Claver yagize ati “Abafite ubumenyi mu buhinzi n’ubworozi birakwiye ko hatangira gutekerezwa uburyo bakoreshwa. Mu Rwanda dufite abagoronome benshi, hari ababyize mu mashuri yisumbuye, hari ababyize muri kaminuza ugasanga abenshi batari no mu buhinzi akenshi ugasanga bari kwishakashakira ahandi. Ese turi gutekereza gute gukoresha abo bagoronome bari hariya hanze kugira ngo banadufashe gukemura ibibazo byo gutubura imbuto no gukora ifumbire.”

Minisitiri w’Ubuhinzi n’Ubworozi, Dr Mukeshimana Gerardine, yavuze ko muri politiki nshya y’ubuhinzi n’ubworozi n’ingamba z’iterambere ry’ubuhinzi (PASTA 4), hari gutekerezwa uburyo abo bose bakoreshwa, bagafasha abahinzi muri gahunda zo kongera umusaruro.

Yagize ati “Nibyo hari abagoronome badafite akazi ariko icyo turimo tubikoraho ni uko muri iyi nyandiko harimo na gahunda ndende yo kubamenyereza umwuga; tukabigisha uburyo bw’amasomo y’ubumenyingiro kugira ngo ibyo bakora babashe kubikora neza ariko nk’ubu dufite abagoronome hafi 600 bari hafi y’iwabo mu giturage barimo kwimenyereza imirimo.”

Yongeyeho ati“Ubu turi gukorana na cya kigo cyongerera abakozi ubushobozi kugira ngo bagende bamenyera gukorana n’abahinzi, bityo bagende babishoramo imari babone ko ari n’umwuga wunguka.”

Minisitiri w’Ubuhinzi n’Ubworozi yavuze ko bakoze icyitwa Youth in Agribusiness, gihuriyemo urubyiruko rwarangije amashuri y’ubuhinzi n’ubworozi rurimo rugerageza kwinjira mu rwego rw’ubuhinzi n’ubworozi n’ibibukomokaho.

By’umwihariko muri PASTA 4, hateganyijwe uburyo bwihariye bwo kongerera abakozi ubushobozi bo mu buhinzi n’abakora ibikorwa bifite aho bihuriye nabwo.

Nubwo nta mibare y’abaveterineri n’abagoronome badafite akazi iratangazwa, abadepite bavuga ko aho bajya mu midugudu hirya no hino mu gihugu ntaho basanga hatari umuntu warangije muri ayo masomo udafite akazi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza