Abadepite bunze mu rya Kagame basaba ko inyungu ku nguzanyo za banki zagabanywa

Yanditswe na Jean Pierre Tuyisenge
Kuya 12 Gicurasi 2017 saa 10:42
Yasuwe :
1 0

Abadepite basabye Guverinoma gushyiraho ingamba zafasha mu kugabanya inyungu banki zaka ku basaba inguzanyo kugira ngo byorohereze buri wese gukora ibikorwa by’imari byamuteza imbere.

Babisabye ku wa 10 Gicurasi 2017, ubwo Minisiteri y’Imari n’Igenamigambi yagezaga kuri Komisiyo y’Ingengo y’Imari n’Umutungo wa Leta mu Nteko Ishinga Amategeko, imbanzirizamushinga y’ingengo y’imari ikeneye mu mwaka wa 2017/2018.

The New Times yanditse ko uwo munsi abayobozi baturutse muri Minecofin babwiye iyo Komisiyo ko mu bikorwa bifuza kuzashyiramo imbaraga harimo kuba bazakora ku buryo abantu boroherezwa kugera ku mari kugira ngo byongere umubare w’abakoresha banki mu gihugu.

Umunyamabanga Uhoraho muri Minecofin, Caleb Rwamuganza, yavuze ko iyo minisiteri izakora ku buryo inguzanyo zitangwa n’ibigo by’imari zaba iz’igihe gito n’ikirekire ziyongera.

Yavuze ko mu mwaka w’Ingengo y’imari uri gusatira umusozo, umubare w’abantu bakuru bagera kuri serivisi z’imari wazamutse ukava kuri 72 ukagera kuri 89%.

Inguzanyo mu bikorera ku giti cyabo zageze kuri miliyari 788.1 z’amafaranga y’u Rwanda mu 2016/2017, bigaragaza ko byazamutseho 6% ugereranyije no mu mwaka wabanje, bakaba bafite intego yo gukora ku buryo banki zitanga nibura miliyari 853 mu mwaka w’ingengo y’imari y’umwaka uzatangira muri Nyakanga.

Perezida wa Komisiyo y’Ingengo y’Imari n’Umutungo wa Leta mu Nteko Ishinga Amategeko, Depite Mukayuhi Rwaka Constance, yasabye ko ikibazo cy’inyungu ku nguzanyo ihanitse kigomba kwiganwa ubushishozi kugira ngo bizafashe abikorera gutera imbere, ibyo yemeza ko ari ikibazo gihangayikishije.

Ibyasabwe n’abadepite bije bikurikira ibyo Perezida Kagame yavugiye mu muhango wo kwizihiza isabukuru y’imyaka 50 Banki ya Kigali imaze ikora, aho yavuze ko hakenewe ko inyungu ku nguzanyo banki ziha abaturage zagabanywa kuko kuba ziri hejuru bigira ingaruka mu buryo abaturage bazibona kandi baba bakeneye kwiteza imbere.

Mu gihe hasigaye amezi abiri ngo umwaka w’ingengo y’imari y’uyu mwaka ugere ku musozo, ishyirwa mu bikorwa by’ingengo y’imari rigeze kuri 96% nk’uko Rwamuganza abyivugira.

Rwamuganza yakomeje avuga ko u Rwanda ruzakomeza guteza imbere umuco wo kuzigama mu buryo burambye cyane mu buryo bw’impapuro mvunjwafaranga.

Imibare itangwa na Banki Nkuru y’u Rwanda igaragaza ko kuva mu 2008 kugera muri Gashyantare 2017, u Rwanda rwari rumaze gutanga iz’asaga miliyari 190 z’amafaranga y’u Rwanda.

Mu byerekeye ishoramari, Raporo iheruka ya “Doing Business Report’ yakozwe na Banki y’Isi, ikiga ku bihugu 190, yashyize u Rwanda ku mwanya wa 56 ku Isi mu koroshya ishoramari; muri Afurika ruza ku wa kabiri rukurikiye ibirwa bya Maurice.

Perezida wa Komisiyo y’Ingengo y’Imari n’Umutungo wa Leta mu Nteko Ishinga Amategeko, Depite Mukayuhi Rwaka Constance (ibumoso) yasabye ko hakorwa ibishoboka inyungu amabanki yaka zikagabanywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244