Abagore ba PSD bagaragaje ikibazo cyo kutamenya BDF ifasha imishinga iciriritse

Yanditswe na Evariste Nsengimana
Kuya 7 Gicurasi 2017 saa 05:36
Yasuwe :
1 0

Nubwo hashize imyaka irenga itanu Ikigega gishinzwe gutanga ingwate ku mishinga mito n’iciriritse (BDF ) gishinzwe, haracyagaragazwa ko abo cyashyiriweho batazi imikorere yacyo.

Abagore bari muri biro politiki y’Ishyaka riharanira Demokarasi n’imibereho myiza y’abaturage (PSD), kuwa 06 Gicurasi 2017, bagaragarije BDF ko hari abagore bagakwiye kuyigana, ariko batayizi.

Visi Perezida wa Kabiri wa PSD, Depite Nyirahirwa Veneranda, yashimangiye ko mu by’ukuri abaturage benshi batazi icyo BDF ikora, bumva ko igenewe abifite nyamara ikoresha imari yaLeta mu kuzamura ab’amikoro make.

Yagize ati “Ndashaka kubaza, ariko ndabaza nk’umuntu utazi ikintu na kimwe kuri BDF, nubwo tujya duhura n’abakozi bayo ariko kugeza uyu munsi sindamenya imikorere yayo. Kandi ndibwira ko iki kibazo tugihuje n’Abanyarwanda batari bake. BDF nk’ikigo gifite 56% by’ingengo y’imari ya Leta, hanyuma 44% ari iya Banki itsura amajyambere, nibajije ko tumenyereye ko ibintu Leta ifitemo imigabane biba byaje gufasha abantu b’amikoro make. Nkaba nashatse kumenya, BDF itekerezwa yatekererejwe abafite za kompanyi cyangwa ni abafite amikoro make? Ukurikije ibyiciro igiramo uruhare, nasanze ari iya bya bifi bini nk’uko bajya bakunda kubivuga, bamwe basanzwe bifite.”

Yongeye ati “Nk’uko bagenzi banjye bagiye babigarukaho, bakomeje kuvuga ko batayizi, bakora imishinga amaso agahera mu kirere, mwegera abatutrage mute? “

Hamwe n’ibindi bibazo, Umukozi ushinzwe ubugenzuzi bw’imbere muri BDF, Bakinga Déo, yavuze ko iki kigega kcyamenye ko abantu benshi bataramenya icyo BDF ikora, ubu iri gukora ubukangurambaga.

Yagize ati “Amakuru y’uko hari abatazi BDF turayumva ariko tubiha agaciro ndetse navuga ko BDF imaze imyaka itanu ariko nyuma y’ibiri nibwo yakwirakwije amashami yose mu gihugu. Ariko ubu turi kugenda dukora ubukangurambaga kandi dufite ingamba zo gukuraho imbogamizi no gukuraho urujijo ku bayifata uko itari [..] Byangora kuvuga imibare y’imishinga y’abagore tumaze gufasha, ariko ngereranije nk’imibare y’umwaka ushize, 39% by’imishinga twafashije yose yari iy’abagore kandi urugendo rurakomeje, ku bufatanye bw’ibigo by’imari n’abaturage biziyongera. Gusa umuturage utaragana ibigo by’imari nta mahirwe afite yo gukorana na BDF.”

Visi Perezida wa Kabiri w’Ishyaka PSD, Depite Nyirahirwa Veneranda yavuze ko bikwiye ko BDF ivugurura imikorere, ati “Abagore benshi bagaragaje ko batazi imikorere ya BDF kandi baturutse mu bice by’icyaro. Biterwa n’ubukangurambaga butaragera ku mubare munini w’Abanyarwanda. Tukaba twasabaga ko ubukangurambaga burushaho kugera kuri wa muturage wo hasi, ufite imishinga.”

Mu mwiherero w’abo bagore bagize PSD, banaganiriye ku gahunda zitandukanye zirimo ‘Ndi Umunyarwanda’ no gushishikariza abarwanashyaka n’abanyarwanda muri rusange kumva ko abanyafurika ari bamwe, baganira no kugira uruhare mu mato y’Umukuru w’Igihugu ateganyijwe muri Kanama 2017.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza