Abaherwe bo muri Afurika bagiye gukusanya miliyoni 25$ zo guteza imbere abagore barimo Abanyarwandakazi

Yanditswe na Rabbi Malo Umucunguzi
Kuya 14 Werurwe 2017 saa 09:12
Yasuwe :
0 0

Umuryango Entreprenarium uheruka gutangiza gahunda wise "MenInvestInWomen", ugiye gufatanya n’abagabo bafite intambwe ifatika bagezeho mu bucuruzi muri Afurika, bagakusanya miliyoni 25 z’amadolari ya Amerika azashorwa mu guteza imbere umugore kuri uyu mugabane.

Muri iki gikorwa cyatangijwe ku munsi w’abagore kuwa 8 Werurwe biteganywa ko abagabo 50 b’abakire kuri uyu mugabane bazagura iyi gahunda bakayigeza ku bandi 500, bose intego bahuriyeho ari ukongerera ubushobozi umugore w’Umunyafurika.

Mu itangazo Entreprenarium yashyize ahagaragara rijyana n’icyo gikorwa, ivuga ko gahunda ya “MenInvestInWomen, yatangiriye ku bagabo 50 b’abacuruzi bakomeye bo mu Rwanda, Senegal, Mali, Cote d’Ivoire, Gabon, Cameroun, Nigeria, Uganda, Kenya na Afurika y’Epfo, nubwo amazina y’abatangiranye n’iyi gahunda ataratangazwa.

Iyo gahunda ngo izibanda ku bikorwa bibiri by’ingenzi, ari byo uburezi no kwihangira imirimo.

Ikomeza igira iti « Abo bacuruzi biyemeje, ku ruhande rumwe, ko abakobwa bafite ubumenyi ariko batagize amahirwe ahagije bahabwa uburezi bwo ku rwego rufatika, kugira ngo bazabe abayobozi beza bazanagire uruhare mu mpinduka z’uyu mugabane. Ku rundi ruhande, bifuza guteza imbere ubucuruzi budaheza ibikorwa by’abagore, bugira uruhare mu iterambere ry’umugabane.”

“MenInvestInWomen” ngo izatera inkunga uburezi bw’abakobwa, biziyongera ku gushakira igishoro abagore bihangira imirimo kandi bafite imishinga itanga icyizere.

Biteganyijwe ko 70% by’amafaranga azatangwa azatera inkunga imishinga ya ba rwiyemezamirimo n’ubufasha mu bya tekiniki ku mishinga itanga icyizere, na ho 30% asigaye akazakoreshwa mu gutera inkunga uburezi mu mashuri makuru na za kaminuza.

Imishinga ihari kugeza ubu iri mu nzego zinyuranye, zirimo nka 32% ishingiye ku buhinzi, 41% y’ikoranabuhanga, 20% ishingiye kuri serivisi na 7% irebana n’ibidukikije.

Umuryango Entreprenarium washinzwe n’Umunyarwandakazi Kristine Ngiriye, ugakorera mu Rwanda, Senegal na Gabon, ukaba ukora ibikorwa bitandukanye birimo gutanga amahugurwa ku bagore ba rwiyemezamirimo no guha igishoro abagitangira ubucuruzi.

Kuva watangira imirimo umaze gutanga amahugurwa ku bagore 1360 ba rwiyemezamirimo, ndetse abasaga 100 bamaze kungukira muri gahunda yayo yo gutanga igishoro ku bafite imishinga itanga icyizere, "Women Capital Raising” (WCR).

Kristine Ngiriye, Umunyarwandakazi washinze Umuryango Entreprenarium

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza