Abahinzi bakanguriwe kurushaho gukoresha IKOFI ya Banki ya Kigali

Yanditswe na Sekamana Mathias
Kuya 16 Nyakanga 2019 saa 04:10
Yasuwe :
0 0

Banki ya Kigali ifatanyije n’Ikigo cy’igihugu gishinzwe ubuhizi n’ubworozi, RAB, barimo guhugura abashinzwe ubuhinzi mu Turere n’imirenge ndetse n’abacuruza inyongeramusaruro, ku bijyanye na gahunda ya Smart Nkunganire na serivisi nshya ifasha mu kwishyura inyongeramusaruro n’izindi serivisi ya IKOFI.

Smart Nkunganire System (SNS) yatangijwe nk’ikoranabuhanga rigenewe abashinzwe ubuhinzi, mu gufasha abaturage gusaba imbuto n’ifumbire bakeneye. Ku muntu wiyandikishije muri iri koranabuhanga, RAB ibona amakuru ye yose, ingano y’ubutaka afite, igihingwa agiye guhinga n’ifumbire azakenera, bityo na we akamenya amafaranga azakoresha.

Ubu buryo buheruka kwiyongeraho serivisi y’imari ya IKOFI yatangijwe na Banki ya Kigali muri Gicurasi uyu mwaka, ifasha umuhinzi kubitsa amafaranga, kubikuza, kuyohereza ku buntu mu Rwanda, kwishyura imbuto n’inyongeramusaruro, ubwiteganyirize bwa ‘Ejo Heza’ n’ibindi.

Ni uburyo bwombi bufasha umuhinzi kugaragaza ishoramari akora mu murimo we, bityo na banki ikaba yamugirira icyizere mu gihe akeneye inguzanyo yo kongera ishoramari mu murimo we.

Umuyobozi muri Banki ya Kigali ushinzwe kumenyekanisha ibikorwa, Thierry Nshuti, yavuze ko impamvu yo guhuza Smart Nkunganire na konti y’IKOFI, ari ukugira ngo kuguriza abahinzi amafaranga yo gushora mu mirimo yabo bizashoboke.

Ati “Ni ukugira ngo mu minsi iza BK izabe ifite amakuru yose y’umuhinzi bityo kumuguriza amafaranga yo gushora mu buhinzi bizorohe.”

Umukozi wa RAB ushinzwe kugeza Nkunganire ku bahinzi, Gatari Egide, yavuze ko gahunda ya IKOFI izorohereza abahinzi kubona serivisi z’imari kandi bitume n’abaturage bakoresha neza inguzanyo batse, kuko banki izajya yishyura umucuruzi, umuturage afate ibicuruzwa akeneye, ajye yishyura buhoro buhoro.

Ati “Bizatuma gukorana na banki byoroha, nta gutonda imirongo no gutanga ibyangombwa byinshi, ariko bizanatuma amafaranga ya banki akoreshwa ibyo yatangiwe kuko banki izajya yishyura umucuruzi, umuturage afate ibyo akeneye hanyuma azagende yishyura buhorobuhoro.”

Yongeyeho ko Smart Nkunganire izatuma nta buriganya na bumwe buba mu gutanga nkunganire, kuko amakuru y’umuturage yahujwe n’indangamuntu azajya agaragaza ubuso bw’ubutaka bwe n’ingano ya nkunganire akeneye.

Kugeza ubu abaturage bakabakaba miliyoni 1.2 banditswe muri gahunda ya Smart Nkunganire, ifasha umuturage kugura imbuto n’inyongeramusaruro ku giciro gito cyane yunganiywe na leta.

Abagera ku bihumbi 120 nibo bamaze kwiyandikisha mu IKOFI, BK ikaba ishishikariza abahinzi kwiyandikisha muri iyi gahunda kugira ngo nibakenera inguzanyo bizaborohere kandi binafashe leta kumenya niba Nkunganire leta igenera abaturage yaraguzwe n’abo yari igenewe.

Iki gikorwa cyitabiriwe n'abashinzwe ubuhinzi baturutse hirya no hino mu gihugu
Abashinzwe ubuhinzi bahuguwe ku mikorere ya IKOFI
Nshuti Thiery yijeje ko abahinzi biyandikishije mu IKOFI bazajya ababona inguzanyo z'ubuhinzi biboroheye
Umukozi wa RAB ushinzwe kugeza nkunganire ku baturage Gatari Egide yavuze ko gukorana na BK muri gahunda ya IKOFI bizorohereza abahinzi
Abashinzwe ubuhinzi bavuze ko bizeye ko izi serivisi zizafasha abagenerwabikorwa

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza