Abaholandi bagiye gukora inyigo izoroshya gucukura Gaz Methane no gushakisha peteroli mu Kivu

Yanditswe na Rabbi Malo Umucunguzi
Kuya 14 Werurwe 2017 saa 05:26
Yasuwe :
0 0

Ikigo Deltares cyo mu Buholandi kigiye gukora inyigo ku miterere y’ikiyaga cya Kivu, yitezweho kuzatuma uruhurirane rw’ibikorwa biteganywa cyangwa bikorerwa mu Kivu bishingira ku makuru yizewe harimo n’ay’iteganyagihe.

Umutoni Augusta M. Christine ushinzwe gahunda yo gukurikirana ubudahungabana bw’ikiyaga cya Kivu mu Kigo cy’igihugu Gishinzwe iterambere ry’ingufu, EDCL, yavuze ko iyi nyigo izagira akamaro gakomeye abantu bose bakoresha ikiyaga cya Kivu.

Mu biganiro byahuje abayobozi ba Deltares, ambasade y’u Buholandi mu Rwanda n’izindi nzego zifite aho zihuriye n’amazi n’ibidukikije, Umutoni yavuze ko muri iyo nyigo hazarebwa ku ku muhengeri, imiyaga yo mu mazi, uko amazi y’ikiyaga agenda ahindura uburebure n’ibindi.

Ati “Ibyo ni ibintu by’ingenzi ku bantu bakoresha ikiyaga, baba abarobyi, abakora ubukerarugendo, inzego za leta cyane cyane nk’abashaka kuzashyiraho ubwato; iriya nyigo izajya iduha amakuru akenewe mu kumenya uburyo abantu bakwitwara.”

Yakomeje agira ati “Ariko twifuza ko iba, kwari ukubera abantu bakoresha inganda za methane kubera ko biriya bikorwaremezo bashyiraho bikeneye ko hamenyekana ibijyanye n’umuhengeri n’imiyaga bibigiraho ingaruka.”

“Hari igihe higeze kubaho impanuka ugasanga nk’uruganda hari ibice byacitse kubera imiraba yabaga ari myinshi cyane, hakaba n’ibindi twagendaga tubona mu gukurikirana imikorere y’ikiyaga tukabona imihengeri iba munsi y’amazi kandi ubundi abashakashatsi barajyaga batubwira ko munsi y’aho imiyaga ishobora kugera nta mihengeri yashobora kubaho.”

Ibyo ngo bizatuma niba ari abubaka, bashingira ku makuru afatika, bakubaka ibintu bifashe, bihuje n’ingufu z’iyo mihengeri iri mu kiyaga.

Umutoni yanavuzeko bizanakoreshwa n’abantu bazubaka ingomero z’amashanyarazi kuri Rusizi, kuko niba amazi y’ikiyaga agabanuka cyangwa se agenda yiyongera, bizatuma hamenyekana ko zizaramba cyangwa zizabura amazi.

Ibyo byiyongeraho kuba hazubakwa n’ikoranabuhanga rizajya rituma hamenyekana iteganyagihe ryo mu gihe kiri imbere, hakabonwa uko imiterere y’ikiyaga izaba imeze.

Rizajya rituma nk’ubwato mbere yo kwerekeza mu gice runaka, hamenyekana niba hashobora kubaho umuhegeri, cyangwa igihe hari ibyago byinshi ku buryo urugendo rwasubikwa.

Abayobozi barimo n'abahagarariye Ambasade y'u Buholandi mu Rwanda

Mu gihe kandi u Rwanda ruheruka gutangaza umushinga wo gushakisha peteroki mu kiyaga cya Kivu, ubu bushakashatsi nabwo ngo bushobora gutanga amakuru afatika nk’uko umukozi wari uhagarariye ikigo gishinzwe ubushakashatsi kuri Mine na Peteroli na Gaz muri iyi nama yabitangaje.

Yagize ati “Bizadufasha kumenya amakuru yo mu Kivu, imihindagurikire y’ibihe, ukwivumbagatanya kw’amazi n’ibyago umuntu ashobora guhuriramo mu Kivu igihe ari mu bushakashatsi bwa Peteroli.”

Gusa iyi nyigo itandukanye n’iyo gushakisha peteroli ubwayo, kuko yo izarebera ku migendere y’amazi mu Kivu, mu gihe mu gushakisha peteroli ho bazajya munsi y’amazi hagati y’ibilometero 1800-3000.

Iyi ni inkunga ya guverinoma y’u Buholandi yahaye u Rwanda binyuze mu mu mushinga Lake Kivu Monitoring Program ukurikirana ubudahungabana bw’ikiyaga cya Kivu, ukazuzura mu 2019 utwaye ibihumbi 800 by’amayero.

Reimer de Graff, umuyobozi muri Deltares izakora iyo nyigo, yavuze ko uyu mushinga ari ingenzi kandi hari ibindi bihugu wagiye ukorwamo bikagaragaza ko utanga umusaruro ufatika.

Abitabiriye ibiganiro byahuje abayobozi ba Deltares, ambasade y’u Buholandi mu Rwanda n’izindi nzego zifite aho zihuriye n’amazi n’ibidukikije
Habajijwe ibibazo ku nyungu iyi nyigo izazanira igihugu
Umutoni Augusta M. Christine ushinzwe gahunda yo gukurikirana ubudahungabana bw’ikiyaga cya Kivu mu Kigo cy’igihugu Gishinzwe iterambere ry’ingufu, EDCL

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244