Abantu ibihumbi 178 bashobora kuzajya babona akazi gafitanye isano n’ubuhinzi n’ubworozi buri mwaka

Yanditswe na Jean Pierre Tuyisenge
Kuya 14 Ugushyingo 2017 saa 03:59
Yasuwe :
0 0

Minisiteri y’Ubuhinzi n’Ubworozi, yatangaje ko imirimo isaga 178,000 igiye kujya iboneka buri mwaka mu gihe cy’imyaka irindwi, ikazajya iva mu bikorwa bitandukanye bifitanye isano n’ubuhinzi.

Ubwo yari mu kiganiro nyunguranabitekerezo ku isano iri hagati ya politiki y’ubuhinzi mu Rwanda n’ingamba z’iterambere ry’ubuhinzi (PSTA4) kuri uyu wa 14 Ugushyingo 2017, Minisitiri w’Ubuhinzi n’Ubworozi, Dr Gerardine Mukeshimana yavuze ko ibikorwa biteganyijwe gukorwa mu gihe cy’imyaka irindwi bizahanga akazi ku bantu benshi.

Yagize ati “ Twarebye imirimo yaboneka turamutse tubikoze uko tubiteganya mu buhinzi bw’ibanze hahangwa imirimo isaga ibihumbi 22 naho mu gutunganya umusaruro ukomoka ku buhinzi hagahangwa igera ku bihumbi 38, hanyuma wajya no mu mahoteli n’ahandi hose ubuhinzi bugenda bugira uruhare hagahangwa igera ku bihumbi 118.”

Kugeza ubu ubuhinzi mu Rwanda bwongera 30% ku musaruro mbumbe w’igihugu kandi abagera kuri 70% batunzwe nabwo nk’uko Ikigo cy’Igihugu cy’Ibarurishamibare kibitangaza.

Ingamba z’iterambere ry’ubuhinzi za gatatu (PSTA3) zatangiye kuva 2013 – 2018, ryakuye ubuhinzi ku rwego rwo guhingira kurya gusa abahinzi batangira gutekereza uburyo bwo guhingira amasoko, no kubyaza umusaruro ibikorwa by’ubuhinzi.

Ingamba z’iterambere ry’ubuhinzi za kane (PSTA4), zigamije gufata ubuhinzi bukabyara ubukire ku babukora.

Muri yo myaka, biteganyijwe ko hazacibwa amaterase y’indinganire kuri hegitari 142,500 zivuye ku 110,905 zari zataciwe mu myaka itandatu ishize, hakazanuhirwa imyaka ku buso bungana na hegitari 102,284 zivuye kuri hegitari 48,508.

Iyo gahunda iteganya gukora impinduka mu bagore bakora ubuhinzi aho kugeza ubu 66% baba mu byaro bakora ubuhinzi ugereranyije n’abagabo bangana na 43%, ibyo byiyongeraho kuba abagore bagera 24% muri abo baguma mu bukene ugereranyije n’abagabo bari kuri 19%.

Biteganyijwe kandi ko abagore bazafashwa mu guhabwa imashini bazajya bakoresha mu kuhira imyaka yabo, bazahabwa imfashanyo zigamije kubaka ubushobozi bwabo, hakazibandwa kuri ba rwiyemezamirimo mu buhinzi.

Perezida w’Inteko Ishinga Amategeko, Umutwe w’Abadepite, Donatille Mukabalisa, yavuze ko u Rwanda rufite icyerekezo cyo kuzaba mu 2020 ruzaba rubarirwa mu bihugu bifite ubukungu buciriritse, asaba Abanyarwanda kumva ko hari ibyo basabwa gukora kugira ngo icyo cyerekezo kigerweho.

Yagize ati “ Hari byinshi dusabwa gukora birimo ubuhinzi bw’umwuga, tugahindura ubuhinzi bwacu bukava ku bwa gakondo bwo gushaka amaramuko bukaba ubuhinzi bw’ubucuruzi buha akazi abantu benshi by’umwihariko ku rubyiruko no ku bagore kuko ari byo bizatuma dushobora kwihaza mu biribwa no gusagurira amasoko.”

Biteganyijwe ko mu gihe gahunda ziteganyijwe zashyirwa mu bikorwa, ubukene mu Rwanda buzava kuri 39.1% bukagera kuri 15% mu 2024, mu gihe ubuhinzi buzazamukaho 10%, ibiribwa biboneka ku munsi bikaziyongera.

Minisitiri w'Ubuhinzi n'Ubworozi, Dr Gerardine Mukeshimana yabwiye abadepite ko abantu benshi bagiye kubona akazi kavuye mu bikorwa by'ubuhinzi
Minisitiri w'Ubuhinzi n'Ubworozi, Dr Gerardine Mukeshimana

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza