Abiga kaminuza bahawe amahirwe yo gutsindira imigabane 10 000 ku isoko ry’imari n’imigabane

Yanditswe na Rabbi Malo Umucunguzi
Kuya 18 Gicurasi 2017 saa 06:08
Yasuwe :
0 0

Ikigo Kigenzura Isoko ry’Imari n’Imigabane mu Rwanda (CMA) cyatangije amarushanwa y’abanyeshuri biga mu mashuri makuru na kaminuza mu gihugu, rizakorwa hasuzumwa ubumenyi bafite ku Isoko ry’Imari n’Imigabane.

Ni irushanwa rizwi nka Capital Market University Challenge 2017, rizahesha abanyeshuri babiri ba mbere gutsindira imigabane mu bigo biri ku isoko ry’imari n’imigabane, umwe akazahabwa imigabane 10 000 undi 5000.

Iri rushanwa rigiye kuba ku nshuro ya kane ryatangijwe ku mugaragaro kuri uyu wa Gatatu tariki 17 Gicurasi 2017 muri Kaminuza y’Abadivantisiti ya Afurika yo Hagati. Rizahuza abiga mu mashuri makuru na kaminuza mu Rwanda kugeza ku wa 9 Kamena 2017, rigamije kwinjiza mu rubyiruko umuco wo kuzigama no gushora imari rwifashishije isoko ry’imari n’imigabane.

CMA yatangaje ko muri iyi gahunda yatangiye bwa mbere mu 2012, bitegayijwe ko hazagenda hakorwa isuzumabumenyi ku isoko ry’imari n’imigabane no gukora umwandiko ku nsanganyamatsiko yo ‘guteza imbere urubyiruko binyuze mu isoko ry’imari n’imigabane (Growing the youth through capital market). Uzatsinda mu ibazwa azahembwa imigabane 10 000, uwagize umwandiko uhiga indi ahabwe imigabane 5000 mu kigo kiri ku isoko ry’imari n’imigabane.

Mu cyiciro kibanza cya ‘Capital Market University challenge’, abanyeshuri bo mu Ntara y’Amajyaruguru bazahurira mu ishuri rya Kaminuza y’u Rwanda ry’Ubuhinzi n’Ubuvuzi bw’amatungo (UR CAVM) kuwa 20 Gicurasi 2017.

Mu Ntara y’Amajyepfo bazahurira muri Kaminuza y’u Rwanda ishami rya Huye kuwa 20 Gicurasi 2017, mu Ntara y’Iburasirazuba bahure kuwa 24 Gucrasi muri UR Nyagatare, naho mu Ntara y’Iburengerazuba bahurire muri ULK Gisenyi kuwa 24 Gicurasi 2017.

Mu Mujyi wa Kigali ho iki gikorwa giteganyijwe kuwa 26 Gicurasi muri Kaminuza y’Abadivantisiti ya Afurika yo Hagati, umunsi wa nyuma ukazaba kuwa 9 Kamena, mu gikorwa kizabera muri Serena Hotel.

Iri rushanwa rizakorwa ku bufatanye bw’Ikigo kigenzura isoko ry’Imari n’Imigabane, Isoko ry’Imari n’Imigabane (RSE), Ikigo cy’Ubushakashatsi kubukungu (EPRN) n’Umuryango mpuzamahanga w’abanyeshuri mu by’ubukungu n’ubumenyi bucuruzi (AISSEC).

Umuyobozi Mukuru w’Ikigo kigenzura isoko ry’imari n’imigabane, Robert Mathu, yagize ati “Capital Market University Challenge’ igamije kwinjiza urubyiruko mu isoko ry’imari n’imigabane no kubatoza umuco wo kuzigama bakiri muri za kaminuza.”

Yakomeje avuga ko bifuza no kubashishikariza kwitabira iri soko nk’abantu bazaba barigize mu gihe kiri imbere.

Moses Asiimwe witabiriye igikorwa nk’iki giheruka, yavuze ko nk’umwe mu begukanye irushanwa riheruka ashishikariza abanyeshuri bose muri za kaminuza gushyira imbaraga zabo mu irushanwa bagatangira kwizigamira no gushora imari binyuze mu isoko ry’imari n’imigabane.

Abanyeshuri bafite ibinezaneza byo kuzitabira Capital Market University Challenge 2017
Bizeye kungukira byinshi muri Capital Market University Challenge 2017
Abanyeshuri biga muri Kaminuza zitandukanye bitabiriye umuhango wo gutangiza Capital Market University Challenge 2017
Abanyeshuri biga muri Kaminuza zitandukanye bitabiriye umuhango wo gutangiza Capital Market University Challenge
Uhereye ibumoso_ Robert Mathu, Umuyobozi Mukuru w'Ikigo kigenzura Isoko ry'Imari n'Imigabane, Celestin Rwabukumba, Umuyobozi Mukuru w'Isoko ry'Imari n'Imigabane
Celestin Rwabukumba, Umuyobozi Mukuru w'Isoko ry'Imari n'Imigabane (RSE) avuga ijambo
Robert Mathu, Umuyobozi Mukuru w'Ikigo kigenzura Isoko ry'Imari n'Imigabane (CMA)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza