Kwamamaza

Afurika ihombera asaga miliyari 50$ buri mwaka mu byaha bimunga ubukungu

Yanditswe kuya 27-10-2016 saa 06:58' na Philbert Hagengimana


Nubwo atari ko ibihugu byose bitanga imibare yizewe, Umuryango wa Afurika Yunze Ubumwe ugenekereje, usanga uyu mugabane uhomba amadolari ya Amerika asaga Miliyari 50 buri mwaka bitewe n’ibyaha birimo kunyereza imisoro, umutungo n’ibindi bikorerwa mu rwego rw’imari.

Ibi byatangajwe na Minisitiri w’Imari n’Igenamugambi, Ambasaderi Gatete Claver, mu muhango wo gutangiza ku mugaragaro ihuriro ry’abasaga 200 baturutse hirya no hino ku Isi, barimo inzobere mu by’amabanki n’abakora mu nzego zigenzura iby’imari ku mugabane wa Afurika. Iryo huriro ryateguwe na Afreximbank, Banki Nyafurika iteza imbere ndetse inatera inkunga ubucuruzi ku mugabane wa Afurika no hagati y’indi migabane (African Export-Import Bank).

Minisitiri Ambasaderi Gatete yibukije ko ibyaha byibasira ubukungu bihangayikishije Isi, birimo kunyereza umutungo, kunyereza imisoro, ubucuruzi bwa magendu n’ibindi. Ibyo bikorwa kandi ngo bikomeje koreka ubukungu bw’Isi, bikanazitira iterambere rirambye ryayo.

Minisitiri Gatete yagize ati “Kuri ubu, Umuryango wa Afurika yunze ubumwe, ugenekereza ko uyu mugabane uhomba miliyari 50 z’amadolari buri mwaka, ariko iyo mibare igenekereje ishobora kuba iri hasi cyane y’imibare nyakuri bitewe n’uko hataraboneka imibare nyayo yo mu bihugu byose bya Afurika. Ibyo bikorwa bitemewe bigira ingaruka zikomeye ku musaruro no ku iterambere ry’ubukungu bw’amabanki n’abafatanyabikorwa bayo bo ku rwego rwo hejuru.”

Afurika ku isonga mu bwiyongere bw’ibyaha bikorerwa mu rwego rw’imari

Mu myaka 20 ishize, ibyaha byakozwe mu rwego rw’imari byarazamutse ku ijanisha riyingayinga 40% muri rusange nk’uko Minisitiri Gatete yabigaragaje. Hagati y’umwaka wa 2014 na 2016, ibikorwa nk’ibyo muri Afurika byazamutse kuva kuri 50% bigera kuri 57%.

Mu Burengerazuba bw’u Burayi byazamutse kuva kuri 35% kugeza kuri 40%, naho mu Burasirazuba bwo hagati bizamuka kuva kuri 21% kugera kuri 25%. Icyakora muri Amerika y’Amajyaruguru ho ibyo byaha byaragabanutse, kuko biri kuri 37% mu mwaka wa 2016 bivuye kuri 41% mu 2014.

Minisitiri Amb.Gatete yaboneyeho guhamagarira abitabiriye iryo huriro, kurushaho kurwanya ibyo byaha kuko aho biri ubukungu burazahara.

Afreximbank, umwe mu baterankunga mu kubaka Kigali Convention Centre

Afreximbank ni Banki Nyafurika yashyizweho mu Ukwakira 1993, ishinzwe n’Abakuru b’ibihugu n’aba za Guverinoma muri Afurika, abashoramari b’abanyafurika n’abanyamahanga.

Iyo Banki yashyizweho hagamijwe gukemura ibibazo byo mu bucuruzi, ishoramari no mu bindi byo mu rwego rw’imari, cyane mu byoherezwa mu mahanga n’ibyinjizwa mu gihugu, ibyo bigakorwa hifashishijwe gutera inkunga imishinga y’iterambere.

Iyo banki yanagize uruhare mu kubaka Kigali Convention Centre, ari nayo mpamvu Minisitiri w’Imari n’igenamigambi, Ambasaderi Gatete Claver yayishimiye mu ruhame.

Ati “Mu Rwanda ntabwo twatangiye gukorana na yo kera, ariko ubu turi bamwe mu bagize iyi banki, twubaka iyi hoteli ya Radisson na Kigali Convention Centre twaje kubiyambaza kugira ngo badufashe kuko na yo tuyibara nk’ibyoherezwa mu mahanga, n’izi nama zibera aha tuzifata nk’ibyoherezwa mu mahanga bifasha igihugu cyacu kuzana amadevize. Kuri ibyo rero twarabiyambaje baduha arenga miliyoni 130 z’Amadolari ya Amerika, ntabwo ari bo bonyine ariko na bo baduteye inkunga.”

Iryo huriro ngarukamwaka riteraniye i Kigali, rizamara iminsi ibiri uhereye kuri uyu wa 26 Ukwakira 2016, aho riri kuba ku nshuro ya gatatu, dore ko ku nshuro ya mbere ryateraniye i Dakar muri Senegal, irya kabiri ryarabereye muri Seychelles.

Minisitiri Gatete(iburyo) avuga ko ibyaha bikorwa mu rwego rw’imari bihombya Afurika miliyari 50 z’Amadolari buri mwaka
Umuyobozi Mukuru wungirije w’Ikigo cy’Igihugu cy’imiyoborere (RGB), Fatuma Ndangiza

Amafoto:Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved