Amajyepfo: RRA yashimiye abasora baje ku isonga mu gutanga neza imisoro

Yanditswe na IGIHE
Kuya 24 Nzeri 2017 saa 11:40
Yasuwe :
0 0

Ikigo cy’Imisoro n’Amahoro cyashimye uko Intara y’Amajyepfo yitwaye mu misoro mu mwaka wa 2016-17 kuko ku misoro yagomba kwinjira habayeho kwesa umuhigo ku kigero cya 120.6%, inahemba abasora bitwaye neza mu kwishyura neza kandi ku gihe.

Nk’uko biri gukorwa mu gihugu hose, kuwa Gatanu tariki ya 22 Nzeri nibwo hari hatahiwe Intara y’Amajyepfo mu kwizihiza umunsi wo gushimira abasora. Ibi birori bikaba byarabereye mu Karere ka Muhanga.

Komiseri Mukuru wungirije wa RRA, Ruganintwari Pascal, yagaragaje ishusho y’uko imisoro yinjiye mu gihugu avuga ko muri rusange hari intera imaze kugerwaho ku rugero rw’imyumvire mu misoro, aho abasora benshi bibwiriza gutanga umusoro.

Yagize ati “Amafaranga yakusanyijwe mu isanduku ya Leta angana na miliyari 1,103 ku ntego RRA yari ifite ingana na miliyari 1,094.3. Ni ukuvuga ko hinjiye imisoro n’atari imisoro ku ijanisha rya 100.8%. Ku ntego RRA yari ifite harenzeho miliyari 8.7 Frw. Naho ku misoro n’amahoro byeguriwe inzego z’ibanze, RRA yakusanije amafaranga angana na miliyari 47.9 mu gihe intego yari miliyari 49.2 Frw. Iyi ntego yagezweho ku kigero cya 97.3%.”

Nubwo imisoro yeguriwe inzego z’ibanze itageze ku 100% ndetse inarenze, ntibyabujije ko habayeho inyongera ingana na 18.6% ugereranije n’amafaranga yari yakusanijwe umwaka wa 2015/16.

Komiseri Mukuru wungirije yagaragaje ko Intara y’Amajyepfo yashoboye gukusanya imisoro y’imbere mu gihugu ingana na miliyari 26.48 Frw mu gihe yari ifite intego ingana na miliyari 21.96 Frw ikaba yararengejeho miliyari 4.5 Frw, ni ukuvuga ko yesheje umuhigo ku ijanisha rya 120.6%.

Ku misoro n’amahoro byeguriwe uturere, Intara y’Amajyepfo yakusanyije miliyari 6.3 Frw ku ntego ingana na miliyari 6.1 Frw yari ifite, bihwanye na 103.3%.

Urugaga rw’Abikorera ruvuga ko uburyo RRA igenda yegereza abasora uburyo buborohereza gusora, nka E-Tax, M-Declaration ndetse na EBM buri mu bituma imisoro irushaho gutangwa neza.

Guverineri w’Intara y’Amajyepfo, Mureshyankwano Marie Rose, yashimiye abasora muri iyi ntara ku ruhare bagira kugira ngo imisoro iboneke aribyo bifasha igihugu gutera imbere.

Yahamagariye abasora kurushaho guharanira kwigira, bashishikariza abakigaragaraho intege nke mu gutanga imisoro kwikosora bagatanga neza umusoro kandi ku gihe.

Mu munsi ngarukamwaka wo gushimira abasora watangiye kwizihizwa muri 2002, abasora n’Abanyarwanda muri rusange bamurikirwa imisoro yakusanijwe kandi ababigizemo uruhare bose bagashimirwa.

Muri uyu mwaka, ibi birori byatangirijwe mu Ntara y’Iburengerazuba tariki ya 13 Nzeri 2017, hakurikiraho iy’Amajyaruguru wizihirijwe mu Karere ka Musanze tariki ya 21 Nzeri 2017. Nyuma y’iby’Intara y’Amajyepfo byijihijwe kuwa 22 Nzeri, hatahiwe Intara y’Iburasirazuba, bizabera mu Karere ka Rwamagana tariki ya 27 Nzeri 2017.

Umunsi mukuru ku rwego rw’igihugu uteganyijwe ku itariki ya 6 Ukwakira 2017 ukazabera mu Mujyi wa Kigali. Insanganyamatsiko y’uyu mwaka igira it "Umusoro wanjye, Iterambere ryanjye, Agaciro kanjye".

Guverineri w’Intara y’Amajyepfo, Mureshyankwano Marie Rose ashimira Uhagarariye Hotel Mater boni consilii wabaye uwa mbere mu Majyepfo mu gutanga umusoro neza
Abasora mu Ntara y'Amajyepfo bitabiriye umunsi wagenewe gushimira abitwaye neza
RRA yashimiye abasorabatanze umusoro neza kandi ku gihe

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza