BK yungutse miliyari 5.6 Frw mu gihembwe cya mbere cya 2017

Yanditswe na Rabbi Malo Umucunguzi
Kuya 24 Gicurasi 2017 saa 06:17
Yasuwe :
1 0

Banki ya Kigali (BK) yatangaje ko mu gihemwe cya mbere cya 2017 yungutse amafaranga miliyari 5.6 w nyuma yo gutanga umusoro no kwishyura ibindi bikorwa, iyo nyungu ikaba yariyongereyeho 5.8% ugereranyije n’uko byari bihagaze mu mwaka ushize.

Kuri uyu wa Gatatu nibwo BK yatangaje ko mu mezi atatu ya mbere ya 2017 kugeza kuwa 31Werurwe yagize inyungu ya miliyari 7.9 Frw hatarishyurwa umusoro, n’umutungo mbumbe ugera kuri miliyari 661.6 Frw.

Umuyobozi muri Banki ya Kigali ushinzwe imari, Nathalie Mpaka, yabwiye itangazamakuru ko muri aya mezi ashize BK yateye intambwe ikomeye kurusha n’urwego rw’imari muri rusange.

Amafaranga y’abakiriya muri BK yiyongereyeho 3.5%, ava kuri miliyari 419 Frw agera kuri miliyari 433.7 Frw; inguzanyo zatanzwe nazo ziyongereyeho 10.4% ugereranyije n’igihembwe nk’iki umwaka ushize, zigera kuri miliyari 426.1 Frw zivuye kuri miliyari 385.8 Frw.

Umuyobozi wa Banki ya Kigali, Dr Diane Karusisi, yavuze ko bifuza gukomeza kongera umubare w’inguzanyo zitangwa, mu nyungu z’iterambere ry’igihugu.

Yagize ati “Uyu munsi mu Rwanda hari gahunda ya Made in Rwanda, gahunda igamije ko abaturage bakorera kandi bakagura ibikorerwa mu Rwanda. Natwe turi kureba imishinga nk’iyo myiza ishobora guterwa inkunga, ni ibintu byiza kuri twe.”

Akomeza agira ati “Tuzaba turi gufasha ubukungu bw’u Rwanda ariko tunagura ibikorwa byacu. Turi gushaka imishinga myiza twashoramo amafaranga, kuko bifite akamaro ku rwego rw’ubukungu, guhanga imirimo no kwagura ubucuruzi.”

BK iheruka gutangaza imishinga 50 ubu iri gukurikiranwa ba nyirayo bahabwa amahugurwa, izatoranywamo ikazagurizwa miliyoni 60 Frw zitagira inyungu.

Dr Karusisi yavuze ko inguzanyo zitishyurwa muri BK mu gihembwe cya mbere zari kuri 4.7%, umubare avuga ko uhagaze neza ku isoko ry’amabanki kuko Banki Nkuru isaba ko zitarenga 5%.

Yakomeje avuga ko ubu hari kubakwa uburyo buzatuma abantu bazajya baka inguzanyo kuri telefoni zabo bitabasabye kujya ku ishami ryayo.

Ati “Muri ubwo buryo hazajya hatangwa inguzanyo y’amafaranga make atagera muri miliyoni, ariko akazaba afasha nk’abahinzi kugura imbuto, abakora ubucuruzi buciriritse nabo bakabuteza imbere, kandi iyo nguzanyo ikaboneka mu buryo bwihuse.”

Kugeza kuwa 31 Werurwe, BK yatanze serivisi ku bakiriya basanzwe 241,300 n’abanini bagera ku 25,100. Yari imaze kugira abayihagarariye 1321, amashami 79, ibyuma bya ATM 93 n’ibifasha mu kwishyura ibintu bitandukanye (POS) 1038 kandi byakira amakarita yose arimo Visa na MasterCard.

Umuyobozi wa Banki ya Kigali, Dr Diane Karusisi
Umuyobozi ushinzwe imari muri Banki ya Kigali, Nathalie Mpaka

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza