Bralirwa Plc yatangaje inyungu ya miliyari 7.2 Frw mu 2018, yizeza ibinyobwa bishya ku isoko

Yanditswe na Rabbi Malo Umucunguzi
Kuya 26 Mata 2019 saa 04:10
Yasuwe :
0 0

Uruganda rwenga ibinyobwa bisembuye n’ibidasembuye, Bralirwa Plc, rwatangaje ko kugeza ku wa 31 Ukuboza 2018, ingano y’ibinyobwa rwacuruje yazamutse kuri 14.6 % ahanini bitewe n’ikinyobwa cya Mutzig, urwunguko narwo ruzamukaho 14.6%.

Bralirwa mu mwaka ushize yacuruje hegitolitiro miliyoni 1.7 zivuye kuri hl miliyoni 1.5. Urwunguko mbere yo kwishyura umusoro rwari miliyari 10.3 Frw, nyuma yo kwishyura imisoro inyungu iba miliyari 7.2 Frw. Iyi nyungu ingana n’izamuka rya 42.6% kuko mu 2017 inyungu nyuma yo kwishyura umusoro yari miliyari 5.0 Frw.

Umuyobozi Mukuru wa Bralirwa, Merid Demissie, yavuze ko isoko ry’ibinyobwa cyane cyane inzoga ritahagaze neza mu mwaka ushize, ariko uru ruganda rwakomeje kwitwara neza ku isoko ahanini kubera ikinyobwa cya Mutzig.

Muri Gashyantare 2018 kandi uru ruganda rwazanye Amstel 100% Malt yakunzwe cyane, mu Ukuboza 2018 rutera intambwe idasanzwe yo kwengera mu Rwanda ikinyobwa cya Heineken kandi cyujuje ibyangombwa mpuzamahanga.

Demissie yagize ati “Muri Heineken twahaye abakiliya cya cyanga cy’umwimerere cya Heineken kandi ku giciro gito.”

Amafaranga akoreshwa n’uruganda yiyongereyeho 34.5% agera kuri miliyari 15.2 Frw bitewe n’ishoramari ryakozwe muri Heineken ngo itangire kwengerwa mu Rwanda n’uburyo bushya bwo gutunganya amazi mabi mu rwengero rwa Gisenyi.

Uru ruganda rwatangaje ko umwenda warwo wiyongereho 12.9 % kubera ishoramari ryakozwe mu kwengera mu Rwanda ikinyobwa cya Heineken, ugera kuri miliyari 47.7 Frw.

Bralirwa ivuga ko hari icyizere ko umwaka wa 2019 uzarushaho kuba mwiza kubera “ibicuruzwa bishya bizashyirwa ku isoko.”

Biteganyijwe ko mu nyungu yabonetse, abanyamigabane ba Bralirwa Plc bazahabwa amafaranga y’u Rwanda 5.5 ku mugabane, avuye kuri 3.7 yatanzwe mu 2017. Gusa bizabanza kwemezwa n’Inama y’Inteko rusange iteganyijwe ku wa 22 Gicurasi 2019. Inyungu izahabwa abanyamigabane ingana na 78.1 % by’inyungu yose.

Abayobozi ba Bralirwa Plc mu kiganiro n'abanyamakuru kuri uyu wa Gatanu
Bralirwa ni rwo ruganda nyarwanda rwa mbere rufite ibinyobwa byinshi ku isoko mu gihugu
Iki kiganiro cyitabiriwe n'abahuza ku isoko ry'imari n'imigabane batandukanye, kuko Bralirwa Plc ari kimwe mu bigo bicuruza imigabane
Marcel Oosterveld ushinzwe imari muri Bralirwa Plc yungurana ibitekerezo na Merid Demissie uyobora uru ruganda, mu kiganiro n'abanyamakuru kuri uyu wa Gatanu
Umunyamabanga wa Bralirwa Godfrey Kamukunde aganira na Aline Pascale Batamuliza ushinzwe ibikorwa rusange n'itumanaho, mu itangazwa ry'uburyo Bralirwa yitwaye ku isoko mu mwaka ushize
Umuyobozi wa Bralirwa Merid Demissie yijeje ko uru ruganda ruzashyira ku isoko ibinyobwa bishya muri uyu mwaka
Uruganda rwa Bralirwa rukora ibinyobwa bidasembuye n’ibisembuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza