BRD yagaragaje ko gutanga inguzanyo mu buhinzi bibumbatiye iterambere ry’ubukungu

Yanditswe na Cyprien Niyomwungeri
Kuya 5 Kanama 2017 saa 07:38
Yasuwe :
0 0

Intego z’icyerekezo 2020 na gahunda y’Imbaturabukungu (EDPRS II), zisobanura neza ko ubuhinzi n’ubworozi ari inkingi mwikorezi y’ubukungu bw’u Rwanda, kuko bufite uruhare runini mu kurandura ubukene no guteza imbere ubukungu, binyuze mu guhanga imirimo no kuzamura urwego rw’inganda.

Nubwo abanyarwanda barenga 70% bakora ubuhinzi, kandi uru rwego rukaba ruhanzwe amaso mu iterambere rusange ry’igihugu, rufite imbogamizi yo kuba amabanki, ibigo by’imari n’abandi bashoramari baseta ibirenge mu gutanga inguzanyo mu mishinga y’ubuhinzi ahanini bitewe n’imyumvire ku bihombo byabwo, imicungire, ubushobozi buke bwo gutegura imishinga n’ibindi.

Mu myaka 20 ishize Guverinoma n’abandi bafatanyabikorwa bashyizeho gahunda nyinshi zigamije gukemura izi mbogamizi harimo; ibigega by’ingwate, ikigega gitera inkunga imishinga yo kohereza ibicuruzwa mu mahanga kibarizwa muri Banki Nyarwanda y’iterambere (BRD), ifite n’ishami ryita ku iterambere ry’ubuhinzi.

Umuyobozi w’ishami ry’ubuhinzi muri BRD, Kalema Juvenal, atangaza ko kugeza ubu BRD ariyo banki itanga inguzanyo nini mu rwego rw’ubuhinzi ikanarutera inkunga. Ibi bikorwa kugira ngo Guverinoma izagere ku ntego yo guteza imbere ubuhinzi ku kigero cya 8.5%, kuvugurura ubuhinzi no gutinyura ibindi bigo by’imari gutanga inguzanyo muri uru rwego.

Yagize ati “Intego y’ibanze ya BRD ni ugutanga amafaranga ku bashoramari bikorera mu bijyanye n’iterambere ry’ubuhinzi no kubuvugurura.”

Mu 2015 gusa, BRD yatanze miliyari 24 z’amafaranga y’u Rwanda bingana na 38% by’inguzanyo zose. Yagennye miliyoni 170 z’amadolari ya Amerika zo gutera inkunga imishinga yo kongerera agaciro umusaruro w’ubuhinzi n’ubworozi, kuhira imyaka, guhinga kijyambere no gukoresha ikoranabuhanga mu buhinzi.

Ubuhinzi buzungukira kuri Miliyoni 220$

BRD ifite miliyoni 220 z’amadolari ya Amerika zizakoreshwa mu kohereza ibicuruzwa mu mahanga harimo n’ibikomoka ku buhinzi. Iyi gahunda izakorwa binyuze mu kuguriza ibigo by’imari, amabanki na za Koperative zo kuzigama no kugurizanya (Sacco) ku giciro gito bityo nazo zegere abahinzi zibagurize.

Gahunda zo guteza imbere ubuhinzi zatumye umusaruro wiyongera

Zizakoreshwa kandi mu gutera inkunga imishinga yo gutubura imbuto no kuzongerera agaciro, gutera inkunga imishinga y’ubucuruzi mu bworozi, gutera inkunga imishinga y’inganda zongerera agaciro ibikomoka ku buhinzi n’ibikorwa remezo byo guhunika umusaruro, ubucuruzi bw’ibikoresho byo mu buhinzi n’ubworozi, ubwishingizi bwo kohereza mu mahanga ibikomoka ku buhinzi, gutanga ubufasha mu bya tekiniki n’ibindi.

Kalema avuga ko kuvugurura ubuhinzi no kuhira imyaka ari gahunda BRD yiyemeje gushoramo imari. Iyi gahunda irimo ibijyanye n’imishinga yo gukwirakwiza ifumbire n’ibikoresho byo kuhira.

Yagize ati “Igihugu gifite intego yo kuba mu 2018 hari hegitari 100 000 zuhirwa, mu rwego rwo gutanga umusanzu muri iyi ntego, BRD izatanga inguzanyo ku bantu ku giti cyabo, amakoperative n’ibigo cyangwa mu bigo by’imari bitanga inguzanyo ku bahinzi bato.”

Umwihariko mu kongerera agaciro ibikomoka ku buhinzi

BRD igiye gutangiza gahunda yo gutanga inguzanyo no gutera inkunga imishinga yo kongerera agaciro ibikomoka ku buhinzi n’ubworozi, izahera ku muhinzi cyangwa umworozi wo hasi.

Mu rwego rwo kongera ubwinshi n’ubwiza bw’umusaruro, BRD izafasha abacuruza ibijyanye n’ubuhinzi birimo; ifumbire, imashini, ibikoresho by’ubwikorezi, ibyo gufungamo umusaruro, ibahe igishoro kizatuma babasha guherekeza abahinzi kugera ku musaruro mwiza.

Iri shoramari ryose ryitezweho gutuma igihugu kigera ku ntego yo gukoresha ifumbire ingana kilogarama 45 kuri hegitari mu 2020. Bizongera kandi ingano y’ibyoherezwa mu mahanga, bihange imirimo, binakurure abashoramari.

Muri rusange imari izajya mu kongera umusaruro w’ubuhinzi ibarirwa muri miliyoni 92 z’amadolari ya Amerika mu myaka itanu, bikazatuma ishoramari muri urwo rwego rigera kuri miliyoni 207 z’amadolari ya Amerika.

BRD ifasha amakoperative kongera ubumenyi mu bijyanye n’imicungire, ibijyanye n’ubwishingizi, inguzanyo zihendutse z’igihe kirekire ku mishinga y’ubuhinzi, byose bigamije gukemura inzitizi zatumaga abahinzi batabona inguzanyo.

Mu mpera za 2017, BRD irateganya gutanga inguzanyo ku mishinga y’ubuhinzi irenga miliyari 10 z’amafaranga y’u Rwanda. Iragirana kandi ibiganiro n’ibigo by’ubwishingizi kugira ngo byishingire uru rwego. Abantu ku giti cyabo bafite imishinga y’ubuhinzi bashobora guhabwa inguzanyo guhera kuri miliyoni 50 z’amafaranga y’u Rwanda.

Guhuza ubutaka no kurushaho gukoresha ifumbire biri mu bituma umusaruro w'ibirayi wikuba inshuro nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza