Bugarama: Inganda zakenesheje abahinzi b’umuceri

Yanditswe na Sitio Ndoli
Kuya 10 Kanama 2017 saa 07:15
Yasuwe :
0 0

Abahinzi b’umuceri mu kibaya cya Bugarama baravuga ko kuva basarura, umuceri waheze ku mbuga kubera ko inganda zitari kugura cyane umusaruro kandi ariko ko bari baremeranyijwe.

Aba bahinzi barasaba ubuyobozi ko inganda zo mu tundi turere zakomorerwa zikaza kugura umuceri aho kugira ngo bicwe n’inzara ndetse ntibabone amafaranga yo kugura ubwisungane mu kwivuza.

Aba bahinzi bavuga ko inganda zigura neza ari ebyiri gusa kandi zikaba zidafite ubushobozi bwo kugura umusaruro wabo wose.

Umuhinzi Bikorimana Eppafrodite ati “Kuva mu kwezi kwa gatandatu, twasaruye mu matariki ya mbere ariko imiceri yaheze ku bibuga, inzara iratwishe, inganda ziri gutwara umuceri zigonorwa. Ni ukuvuga ngo ubu kugura mituelle byarahagaze ndetse no gutegura imirima mu gishanga byaranze kubera nta mafaranga ngo dushyiremo abakozi.”’

Tuyisenge Joseph yunzemo ati “Umuceri ntupimurwe, tugategereza ko inganda ziza ariko wapi, imifuka yatangiye gushwanyagurika kuburyo twatangiye kuyitwikira, ubu inzara imeze nabi, turifuza ko akarere katuzanira izindi nganda z’ahandi kuko tubona izo mu kibaya za naniwe.”

Aba bahinzi bakomeza bemeza ko batewe impungenge zuko bazatangira igihembwe cy’ihinga kizatangira mu kwezi kwa cyenda kuko amafaranga bakura mu muceri bakuramo ayo kugura ifumbire.

Umuhinzi witwa Harerimana Jacques yagzie ati “Urareba mu kwezi kwa cyenda turaba dutangiye guhinga, ubwo se tuzahinga dute tutaguze ifumbire, urumva ko dushobora kuzacyererwa bigatuma n’umusaruro tuzabona ugabanuka.”

Ushinzwe iterambere n’ishoramari mu Karere ka Rusizi, Nyabyenda Emile, nawe yemeje ko inganda ziri kugura umusaruro w’abaturage ku muvuduko uri hasi cyane kandi ko babahaye umunsi ntarengwa wo kuba barangije ku buryo byanze aribwo bafata izindi ngamba.

Yagize ati “Inganda zose ntabwo ziri kugura, rumwe nirwo rwagize ikibazo ntirwagura ariko izo ngizo zaraguraga. Ikibazo cyabayeho ni uko zitabashije kugura ku muvuduko kuko abaturage baba bejeje, basaruriye rimwe ugasanga bifuza ko byihuta cyane ariko ni uko ikibazo ari umusaruro mwinshi; kuwugura bisaba ubushobozi bwo hejuru cyane, usanga inganda zidafite ubwo bushobozi bwo hejuru, basabye iminsi 15 bazaba bamaze gutwara umusaruro, ntabwo iragera ubwo nibwo dutegereje tuzamenya ikibazo bagize noneho tujye twafata izindi ngamba.”

Mu kibaya cya Bugarama gifite hegitare 1500 gikora ku murenge ya Gikundamvura, Muganza, Nyakabuye na Gikundamvura, habarurwa inganda zitonora umuceri eshanu ariko rumwe rwahagaritse kugura umusaruro. Igihembwe gishize abahinzi basaruye umuceri ungana na toni 6658.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza