Guverinoma yongereye igihe cyo kugurisha imigabane yayo iri muri CIMERWA

Yanditswe na IGIHE
Kuya 18 Nyakanga 2019 saa 08:28
Yasuwe :
0 0

Leta y’u Rwanda yongereye igihe cyo kugurisha imigabane yayo mu ruganda rukora sima rwa Cimerwa, bishyirwa kuwa Gatanu tariki 19 Nyakanga 2019.

Impamvu yo kongera igihe ni uguha amahirwe abandi bashoramari bashaka kugura iyo migabane nkuko itangazo ry’Ikigo cy’Igihugu gishinzwe Iterambere (RDB) ryabigaragaje.

The New Times dukesha iyi nkuru ivuga ko abashoramari bifuza kugura iyo migabane bahawe kuba batanze amabaruwa tariki 5 Nyakanga uyu mwaka.

Guverinoma y’u Rwanda ifite imigabane ingana na 16.54 % muri CIMERWA binyuze mu kigega Agaciro Development Fund.

Abandi bashoramari muri urwo ruganda barimo SORAS Group, RSSB na Rwanda Investment Group (RIG) bagaragaje ko bifuza kugurisha imigabane yabo muri Cimerwa.

Imigabane yose hamwe ya Leta y’u Rwanda n’abafatanyabikorwa bayo igera kuri 49 %, bivuze ko ku bashoramari hari amahirwe yo kwegukana imigabane 17,228,878.

Uruganda rwa sima rwo muri Afurika y’Epfo, Pretoria Portland Cement (PPC) nirwo rufitemo imigabane myinshi ingana na 51 % ari narwo mushoramari mukuru guhera mu 2012.

Cimerwa yari yitezweho impinduka ariko Guverinoma yaje gutakaza icyizere nyuma y’uko ibyari byemeranyijweho byo guhaza isoko ry’u Rwanda kuri sima bitari kugerwaho.

Abakiliya ba sima bagaragaza ko ibiciro bikiri hejuru kandi imibare yerekana ko hari sima ikivanwa mu bindi bihugu cyane cyane ibyo mu karere.

Cimerwa ifite ubushobozi bwo gutunganya sima ingana na toni 600 000 ku mwaka ariko ntijya ibigeraho.

Banki Nkuru y’Igihugu itangaza ko umwaka ushize Cimerwa yatunganyije sima ingana na toni 364,864 mu gihe sima ikenerwa mu Rwanda ku mwaka ingana na toni 640,455.

Kwiyongera kwa sima ikoreshwa mu Rwanda muri iyi minsi bituruka ku mishinga ikomeye y’ubwubatsi iri gukorerwa mu gihugu nk’umushinga wo kubaka ikibuga mpuzamahanga cya Bugesera n’uruganda rwa Nyiramugengeri ruri i Gisagara mu Ntara y’Amajyepfo.

Guverinoma y’u Rwanda ifite imigabane ingana na 16.54 % muri CIMERWA binyuze mu kigega Agaciro Development Fund

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza