Hagiye gushyirwaho ikigega cya Miliyari zisaga 200 Frw kizunganira iyubakwa ry’inzu ziciriritse

Yanditswe na Jean Pierre Tuyisenge
Kuya 9 Gicurasi 2017 saa 06:43
Yasuwe :
3 0

Minisiteri y’Ibikorwa remezo (MININFRA), yatangaje ko muri Nyakanga 2017 izaba yamaze gushyiraho ikigega kiri hagati ya miliyoni 200$ na 250$ kizafasha mu korohereza abubaka inzu ziciriritse zo guturamo.

Minisitiri w’Ibikorwa remezo, James Musoni, ubwo yari imbere ya Komisiyo y’Ingengo yImari n’Ubukungu mu Nteko Ishinga Amategeko kugira ngo baganire ku mbanzirizamushinga y’Ingengo y’Imari y’umwaka wa 2017/2018, yavuze ko icyo ari kimwe mu bisubizo bine byateganyijwe mu kwihutisha iyubakwa ry’inzu ziciriritse .

Yavuze ko icyo kigega kizafasha mu kugabanya inyungu ku nguzanyo bikazanatuma zihenduka haba kubashaka kuzigura cyangwa kuzikodesha.

Yagize ati " Kugira ngo ujye kubaka umushinga ungana utya, wagujije ku nyungu ya 18%, uyishyire mu giciro cy’inzu, ugiye kugura iyo nzu nawe ajye muri banki afate inguzanyo kuri 18% nawe, uratanga igiciro cy’inzu gihenze. Guverinoma rero igiye gushyiraho ikigega, turateganya ko muri Nyakanga uyu mwaka, twagitangiza kiri hagati ya miliyoni 200$ na 250$, hagamijwe kugabanya inyungu ku nguzanyo."

Usibye iki, Mininfra itangaza ko yafashe ingamba zo gukangurira abantu kubaka amacumbi bajya hejuru, Guverinoma y’u Rwanda ikazajya ibishyurira ibikorwa remezo birimo amazi, amashanyarazi, imihanda, fibre optique n’ibindi.

Ibi bishobora gutuma inzu zihenduka kuko byakozwe nyuma yo kubona ko 30% by’agenda ku nzu usanga yaragendeye mu bikorwa remezo. Byaje bikurikira indi ngamba Minisiteri yafashe yo guteganya ahantu hazajya hashyirwa izo nyubako hagahabwa abikorera.

Musoni kandi avuga ko bafashe icyemezo cyo guteza imbere ibikoresho byubakishwa bikorerwa mu Rwanda, ati "Tumaze kugira ibigo hano bikora ibikoresho byo kubaka, kandi bihendutse. Hari izikora inkuta bakazikorera mu ruganda bakaza bakazishinga bakaba bakubaka inzu nyinshi mu gihe gito kandi zihendutse, hari izikora amatafari n’ibindi byinshi."

Avuga ko bashyizeho amabwiriza y’uko ibyo bikoresho bigomba kuba bihendutse kurusha ibitumizwa mu mahanga.

Ikindi cyakozwe ni uko ku itariki ya 19 Ukwakira 2016,Guverinoma y’u Rwanda ibinyujije muri Banki Itsura Amajyambere y’u Rwanda, BRD, yasinyanye amasezerano na Sosiyete yo muri Maroc, Palmeraie Development Group agamije kubaka inzu 5000 ziciriritse zo guturamo.

Izi nzu zikazubakwa mu kibanza gifite ubuso bungana na hegitari 20 giherereye mu Murenge wa Ndera mu Karere ka Gasabo.

Minisitiri yavuze ko kugeza ubu ingengo y’imari ya Minisiteri y’Ibikorwa remezo itwara 14% by’ingengo y’imari yose y’igihugu, bikaba bisaba ko ikoreshwa mu bikorwa bifatika kandi bikemura ibibazo by’abaturage.

Umuyobozi w’agateganyo w’Ikigo gishinzwe imiturire (RHA), August Kampayana, yavuze ko hari abashoramari kugeza ubu bamaze gutangira kwinjira mu bwubatsi bw’inzu ziciriritse haba mu Mujyi wa Kigali no mu mijyi yunganira Kigali.

Inyigo yakozwe ku bufatanye n’Umujyi wa Kigali, Umuryango w’Ubumwe bw’u Burayi(EU) na Minisiteri y’ibikorwa remezo mu 2012 yagaraje ko mu 2020, Kigali izaba ikeneye nibura inzu ziciriritse zisaga 344,000.

Muri Gashyantare 2017, RHA yatangaje ko yari ifite umushinga wo kubaka inzu 30,000, mu cyerekezo cya Leta cyo kubaka inzu ziciriritse, icyo gihe izisaga 1500 zari zaramaze kubakwa.

Hagiye gushyirwaho ikigega cya Miliyari zisaga 200 Frw kizunganira iyubakwa z’inzu ziciriritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244