Hari abakomeje kwitiranya BDF n’ikigega gitanga amafaranga

Yanditswe na Cyprien Niyomwungeri, Iradukunda Desire
Kuya 2 Kamena 2018 saa 09:57
Yasuwe :
0 0

Abanyarwanda bakomeje kugaragaza ko batarasobanukirwa imikorere y’ikigega BDF cyashyizweho na Leta y’u Rwanda ifatanyije na Banki itsura Amajyambere y’u Rwanda (BRD) ngo gifashe ba rwiyemezamirimo kubishingira mu bigo by’imari, aho hari abacyitiranya n’icyashyiriweho gutanga amafaranga.

Bamwe mu baturage baganiriye na IGIHE, bagaragaje ko batazi iki kigega ndetse n’abakizi batarasobanukirwa uko gikora bigatuma hari amahirwe menshi y’iterambere kibafitiye batabasha kubona.

Uwitwa Nizeyimana Faustin ukora umwuga wo gutwara abantu kuri moto muri Nyabugogo, avuga ko ataramenya ibyo ikigega BDF gikora. Ku ruhande rumwe ngo yumva ari ikigega gitanga amafaranga abantu bakiteza imbere.

Yagize ati “Njya nyibona aho ikorera mu Mujyi ariko ntabwo ndamenya ibyo ikora, nari nzi inyubako yayo gusa.”

Mugenzi we Munyagisaka Berchmas wo mu Karere ka Kamonyi ahitwa Rugarika, na we avuga ko BDF ari ikigega cyaje guha abanyarwanda amafaranga mu buryo bworoshye kuruta uko ibigo by’imari bibikora.

Yagize ati “Ubundi SACCO nta mafaranga baguha, bagenda bazarira. Nkatwe tumaze kubona uruhushya rwo gutwara ibinyabiziga, tuba dushaka intangiriro kugira ngo twiteze imbere na bo ubahe ibyabo.”

Uku kudasobanukirwa n’ikigega BDF n’imikorere yacyo nibyo byatumye gitegura ubukangurambaga bwo gusobanurira Abanyarwanda kuri serivisi gitanga n’uburyo bakigana kikabahuza n’ibigo by’imari bakorana nk’amabanki, ibigo by’imari biciciritse na za Sacco.

Ubu bukangurambaga bwahereye kuri serivisi y’ingwate izasobanurwa kuva kuri uyu wa 1 Kamena kugeza kuwa 22 Kamena 2018, hirya no hino mu gihugu.

Carine Mugwaneza ushinzwe kwamamaza ibikorwa muri BDF, yatangaje ko batangiye ubukangurambaga, bahera ku butumwa bwo kumenyekanisha ibijyanye n’ingwate batanga ku mishinga itandukanye.

Avuga ko basanze abantu benshi bazi ikigega BDF ariko batazi uko gikora kuko hari abazi ko gitanga amafaranga.

Yagize ati “Ikigo nka BDF abantu barakizi ariko ntibazi icyo dukora, icyo turimo gukora turabasobanurira ko BDF idatanga amafaranga ahubwo ibishingira kugira ngo babashe kubona amafaranga.”

Mugwaneza ashishikariza abaturage gukorana n’ibigo by’imari hanyuma na BDF ibishingire mu gihe bafite umushinga mwiza bashaka inguzanyo ariko nta ngwate.

Ati “Nk’umuntu udafite ingwate, twebwe nka BDF turahari ngo tubashe kumwishingira, abashe kubona inguzanyo.”

BDF ifitanye amasezerano n’ibigo by’imari byose mu Rwanda. Umuntu usaba inguzanyo ku kigo cy’imari kimusaba ibyangombwa byose bikenewe cyabona ko ingwate ye idahagije kikandikira BDF kiyisaba kwishingira umushinga we. Iyo iki kigega kibyemeye ahabwa inguzanyo.

Mu myaka irenga gato itandatu BDF imaze ikora, imaze kwishingira imishinga igera ku bihumbi 25.

Icyo wamenya ku ngwate ya BDF

Ikigega BDF gitanga ingwate ku mutungo utimukanwa ikaba yemerewe ibigo byose bito n’ibiciriritse, abantu ku giti cyabo, amashyirahamwe na za koperative n’inzego z’ishoramari. Ihabwa ubwoko bwose bw’ishoramari bugejeje ku mwaka umwe, imitungo, inganda, ibikoresho, amasambu, inyubako, ibinyabiziga, ubworozi n’ubuhinzi.

Itangwa mu gihe cy’imyaka 10. BDF yishingira 50% kugeza kuri 75% by’inguzanyo yatanzwe n’ibigo by’imari. Mu buhinzi n’ubworozi yishingira inguzanyo itarenze miliyoni 500 z’amafaranga no mu bindi bikorwa bitajyanye n’ubuhinzi n’ubworozi ntirenga miliyoni 500.

BDF itanga ingwate ku nguzanyo yo kuzahura ubucuruzi. Aha itanga 30% by’inguzanyo yahawe ubuhinzi bw’igihe gito na 50% ku nguzanyo yahawe ubucuruzi buto n’ubuciriritse. Ingano y’ingwate itangwa kuri miliyoni 500 mu buhinzi n’ubworozi na miliyoni 20 ku nguzanyo zo kuzahura ubucuruzi.

BDF i Nyabugogo mu bukangurambaga bwo gusobanurira abaturage imikorere y'iki kigega
Munyagisaka Berchmas wo mu Karere ka Kamonyi asobanurirwa uko BDF ikora
Carine Mugwaneza ushinzwe kwamamaza ibikorwa muri BDF
Abamotari bagaragaje inyota yo gusobanukirwa imikorere ya BDF

Amafoto: Serge Muhizi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza