Hatangijwe umushinga wa miliyoni zisaga 48$ uzafasha ingo ibihumbi 445 kubona amashanyarazi

Yanditswe na Cyprien Niyomwungeri
Kuya 14 Ugushyingo 2017 saa 07:39
Yasuwe :
0 0

Guverinoma y’u Rwanda ibinyujije muri Banki itsura amajyambere y’u Rwanda (BRD), kuri uyu wa Kabiri, yatangije ku mugaragaro umushinga wa miliyoni 48.9 z’amadolari ya Amerika, ni ukuvuga miliyari zisaga 41 z’amafaranga y’u Rwanda, azafasha ingo ibihumbi 445 kugerwaho n’amashanyarazi akomoka ku mirasire y’izuba bitarenze mu 2023.

Uyu mushinga watewe inkunga na Banki y’Isi, uzatanga amashanyarazi akomoka ku mirasire y’izuba ahanini mu bice by’icyaro, cyane cyane mu turere twa Nyaruguru, Gisagara, Nyamagabe, Gakenke n’ahandi hari igipimo gito cy’abaturage bafite amashanyarazi aturuka ku muyoboro rusange.

Uzafasha kandi abikorera gukora imishinga mito ibyara amashanyarazi atari ku muyoboro rusange. Aho muri rusange abaturage bazungukira muri uyu mushinga bazaba ari miliyoni imwe n’ibihumbi magana inani harimo abagore 53%.

Umuyobozi Mukuru wa BRD, Alexis Kanyankole, yasobanuye ko bazakorana n’Imirenge Sacco, amabanki n’ibigo by’imari icirirtse, bakabiguriza amafaranga ku nyungu iri munsi ya 10% nabyo bikaguriza abaturage bakabasha kugura amashanyarazi akomoka ku mirasire y’izuba.

Yagize ati “Umurenge Sacco niwo uzitabwaho kuko ari wo wegereye abaturage bakeneye amashanyarazi. Ni intambwe duteye ku rwego rw’igihugu muri rusange, ku mabanki n’abikorera ku giti cyabo, rwo kuba tugiye kugira uruhare mu kongera amashanyarazi mu gihugu cyacu.”

Miliyoni 44 z’amadolari azagenda mu bikorwa bijyanye n’amashanyarazi, izindi miliyoni zirenga enye zizifashishwa mu kuzamura ubushobozi bw’abafatanyabikorwa barimo Umurenge Sacco, amabanki n’ibigo by’imari iciriritse bizagira uruhare mu kuguriza abaturage, ku buryo mu 2023 uyu mushinga uzasiga wongereye 19% ku baturage bagerwaho n’amashanyarazi.

Umuyobozi ushinzwe ingufu muri Minisiteri y’ibikorwa remezo, Robert Nyamvumba, yatangaje ko kugeza ubu abaturage bagerwaho n’amashanyarazi muri rusange ari 40.8%. Yavuze ko uyu mushinga uzatuma abaturage bose bagerwaho n’amashanyarazi bakabasha kwiteza imbere.

Yagize ati “Uyu mushinga uzatuma Guverinoma y’u Rwanda igera ku ntego yayo yo kugeza amashanyarazi ku baturage bose mu 2024.”

Dusingizimana Moise waturutse mu murenge Sacco Kira Buruhukiro wo mu Karere ka Nyamagabe, yashimangiye ko uyu mushinga uzagirira akamaro abaturage batagira amashanyarazi n’ubushobozi bwo kuyagura, aho bazajya bahabwa inguzanyo hafi yabo kandi bakishyura biboroheye.

Yagize ati “Ni igikorwa cy’ingirakamaro kizafasha abaturage benshi kuko usanga amashanyarazi ari ahantu hake hashoboka. Abaturage harimo abajyaga ku bindi bigo bakagirana amasezerano ariko bikabagora, ariko uyu mushinga ubwo uzaba ukorana n’ikigo cy’imari kibegereye bizaborohera banishyurire hafi.”

Kugeza ubu hari abikorera barenga 26 bari mu gihugu cyose bageza ingufu z’amashanyarazi akomoka ku zuba ku baturage batagerwaho n’umuyoboro mugari.

Umuyobozi Mukuru wa BRD, Alexis Kanyankole, yasobanuye ko bazakorana n’Imirenge Sacco, amabanki n’ibigo by’imari icirirtse,

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza